ភ្នំពេញ៖ ទូរសព្ទឆ្លាតវៃ ឬហៅថា Smart Phone គឺជាឧបករណ៍បច្ចេកវិទ្យាដ៏ទំនើប និងពេញនិយមសម្រាប់បំពេញតម្រូវការរបស់មនុស្ស នាពេលបច្ចុប្បន្ន។ ព្រោះតែលក្ខណពិសេស និងផ្តល់ភាពងាយស្រួលរបស់អ្នកប្រើប្រាស់ ជាពិសេស យុវជនដែលពួកគេបានចំណាយពេលប្រើប្រាស់ទូរស័ព្ទឆា្លតវៃជាច្រើនម៉ោង ក្នុងមួយថ្ងៃៗ សម្រាប់ស្រាវជ្រាវឯកសារមេរៀន, ប្រើប្រាស់បណ្តាញសង្គម, លេងហ្គេម, មើល YouTube ជាដើម។ ទាំងអស់នេះសុទ្ធសឹងតែធ្វើឲ្យប៉ះពាល់សុខភាព ជាពិសេស ខួក្បាល និងភ្នែក ពីបន្តិចម្តងៗ រហូតអាចបង្កទៅជាគ្រោះថ្នាក់ធ្ងន់ធ្ងរ។ វេជ្ជបណ្ឌិត ស៊ុន សារិន ឯកទេសជំងឺភ្នែក នៃមន្ទីរពេទ្យព្រះអង្គឌួង បានឲ្យដឹងថា ការប្រើប្រាស់ទូរស័ព្ទកាន់តែទំនើប មានផលប៉ះពាល់កាន់តែច្រើន តាមរយៈពន្លឺសិប្បនិម្មិតរបស់វា។
«ខ្ញុំមិនដឹងថា ប៉ះពាល់អ្វីខ្លៈទេ! គ្រាន់តែដឹងថា ពេលមើល(Smart Phone) យូរឈឺភ្នែក និងឈឺត្រចៀកពេលស្តាប់កាស»។ នេះជាការអះអាងរបស់និស្សិត សន សុវណ្ណគិរី ដែលកំពុងបន្តការសិក្សានៅប្រទេសវៀតណាម។ យុវជន សុវណ្ណគិរី ប្រើប្រាស់ទូរស័ព្ទឆ្លាតវៃជាមធ្យម៤ម៉ោងក្នុងមួយ ដើម្បីស្រាវជ្រាវមេរៀន បច្ចេកវិទ្យាព័ត៌មានថ្មីៗទាក់ទងនឹងមុខជំនាញរបស់ខ្លួន និងប្រើប្រាស់បណ្តាញសង្គមជាដើម។
សម្រាប់កញ្ញា សោម សុភាព បានរៀបរាប់ពីអាការនៃការប្រើប្រាស់ទូរស័ព្ទឆ្លាតវៃច្រើនម៉ោង ប្រាប់សារព័ត៌មានថ្មីៗថា៖«ការប្រើទូរស័ព្ទវាប៉ះពាល់ដែរ ពេលមើលដំបូងសប្បាយ តែដល់យូៗក៏ធុញវិញ ហើយព្រិលភ្នែក ឈឺក្បាល និងអត់ស្រួលខ្លួន តែធ្វើម៉េចបើត្រូវប្រើវា»។ ជាទូទៅ និស្សិតដែលពាក់វែនតាម្ញូបកំពុងសិក្សាជំនាញគីមីវិទ្យា នៅសាកលវិទ្យាល័យភូមិន្ទភ្នំពេញ រូបនេះ ចំបាច់ត្រូវប្រើប្រាស់ទូរស័ព្ទឆ្លាតវៃច្រើនម៉ោងបែបនេះ នៅក្នុងទំនាក់ទំនងទៅកាន់គ្រួសារ, ធ្វើការងារ និងប្រើប្រាស់បណ្តាញសង្គម។
កញ្ញា ភួន សំភ័ស្ត្រ ដែលបានចំណាយពេលវេលាជាមួយទូរស័ព្ទឆ្លាតវៃក្នុងមួយថ្ងៃ ចន្លោះពី៤ទៅ៥ម៉ៅង នៅថ្ងៃឈប់សម្រាកពីការងារ និងពី១ទៅ២ម៉ោង នៅពេលទំនេរពីដៃពីការធ្វើការងារ យល់យ៉ាងដូច្នេះ៖«ផលប៉ះពាល់អាស្រ័យទៅលើអ្នកលេង(អ្នកប្រើប្រាស់ទូរស័ព្ទឆ្លាតវៃ) ហើយខ្ញុំគិតថា វាមានផលប្រយោជន៍ច្រើន។ យ៉ាងណាក៏ដោយកញ្ញា សំភ័ស្ត្រ បញ្ជាក់ថា ពេលកាន់ទូរស័ព្ទឆ្លាតវៃនេះមើលយូរ ដៃរបស់កញ្ញាចាប់ផ្តើមស្ពឹក និងព្រិលភ្នែក។
ការប្រើប្រាស់ទូស័រព្ទឆាត់វ័យ ឬ Smart Phone ច្រើនម៉ោងក្នុងមួយថ្ងៃ ប្រាកដជាធ្វើឲ្យប៉ះពាល់ដល់សុខភាពរាងកាយ ជាពិសេសគឺភ្នែក។ លោកវេជ្ជបណ្ឌិត ស៊ុន សារិន ឯកទេសជំងឺភ្នែកនៃមន្ទីរពេទ្យព្រះអង្គឌួង នារាជធានីភ្នំពេញ បានប្រាប់សារព័ត៌មានថ្មីៗថា៖«ការប្រើទូរស័ព្ទកាន់តែទំនើប មានផលប៉ៈពាល់កាន់តែច្រើន តាមរយៈពន្លឺសិប្បនិម្មិត ប្រសិនបើ ប្រើយើងវាពុំបានត្រឹមត្រូវ»។
លោកវេជ្ជបណ្ឌិតបានបញ្ជាក់ថា នៅពេលភ្នែកប្រឹងសម្លឹងមើលទូរស័ព្ទដោយនៅជិត និងប្រើរយៈពេលច្រើនម៉ោងជាប់គ្នា នោះនឹងធ្វើឲ្យភ្នែកហត់នឿយ ព្រមទាំងប្រឈមនឹងបញ្ហាជាច្រើនទៀត។ ចំពោះកុមារ ការប្រើឧបករណ៍អេឡិកត្រូនិកនេះ ពុំបានត្រឹមត្រូវ នឹងបង្កទៅជាម្ញូបភ្នែក។ រីឯ បញ្ហាប្រឈមទូទៅ ចំពោះមនុស្សគ្រប់វ័យ មានដូចជា ធ្វើឲ្យភ្នែកស្ងួត, រោយភ្នែក និងបង្ករទៅជាភ្នែកឡើងបាយ។
រោគសញ្ញាដែលអាចសម្គាល់បានថា ភ្នែករបស់យើងកំពុងមានបញ្ហា ត្រូវបានលោក ស៊ុន សារិន ឯកទេសជំងឺភ្នែក បញ្ជាក់ថា មានដូចជា ចាប់ផ្តើមចាញ់ពន្លឺ, ក្តៅនិងក្រហាយភ្នែក, មានហៀរទឹកភ្នែក និងឆាប់រោយភ្នែកជាដើម។ ប្រសិនបើ ដឹងថាខ្លួនឯង មានរោគសញ្ញាបែបនេះលោកវេជ្ជបណ្ឌិត សារិន ឲ្យទៅពិនិត្យ និងពិគ្រោះជាមួយគ្រូពេទ្យជំនាញ ដើម្បីព្យាបាលឲ្យបានត្រឹមត្រូវ។
ដើម្បីកាត់បន្ថយផលប៉ះពាល់ដល់ភ្នែក តាមរយៈការមើលទូរស័ព្ទឆ្លាតវៃ លោកវេជ្ជបណ្ឌិត ស៊ុន សារិន បានផ្តល់យោបល់ថា ត្រូវកាត់បន្ថយការប្រើប្រាស់នូវអ្វីដែលមិនចាំបាច់, ជៀសវាងការមើលជិតពេក និងអាចមើលទូរស័ព្ទឆ្លាតវៃនេះត្រឹមមួយម៉ោង ត្រូវសម្រាកភ្នែកឲ្យបាន១០ទៅ១៥នាទីម្តង ដោយសម្លឹងមើលទៅឆ្ងាយ។ សម្រាប់អ្នកដែលប្រើប្រាស់កុំព្យូទ័រ ក៏ត្រូវធ្វើរបៀបនេះដូចគ្នា។ បន្ថែមពីនេះ អ្នកឯកទេសជំងឺភ្នែក នៃមន្ទីរពេទ្យព្រះអង្គឌួង រូបនេះ ក៏បានណែនាំឲ្យទទួលទានបន្លែឲ្យបានច្រើន ជាពិសេស ប្រភេទបន្លែដែលសម្បូរវីតាមីនអា(A) ដូចជា មើមការ៉ុត និងផ្លែល្ហុងជាដើម៕