ថ្នាក់ដឹកនាំកីឡារាំ រំពឹងកីឡាករដណ្តើមបានមេដាយពីស៊ីហ្គេម ក្រោយជោគជ័យនៅចិន

កីឡាជាតិ

ជាតិ

ថ្នាក់ដឹកនាំកីឡារាំ រំពឹងកីឡាករដណ្តើមបានមេដាយពីស៊ីហ្គេម ក្រោយជោគជ័យនៅចិន

17, Nov 2019 , 6:59 pm

រូបភាព

ដោយ:

ថ្នាក់ដឹកនាំសហព័ន្ធកីឡារាំកម្ពុជាមានការជឿជាក់កាន់តែខ្លាំងលើសមត្ថភាពកីឡាករ ក្នុងការដណ្តើមមេដាយពីព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំនេះជូនជាតិមាតុភូមិ។ ការជឿជាក់បែបនេះ ធ្វើឡើងក្រោយកីឡារាំទទួលបានជោគជ័យជាបន្តបន្ទាប់នៅលើឆាកអន្តរជាតិក្នុងមួយរយៈចុងក្រោយនេះ។ ជាក់ស្តែងកាលពីពេលថ្មីៗ កីឡាកររាំកម្ពុជាដណ្តើមបានមេដាយមាស៨ ប្រាក់៧ និងសំរឹទ្ធ៦ពីការប្រកួតជើងឯកយុវជនអាស៊ី ADSF Asian Youth Single Dance Championship 2019 នៅប្រទេសចិន។

ក្រោយដណ្តើមបានមេដាយមាស១ និងប្រាក់២ពីការប្រកួត WDSF Taipei Open 2019 នៅឆាយនីសតៃប៉ិកាលពីអំឡុងខែតុលាមិនបានប៉ុន្មានផង។ ក្រុមកីឡារាំកម្ពុជាកាលពីពេលថ្មីៗ ទទួលបានជោគជ័យយ៉ាងធំធេងនៅក្នុងការប្រកួតជើងឯកយុវជនអាស៊ី ADSF Asian Youth Single Dance Championship 2019 និង Hong Kong Open តាមរយៈដណ្តើមបានមេដាយមាស៨ ប្រាក់៧ និងសំរឹទ្ធ៦។

ភាពជោគជ័យខាងលើ ជំរុញឲ្យថ្នាក់ដឹកនាំសហព័ន្ធកីឡារាំកម្ពុជា មានជំនឿចិត្តកាន់តែខ្លាំងលើសមត្ថភាពកីឡាករក្នុងការសាងកេរ្តិ៍ឈ្មោះជូនជាតិនៅឆាកអន្តរជាតិ។ លោកស្រី ញ៉ែម មរកត ប្រធានសហព័ន្ធរំពឹងថា កីឡាករខ្លួននឹងអាចដណ្តើមបានមេដាយណាមួយ ពីព្រឹត្តិការណ៍ស៊ីហ្គេមនៅហ្វីលីពីនឆ្នាំនេះ សម្រាប់ការចូលរួមលើកដំបូងរបស់ខ្លួន។

លោកស្រី ញ៉ែម មរកត ផ្តល់បទសម្ភាសដល់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញ

«ក្នុងការប្រកួត Taipei Open កាលពីខែតុលា យើងក៏ដណ្តើមបានមេដាយមាសដែរ ហើយលើកនេះយើងដណ្តើមបានមេដាយមាសច្រើនជាងមុន។ បើតាមគ្រូបង្វឹកការប្រកួតជើងឯកយុវជនអាស៊ីនៅហុងកុង មានកីឡាកររាប់រយនាក់ចូលរួម ហើយមានតែយើងនោះទេមានកីឡាករតិចជាងគេ។ ប៉ុន្តែយើងដណ្តើមបានមេដាយច្រើន គឺមានទាំងមាស ប្រាក់ និងសំរឹទ្ធ។ យើងទាំងអស់គ្នាសង្ឃឹមថា ស៊ីហ្គេមនៅហ្វីលីពីន យើងអាចនឹងទទួលបានជោគជ័យជូនជាតិបន្ថែមទៀត»។ នេះជាការលើកឡើងរបស់លោកស្រី ញ៉ែម មរកត ដែលបានចាត់ទុកភាពជោគជ័យខាងលើជាសមិទ្ធផល និងមោទកភាពថ្មីបន្ថែមទៀតសម្រាប់សហព័ន្ធ។

ជាមួយគ្នានេះលោកស្រី ឆៃ ច័ន្ទរឹទ្ធីសូលីដា អនុប្រធានកិត្តិយសសហព័ន្ធកីឡារាំកម្ពុជាបានលើកឡើងពីកិច្ចខិតខំប្រឹងប្រែងរបស់លោកស្រីនិងថ្នាក់ដឹកនាំដទៃ ដែលកំពុងជួយជំរុញឲ្យកីឡារាំកាន់តែមានភាពរីកចម្រើន ដើម្បីឈានទៅរកភាពជោគជ័យក្នុងការប្រកួតកីឡាស៊ីហ្គេមនៅឆ្នាំនេះ។

លោកស្រី ឆៃ ច័ន្ទរឹទ្ធីសូលីដា ពេលទៅទទួលម្ចាស់ជ័យលាភីនៅអាកាសយានដ្ឋានអន្តរជាតិភ្នំពេញ

«យើងទាំងអស់គ្នាបានព្យាយាមប្រឹងប្រែងខ្លាំងណាស់ ហើយក៏ព្យាយាមលើកទឹកចិត្តដល់ប្អូនៗកីឡាករកីឡាការិនី ជាពិសេសគ្រូបង្វឹកឲ្យខិតខំប្រឹងប្រែងឲ្យអស់ពីសមត្ថភាព។ យើងទាំងពីរនាក់(លោកស្រី ឆៃ ច័ន្ទរឹទ្ធីសូលីដា និងលោកស្រី ញ៉ែម មរកត)ប្រឹងប្រែងខ្លាំងណាស់ ដើម្បីឲ្យកីឡាករយើងអាចឈានជើងទៅរកជ័យជម្នះក្នុងការប្រកួតកីឡាស៊ីហ្គេមនាពេលខាងមុខនេះ»។ នេះជាការលើកឡើងរបស់លោកស្រី ឆៃ ច័ន្ទរឹទ្ធីសូលីដា។

ទោះបីសហព័ន្ធកីឡារាំទើបបង្កើតឡើងបានប៉ុន្មានឆ្នាំ និងមានថ្នាក់ដឹកនាំភាគច្រើនជាស្ត្រីក៏ដោយ តែសហព័ន្ធនេះទទួលបានលទ្ធផលល្អប្រសើរគួរឲ្យកត់សម្គាល់។ សូម្បីលោកស្រី ញ៉ែម មរកត ខ្លួនឯងក៏បង្ហាញភាពភ្ញាក់ផ្អើលចំពោះការរីកចម្រើននេះដែរ។ លោកស្រីរៀបរាប់ដូច្នេះថា៖«យើងមិននឹកស្មានថា សហព័ន្ធរាំយើងមានការរីកចម្រើនបែបនេះឡើយ ឲ្យតែចេញទៅចូលរួមប្រកួតលើកណានៅក្រៅប្រទេស ត្រឡប់មកវិញបើមិនដណ្តើមបានមេដាយមាស ក៏ប្រាក់ដែរ គឺមិនដែលមកវិញដៃទទេនោះទេ»។

ទោះបីសហព័ន្ធនេះកំពុងមានឈ្មោះបោះសម្លេងទាំងនៅលើឆាកជាតិ និងអន្តរជាតិក៏ដោយ តែសហព័ន្ធនេះកំពុងប្រឈមបញ្ហាខ្វះខាតកីឡាករកីឡាការិនី ដើម្បីត្រៀមឆ្ពោះទៅធ្វើជាម្ចាស់ផ្ទះការប្រកួតកីឡាស៊ីហ្គេមនៅឆ្នាំ២០២៣។ បើតាមលោកស្រី ញ៉ែម មរកត បញ្ហានេះអាចបណ្តាលមកពីអាណាព្យាបាលមួយចំនួនពុំទាន់ស្គាល់អ្វីទៅជាកីឡារាំ ជាពិសេសកីឡាករខ្លួនឯងពុំមានការចាប់អារម្មណ៍ជាមួយកីឡានេះ។ បច្ចុប្បន្នមានសហព័ន្ធមានក្លិប-សមាគម តែ៥ប៉ុណ្ណោះជាសមាជិក។

ប្រតិភូ គ្រូបង្វឹក និងកីឡាករកីឡាការិនីកីឡារាំកម្ពុជាបាននាំជោគជ័យពីហុងកុង មកដល់ប្រទេសកម្ពុជាកាលពីថ្ងៃទី១២ ខែវិច្ឆិកា ដោយទទួលបានការស្វាគមន៍យ៉ាងកក់ក្តៅពីសំណាក់អនុប្រធានកិត្តិយសសហព័ន្ធកីឡារាំកម្ពុជាលោកស្រី ឆៃ ច័ន្ទរឹទ្ធីសូលីដា និងលោកស្រី ញ៉ែម មរកត ប្រធានសហព័ន្ធ និងថ្នាក់ដឹកនាំជាច្រើនរូបទៀតនៅអាកាសយានដ្ឋានអន្តរជាតិភ្នំពេញ។

សម្រាប់ការប្រកួត ADSF Asian Youth Single Dance Championship 2019 និង Hong Kong Open នៅទីក្រុងហុងកុង ដែលប្រព្រឹត្តទៅចាប់ពីថ្ងៃទី៧-១១ ខែវិច្ឆិកា កម្ពុជាបញ្ជូនកីឡាករកីឡាការិនីចំនួន១២រូបឲ្យចូលរួម៕