កីឡាករគុនល្បុក្កតោទទួលបានកម្លាំងចិត្តពី Pacquiao មុនការប្រកួតកីឡាស៊ីហ្គេម

កីឡាជាតិ

ជាតិ

កីឡាករគុនល្បុក្កតោទទួលបានកម្លាំងចិត្តពី Pacquiao មុនការប្រកួតកីឡាស៊ីហ្គេម

17, Nov 2019 , 8:29 am

រូបភាព

ដោយ:

ស្តេចប្រដាល់សកលហ្វីលីពីន Manny Pacquiao ជូនពរឲ្យកីឡាករគុនល្បុក្កតោទទួលបានជោគជ័យក្នុងការប្រកួតកីឡាស៊ីហ្គេមលើកទី៣០ ដែលហ្វីលីពីនធ្វើម្ចាស់ផ្ទះនៅឆ្នាំនេះ។ សមាជិកព្រឹទ្ធសភារូបនេះ ក៏បានអរគុណដល់សហព័ន្ធកីឡាគុនល្បុក្កតោកម្ពុជាផងដែរ ចំពោះការសហការ និងបញ្ជូនកីឡាករឲ្យចូលរួមប្រកួតកីឡាដំបងខ្លី ដែលជាកីឡាប្រពៃណីរបស់ហ្វីលីពីន។

កីឡាករកីឡាការិនីគុនល្បុក្កតោកម្ពុជាត្រូវប្រកួតលើវិញ្ញាសាដំបងខ្លី Arnis ដែលជាកីឡាប្រពៃណីរបស់ហ្វីលីពីនក្នុងព្រឹត្តិការណ៍កីឡាស៊ីហ្គេម ដែលប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ នៅប្រទេសហ្វីលីពីន។ មុនការប្រកួតមកដល់កីឡាករគុនល្បុក្កតោកម្ពុជា ដែលកំពុងបោះជំរំហ្វឹកហាត់នៅហ្វីលីពីន ទទួលបានកម្លាំងចិត្តយ៉ាងធំ ពីស្តេចប្រដាល់របស់ហ្វីលីពីន Manny Pacquiao។

ក្រៅពីការលើកទឹកចិត្ត Pacquiao បានជូនពរឲ្យកីឡាករគុនល្បុក្កតោទទួលបានជោគជ័យក្នុងការប្រកួតកីឡាស៊ីហ្គេម ទោះពួកគេត្រូវប្រជែងជាមួយកីឡាកររបស់ហ្វីលីពីនក៏ដោយ។ ការលើកទឹកចិត្ត និងជូនពររបស់ស្តេចប្រដាល់រូបនេះ ធ្វើឡើងក្នុងពិធីជួបសំណេះសំណាលជាមួយប្រតិភូកីឡាគុនល្បុក្កតោកម្ពុជា នៅថ្ងៃទី១២ ខែវិច្ឆិកា នាវិមានវិមានព្រឹទ្ធសភាហ្វីលីពីន។

ក្នុងឱកាសនោះដែរ សមាជិកព្រឹទ្ធសភារូបនេះ ក៏បានថ្លែងអំណរគុណផងដែរ ដល់សហព័ន្ធកីឡាគុនល្បុក្កតោកម្ពុជាចំពោះកិច្ចសហការ និងបញ្ជូនកីឡាករឲ្យចូលរួមប្រកួតលើវិញ្ញាសា Arnis ដែលជាកីឡាប្រពៃណីរបស់ហ្វីលីពីន។ បើតាមលោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា កម្ពុជាកំពុងធ្វើការយ៉ាងសស្រាក់សស្រាំជាមួយហ្វីលីពីន ដើម្បីបង្កើតសហព័ន្ធកីឡាគុនល្បុក្កតោនៅប្រទេសហ្វីលីពីន។

«ជំនួបនេះ គឺមានសារៈសំខាន់សម្រាប់កម្ពុជា និងហ្វីលីពីន ដោយយើងនឹងមានការជ្រោមជ្រែងជាផ្លូវការមួយក្នុងការពង្រីកសក្តានុពលគុនល្បុក្កតោលើទឹកដីហ្វីលីពីនសម្រាប់ SEA Games 2023 និងថ្ងៃអនាគត និងពង្រឹងបន្ថែមលើកីឡាប្រយុទ្ធដំបងខ្លី ARNIS។ សម្រាប់ SEA Games បន្ទាប់នៅវៀតណាម ក៏គ្រោងដាក់បញ្ជូលវិញ្ញាសានេះផងដែរ»។ នេះជាការលើកឡើងរបស់លោក អ៊ួ តារា។

គួររំលឹកថា នៅថ្ងៃទី១២ វិច្ឆិកា ប្រតិភូកីឡាគុនល្បុក្កតោកម្ពុជាក្រោមការដឹកនាំរបស់លោក អ៊ួ តារា ត្រូវបានភាគីហ្វីលីពីនអញ្ជើញឲ្យធ្វើទស្សនកិច្ចវិមានព្រឹទ្ធសភាហ្វីលីពីន និងជួបសំណេះសំណាលជាសមាជិកមួយចំនួន ដែលមានទាំងស្តេចប្រដាល់ Manny Pacquiao។ បើតាមលោក អ៊ួ តារា ការទទួលបានឱកាសទស្សនកិច្ចនេះ គឺដោយសារសហព័ន្ធកីឡាគុនល្បុក្កតោកម្ពុជាមានទំនាក់ទំនងល្អជាមួយសមាជិកព្រឹទ្ធសភា ដែលធ្វើការពាក់ព័ន្ធវិស័យកីឡា៕