ជាតិ
នយោបាយជាតិ
ហ្វ៊ុនស៊ិនប៉ិច ជួបបញ្ហាផ្ទៃក្នុងទៀតហើយ! លោក ពេជ្រ សូដេថ្ថា (ឆ្វេង) និងព្រះអង្គម្ចាស់ នរោត្តម ចក្រាវុឌ្ឍ ប្រធានស្តីទីបក្សហ៊្វុនស៊ិនប៉ិច
× ក្រោយស្ងប់ស្ងាត់មួយរយៈ ផ្ទៃក្នុងគណបក្សហ្វ៊ុនស៊ិនប៉ិច បានបង្ហាញឲ្យឃើញពីភាពរង្គោះរង្គើសារជាថ្មីម្តងទៀត តាមរយៈការចេញលិខិតដាច់ដោយឡែកពីគ្នា រវាងព្រះអង្គម្ចាស់ នរោត្តម ចក្រាវុឌ្ឍ និងក្រុមលោក ពេជ្រ សូដេថ្ថា។
តាមរយៈលិខិតដែលចែកចាញដល់អ្នកសារព័ត៌មាន ព្រះអង្គម្ចាស់ នរោត្តម ចក្រាវុឌ្ឍ បានចេញសេចក្តីជូនដំណឹងស្តីពីការបិទទីស្នាក់ការគណបក្សនៅសង្កាត់ជ្រោយចង្វារ រាជធានីភ្នំពេញ ជាបណ្តោះអាសន្ន។ នៅថ្ងៃទី១៦ ខែវិច្ឆិកា ដដែល ក្នុងនាមជាប្រធានស្តីទី ព្រះអង្គ ចក្រាវុឌ្ឍ បានសម្រេចបញ្ចប់សមាជិកភាពសហជីវិន៤រូប គឺលោក ពេជ្រ សូដេថ្ថា (អគ្គលេខាធិការ) លោក រស់ សាផន (អគ្គលេខាធិការរង) លោក ណុប សុធារិទ្ធិ (អគ្គលេខាធិការង) និងលោកស្រី កង បូរាណ (នាយកខុទ្ទកាល័យសម្តេចក្រុមព្រះ)។
លោក ណុប សុធារិទ្ធិ ដែលកន្លងមកមានតួនាទី ជាអ្នកនាំពាក្យគណបក្ស បានចាត់ទុកថា ជារឿងមិនត្រឹមត្រូវ មុនពេលលោកផ្ញើលិខិតចំនួនពីរ ដែលចុះហត្ថលេខា លោក ពេជ្រ សូដេថ្ថា ក្នុងតំណែងជាអគ្គលេខាធិការប្រតិបត្តិ។
«រាល់លិខិតរដ្ឋបាលកន្លងមក ដែលចុះហត្ថលេខាដោយព្រះអង្គម្ចាស់ នរោត្តម ចក្រាវុឌ្ឍ មានភាពមិនប្រក្រតី ផ្ទុយពីលក្ខន្តិកៈគណបក្ស ហើយបានបង្កឲ្យមានស្ថានភាពច្របូកច្របល់ និងការបែកបាក់សាមគ្គីភាពផ្ទៃក្នុងជាបន្តបន្ទាប់»។ នេះជាការគូសបញ្ជាក់របស់លោក ពេជ្រ សូដេថ្ថា ដោយអះអាងថា លោកមានភារកិច្ចជាសនាធិការផ្ទាល់ប្រធានគណបក្សក្នុងការគ្រប់គ្រង ដឹកនាំ បញ្ជា ត្រួតពិនិត្យរាល់សកម្មភាពការងារប្រចាំថ្ងៃ។
លោក ពេជ្រ សូដេថ្ថា បានបញ្ជាក់ថា ព្រះអង្គម្ចាស់ នរោត្តម ចក្រវុឌ្ឍ ក្នុងឋានៈជាប្រធានស្តីទី ពុំទាន់បានបំពេញនីតិសម្បទាស្របតាមការណែនាំរបស់ក្រសួងមហាផ្ទៃនៅឡើយ។
នៅថ្ងៃទី១៦ ខែវិច្ឆិកា ដដែល លោក ពេជ្រ សូដេថ្ថា បានចេញសេចក្តីជូនដំណឹងស្តីពីការផ្អាកបណ្តោះអាសន្នចំពោះកិច្ចពិភាក្សាអំពីការបង្រួបបង្រួមរវាងគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។
អគ្គលេខាធិការប្រតិបត្តិដែលត្រូវបានប្រធានស្តីទីបញ្ចប់សមាជិកភាពរូបនេះ បានបញ្ជាក់ថា ការបង្រួបបង្រួម ត្រូវធ្វើឡើងក្នុងក្របខណ្ឌនៃគណបក្សហ្វ៊ុនស៊ិនប៉ិច ហើយត្រូវរង់ចាំការប្រជុំពិភាក្សា និងសុំមតិយោបល់ពីគណៈកម្មការនាយក មុននឹងស្នើសុំការសម្រេចពីសម្តេច ក្រុមព្រះ នរោត្តម រណឫទ្ធិ។
លោក សូដេថ្ថា បានបន្ថែមថា៖ «មានមនុស្សមួយក្រុមតូច ឆ្លៀតឱកាសដែលសម្តេចក្រុមព្រះ មានស្ថានភាពមិនប្រក្រតី ព្រះសុខភាពមិនទៀងទាត់ បានឃុបឃិតគ្នាលើកយកបញ្ហានៃការរួបរួមនេះទៅសម្រេច ដោយគ្មានឆ្លងកាត់អង្គប្រជុំគណៈកម្មការនាយករបស់គណបក្ស»។
ព្រះអង្គម្ចាស់ នរោត្តម ចក្រាវុឌ្ឍ ត្រូវបានតែងតាំងជាប្រធានស្តីទីគណបក្សហ្វ៊ុនស៊ិនប៉ិច ក្រោយពេលដែលសម្តេចក្រុមព្រះ ដែលជាបិតា ជួបគ្រោះថ្នាក់ចរាចរណ៍។ កន្លងមក ព្រះអង្គក៏បានបញ្ចប់សមាជិកភាពមន្ត្រីជើងចាស់មួយចំនួនផងដែរ ក្នុងនោះមានដូចជា លោកយូ ហុកគ្រី លោកប៉ោ ប៊ុនស្រ៊ឺ លោកញ៉េប ប៊ុនជិន និងលោកវ៉ាន់ សុផាន់ណា៕
© រក្សាសិទ្ធិដោយ thmeythmey.com