កីឡាជាតិ
ជាតិ
ណាហ្គាវើលដ៍ នឹងមានកីឡដ្ឋានធ្វើជាមូលដ្ឋានហ្វឹកហាត់និងរៀបចំការប្រកួតក្នុងពេលដ៏ខ្លីខាងមុខ
× ក្លិបបាល់ទាត់ណាហ្គាវើលដ៍ ដែលតែងតែប្រើកីឡដ្ឋានក្លិបដទៃធ្វើជាទឹកដីពេលខ្លួនធ្វើជាម្ចាស់ផ្ទះរៀបចំការប្រកួតនឹងមានកីឡដ្ឋានផ្ទាល់ខ្លួនក្នុងពេលឆាប់ៗខាងមុខនេះ។ បើតាមលោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ កីឡដ្ឋានក្រោមជំនួយឧបត្ថម្ភរបស់ណាហ្គាវើលដ៍នេះ នឹងបើកការដ្ឋានសាងសង់នៅពាក់កណ្តាលខែធ្នូ ឆ្នាំ២០១៩នេះ។ ក្លិបណាហ្គាវើលចាត់ទុកដំណឹងនេះថា ក្តីស្រមៃក្លាយជាការពិត។
ក្រោមគម្រោង«អភិវឌ្ឍយុវជន និងកីឡាខេត្តកំពង់ស្ពឺ»ទីលានបាល់ទាត់ស្តង់ដាអន្តរជាតិមួយស្ថិតក្នុងភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ នឹងលេចចេញជារូបរាងក្នុងពេលដ៏ខ្លីខាងមុខ។ ក្នុងពិធីប្រគល់ និងទទួលមូលប្បទានបត្រ២លានដុល្លារពីណាហ្គាវើលនៅថ្ងៃទី១៥ ខែវិច្ឆិកា ឆ្នាំ២០១៩ លោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺអះអាងថា កីឡដ្ឋានកំពង់ស្ពឺនឹងបើកការដ្ឋានសាងសង់នៅពាក់កណ្តាលខែធ្នូ ឆ្នាំ២០១៩នេះ។
ក្លិបបាល់ទាត់ណាហ្គាវើលចាត់ទុកការប្រកាសកាលបរិច្ឆេទសាងសង់នេះថា ជាដំណឹងមួយដ៏ល្អសម្រាប់ក្លិប និងអ្នកគាំទ្រពួកគេ ជាពិសេសប្រជាពលរដ្ឋក្នុងខេត្តកំពង់ស្ពឺ។ ដ្បិតក្លិបណាហ្គាវើល នឹងប្រើប្រាស់កីឡដ្ឋាននេះ ធ្វើជាមូលដ្ឋានហ្វឹកហាត់ និងរៀបចំការប្រកួតនានា ពិសេសពេលខ្លួនធ្វើជាម្ចាស់ផ្ទះរៀបចំការប្រកួតពានរង្វាន់លីគកំពូល និងពានសម្តេច ហ៊ុន សែន ជាដើម។
ជាមួយគ្នានេះ លោក វ៉ី សំណាង អភិបាលខេត្តកំពង់ស្ពឺបានថ្លែងអំណរគុណដល់លោក ហ៊ុន ម៉ានី ដែលខិតខំប្រឹងប្រែងអភិវឌ្ឍខេត្តកំពង់ស្ពឺ។ អភិបាលខេត្តរូបនេះសង្ឃឹមថា ក្រោយកីឡដ្ឋាននេះ នឹងជួយអភិវឌ្ឍវិស័យកីឡាបាល់ទាត់ខេត្តកំពង់ស្ពឺឲ្យកាន់តែរីកចម្រើន ជួយកសាងធនធានយុវជន និងកាត់បន្ថយសកម្មភាពនានា ដែលសង្គមស្អប់ខ្ពើមជាដើម។
«ខ្ញុំសង្ឃឹមថា ក្រោយពេលដែលកីឡដ្ឋាននេះត្រូវបានសាងសង់រួច យុវជនខេត្តកំពង់ស្ពឺ អាចកសាងខ្លួនទៅជាពលរដ្ឋដែលល្អជាងមុនក្នុងសង្គម ដោយមិនជាប់ជាមួយនឹងគ្រឿងញៀនឬក៏បងតូច បងធំ នៅក្នុងភូមិឋាន តាមរយៈការងាកមកលេងកីឡាដើម្បីសុខភាពវិញ»។ នេះជាការលើកឡើងរបស់លោក វ៉ី សំណាង។
តែយ៉ាងណា យើងមិនទាន់ដឹងកីឡដ្ឋាននេះសាងសង់លើទំហំផ្ទៃដីប៉ុន្មាន ចំណាយថវិកាប៉ុន្មាន និងគ្រោងបញ្ចប់ការសាងសង់នៅពេលណានៅឡើយទេ៕
Tag:
បាល់ទាត់
ណាហ្គាវើលដ៍
កំពង់ស្ពឺ
© រក្សាសិទ្ធិដោយ thmeythmey.com