ជាតិ
២៥ខេត្ត/រាជធានី
ប្លែកភ្នែក! សត្វកុក ក្រៀល ក្រសារ និងក្អែកទឹក នៅស្រុកមង្គលបូរី ទាក់ទាញភ្ញៀវទេសចរ ប្រភេទសត្វស្លាបគោក និងសត្វស្លាបទឹក កំពុងហោះហើរមកទំលើដើមឈើរបស់អ្នកស្រុកមង្គលបូរី ខេត្តបន្ទាយមានជ័យ រូបភាពពីលោក អ៊ុំ រាត្រី អភិបាលខេត្តបន្ទាយមានជ័យ
× ភ្នំពេញ៖ ប្រភេទសត្វស្លាបគោក និងសត្វស្លាបទឹកចម្រុះរាប់ម៉ឺនក្បាល បានហើរទៅទំលើដើមឈើធំៗក្នុងចម្ការប្រមាណជាង៣ហិកតា របស់អ្នកស្រុកមង្គលបូរី ក្នុងខេត្តបន្ទាយមានជ័យ បានជំរុញឲ្យតំបន់នេះក្លាយជាកន្លែងទាក់ទាញភ្ញៀវទេសចរជាតិ-អន្តរជាតិ មកទស្សនាយ៉ាងច្រើន។ ដំណើរហោះហើររបស់សត្វស្លាបទាំងនោះ អាចឲ្យពលរដ្ឋដែលរស់នៅក្នុងតំបន់នោះបង្កើតជាមុខរបរផ្សេងៗផងដែរ។
លោក ឈឿន សេរីវឌ្ឍ ប្រធានមន្ទីរទេសចរណ៍ខេត្តបន្ទាយមានជ័យ បានបញ្ជាក់ប្រាប់ ThmeyThmey25 ថា សត្វស្លាបគោក និងសត្វស្លាបទឹកចម្រុះ ជាប្រភេទសត្វស្លាបដែលរស់ក្នុងតំបន់វាលទំនាបចំនួន៤តំបន់ ក្នុងនោះមកពីតំបន់រមណីយដ្ឋានកំពីងពួយ តំបន់អូរកៃដរ តំបន់អាងត្រពាំងថ្ម និងស្រុកអង្គរបូរី។ ប្រភេទសត្វស្លាបទាំងនេះ ជាប្រភេទសត្វកុក ក្រៀល ក្រសារ និងក្អែកទឹក ដែលតែងតែហោះហើរជាហ្វូងទៅវិញទៅមកទំលើដើមឈើធំៗនៅក្នុងដីចម្ការអ្នកស្រុក ក្នុងស្រុកមង្គលបូរី ខេត្តបន្ទាយមានជ័យ។
ប្រជាពលរដ្ឋដែលកំពុងប្រកបមុខរបរលក់ដូរនៅក្នុងស្រុកមង្គលបូរី ខេត្តបន្ទាយមានជ័យ រូបភាពពីលោក អ៊ុំ រាត្រី អភិបាលខេត្តបន្ទាយមានជ័យ
បើតាមលោក ឈឿន សេរីវឌ្ឍ ប្រធានមន្ទីរទេសចរណ៍ខេត្តបន្ទាយមានជ័យ ប្រភេទសត្វស្លាបទាំងនោះហោះហើរជាហ្វូងមកទំលើដើមឈើដែលជាដើមឈើរបស់អ្នកស្រុកមង្គលបូរីដាំនៅក្នុងចម្ការរបស់ខ្លួន។ ប្រភេទដើមឈើដែលអ្នកស្រុកដាំនៅក្នុងដីចម្ការនោះ ជាប្រភេទដើមឈើក្រដាស ដើមកាស្យា និងដើមប្រេងខ្យល់។ លោក ឈឿន សេរីវឌ្ឍ បានបញ្ជាក់ថា ជាទូទៅប្រភេទសត្វស្លាបទាំងនោះ ប្រមូលផ្តុំគ្នាមកទំលើដើមឈើតែពេលព្រលប់ ហើយពេលព្រឹកព្រលឹម វាក៏ហោះហើរចេញទៅតំបន់ផ្សេងៗ ដែលស្ថិតនៅក្នុងខេត្តបន្ទាយមានជ័យ។
«វាតែងតែហើរមកតែពេលល្ងាចចាប់ពីម៉ោង៥កន្លះទៅ រហូតដល់ពេលព្រឹកព្រលឹមវាហើរទៅវិញហើយ វាហើរមកទីនេះជុំវិញចម្ការអ្នកស្រុកហើយ បានវាមកចូលដេកនៅលើដើមឈើ ហើយព្រឹកឡើងវាហើរទៅវិញបាត់ទៅ។ វាមិនមែនមកនៅទីនេះរហូតទេ វាគ្រាន់តែមកដេកទេ ហើយវាក៏មិនមកបង្កើតជាសំបុកអ្វីដែរ»។ នេះបើតាមការរៀបរាប់របស់លោក ឈឿន សេរីវឌ្ឍ ប្រធានមន្ទីរទេសចរណ៍ប្រចាំខេត្តបន្ទាយមានជ័យ ដែលបន្ថែមថា ជារៀងរាល់ឆ្នាំ តាមចំណាំប្រភេទសត្វស្លាបទាំងនោះហើរមកតំបន់នេះសម្រាប់តែខែតុលា ដល់ខែឆ្នូ ប៉ុណ្ណោះ។
អ្នកស្រុកមង្គលបូរី កំពុងទស្សនាសត្វស្លាបដែលកំពុងហោះហើរជុំវិញស្រុកមង្គលបូរី ខេត្តបន្ទាយមានជ័យ រូបភាពពីលោក អ៊ុំ រាត្រី អភិបាលខេត្តបន្ទាយមានជ័យ
ប្រធានមន្ទីរទេសចរណ៍ខេត្តបន្ទាយមានជ័យរូបនេះ បានបញ្ជាក់ទៀតថា នៅឆ្នាំនេះប្រភេទសត្វស្លាបទាំងនោះ មានការកើនឡើងខ្លាំងជាងរាល់ឆ្នាំកន្លងទៅ ដែលជួយបង្កើនការទាក់ទាញដល់ភ្ញៀវទេសចរជាតិ-អន្តរជាតិ មកទស្សនា និងផ្តិតយករូបភាពអំពីដំណើររស់នៅរបស់សត្វស្លាប។
តាមរយៈទិដ្ឋភាពហោះហើររបស់ប្រភេទសត្វស្លាបទាំងនោះ អាចជាចំណែកមួយដែលជួយទាក់ទាញភ្ញៀវទេសចរ។ ជាពិសេសអាចផ្តល់ចំណូលដល់ពលរដ្ឋដែលប្រកបមុខរបរលក់ចំណីអាហារនៅតំបន់នោះផងដែរ។ តាមការលើកឡើងរបស់ប្រធានមន្ទីរទេសចរណ៍ខេត្តបន្ទាយមានជ័យ អភិបាលខេត្តក៏កំពុងតែមានគម្រោងបង្កើតតំបន់នោះជាតំបន់ទេសចរណ៍ ដោយអភិបាលខេត្តបានបង្គាប់ឲ្យអាជ្ញាធរ និងពលរដ្ឋសហការគ្នាអភិរក្សប្រភេទសត្វស្លាបទាំងនោះឲ្យរស់រានមានជីវិត ដើម្បីទាក់ទាញភ្ញៀវទេសចរ ឲ្យមកទស្សនាខេត្តបន្ទាយមានជ័យ។
បើតាមការបញ្ជាក់ពីលោក ប៊ូ វរសក្ស ប្រធានអង្គការជីវិតសត្វស្លាបអន្តរជាតិប្រចាំនៅកម្ពុជា(BirdLife International Cambodia Programme) សត្វស្លាបនៅកម្ពុជាមានជាង៦០០ប្រភេទ។ ប្រភេទសត្វទាំងនោះភាគច្រើនរស់នៅក្នុងតំបន់ព្រៃ តំបន់ដីសើម ជុំវិញបឹងទន្លេសាប និងតាមទីប្រជុំជនជាដើម។
ខេត្តព្រះវិហារ,ស្ទឹងត្រែង,ក្រចេះ,បន្ទាយមានជ័យ,មណ្ឌលគិរី,រតនគិរី,កំពត និងតាកែវ ជាតំបន់ដែលក្រសួងបរិស្ថាន និងតំណាងអង្គការផ្សេងៗ បានបង្កើតជាតំបន់អភិរក្សសត្វស្លាប និងជាតំបន់ទេសចរណ៍ផងដែរ។ នេះបើតាមលោក ប៊ូ វរសក្ស ដែលបានបញ្ជាក់ប្រាប់ ThmeyThmey25 តាមទូរសព្ទ៕
Tag:
សត្វស្លាប
ទេសចរណ៍
សេដ្ឋកិច្ច
© រក្សាសិទ្ធិដោយ thmeythmey.com