ជាតិ
អចលនទ្រព្យ
បារាំងចង់វិនិយោគលើគម្រោងទឹកស្អាត នៅខេត្តព្រះសីហនុ
× លោកស្រី Eva Nguyen Binh ឯកអគ្គរដ្ឋទូតបារាំងបានថ្លែងថា ក្រុមហ៊ុនបារាំងមានបំណងវិនិយោគផ្នែកទឹកស្អាត នៅក្នុងខេត្តព្រះសីហនុ ដោយសារតែគម្រោងវិនិយោគកើនឡើងយ៉ាងគំហុក ដែលធ្វើឲ្យខេត្តជាប់សមុទ្រមួយនេះ ប្រឈមនឹងការខ្វះខាតទឹកស្អាតប្រើប្រាស់។
ថ្លែងក្នុងជំនួបជាមួយលោក គួច ចំរើន អភិបាលខេត្តព្រះសីហនុ កាលពីពេលថ្មីៗនេះ លោកស្រី ឯកអគ្គរដ្ឋទូតបារាំងបានថ្លែងថា ខេត្តព្រះសីហនុ មានការអភិវឌ្ឍលឿន។ លោកស្រីបន្តថា ទីភ្នាក់ងារអភិវឌ្ឍបារាំង បានសហការជាមួយកម្ពុជា លើគម្រោងទឹកស្អាត នៅរាជធានីភ្នំពេញ និងខេត្តសៀមរាប ហើយក៏ចង់មកវិនិយោគទឹកស្អាត នៅខេត្តព្រះសីហនុផងដែរ ដោយសារតែកំណើនប្រជាពលរដ្ឋមា នការកើនឡើង និងការអភិវឌ្ឍយ៉ាងលឿន បញ្ហាទឹកស្អាត ក៏ជាតម្រូវការមួយផងដែរ។
បន្ថែមលើនេះ លោកស្រីថា គោលបំណងនៃដំណើរទស្សនកិច្ចមកកាន់ខេត្តព្រះសីហនុ គឺដើម្បីពិនិត្យមើលគម្រោងមួយចំនួន ដែលអភិវឌ្ឍន៍ដោយសហគ្រាសបារាំង និងពិនិត្យមើលគម្រោងអភិវឌ្ឍមួយចំនួនទៀត នៅក្នុងខេត្តព្រះសីហនុ។
វិនិយោគមកពីបារាំង បានរួមចំណែកអភិវឌ្ឍន៍ជាច្រើន នៅខេត្តព្រះសីហនុ ក៏ដូចជាប្រទេសកម្ពុជា រួមមានគម្រោង អភិវឌ្ឍន៍តំបន់សេដ្ឋកិច្ចពិសេសក្រុងព្រះសីហនុ កោះឫស្សី អាកាសយានដ្ឋានអន្តរជាតិ ខេត្តព្រះសីហនុ និងគម្រោងអភិវឌ្ឍន៍មួយចំនួនទៀត នៅក្នុងខេត្តព្រះសីហនុ។
ឆ្លើយតបទៅនឹងការលើកឡើងនេះ លោក គួច ចំរើន បានថ្លែងថា សម្រាប់ខេត្តព្រះសីហនុ មាន សមិទ្ធផលរបស់បារាំង ដូចជាទំនប់ ប៊ុលឌែ នៅស្រុកព្រៃនប់ មានសារសំខាន់ណាស់សម្រាប់ឱ្យប្រជាកសិករ ធ្វើកសិកម្មលើផ្ទៃដី ១៥,០០០ ហិកតា ដោយសារតែរដូវវស្សាមានជំនន់ទឹកភ្លៀង ធ្វើឱ្យទំនប់នេះ មានការខូចខាតនៅកន្លែងមួយចំនួន។ ម្យ៉ាងទៀត ទំនប់ប៊ុលឌែនេះ មានសភាពចាស់ទ្រុឌទ្រោម ដែលកន្លងមកក្រសួងធនធនទឹក បានជួសជុលជូនប្រជាពលរដ្ឋប្រើប្រាស់។
លោកបានលើកឡើងពីកត្តាភូមិសាស្ត្រ និងសក្ដានុពលរបស់ខេត្ត ដែលមានឆ្នេរសមុទ្រ ១៧៥ គីឡូម៉ែត្រ កោះ ៣២ ដែលរាជរដ្ឋាភិបាល បានកំណត់ខេត្តព្រះសីហនុ ជាតំបន់សេដ្ឋកិច្ចគម្រូពហុបំណង ដែលមានបណ្ដាញគមនាគមន៍តភ្ជាប់មានកំពង់ផែទឹកជ្រៅ ផ្លូវដែក ផ្លូវគោក ផ្លូវអាកាស កំពុងសាងសង់ផ្លូវល្បឿនលឿនពីភ្នំពេញ មកកាន់ខេត្តព្រះសីហនុ និងអាចរួចរាល់នៅចុងឆ្នាំ២០២២។
ដោយឡែករាជរដ្ឋាភិបាលកម្ពុជា បានធ្វើសម្បទានព្រលានយន្តហោះអន្តរជាតិ ខេត្តព្រះសីហនុ ទៅឱ្យក្រុមហ៊ុនបារាំង ក្នុងកិច្ចសហប្រតិបត្តិការជំរុញអភិបាលកិច្ច។ បច្ចុប្បន្ន មានប្រជពលរដ្ឋបារាំង មកវិនិយោគនៅខេត្តព្រះសីហនុ ដោយបង្កើតជាក្លិប និងភោជនីយដ្ឋាន ជាដើម៕
© រក្សាសិទ្ធិដោយ thmeythmey.com