កម្ពុជាបាត់បង់ព្រះមាតានៃរបាំព្រះរាជទ្រព្យ!

ជាតិ

កម្ពុជាបាត់បង់ព្រះមាតានៃរបាំព្រះរាជទ្រព្យ!

18, Nov 2019 , 3:19 pm

រូបភាព

ដោយ: ថ្មីៗ

សម្ដេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះពិរាល័យក្នុងព្រះជន្ម ៧៧ព្រះវស្សា នាវេលាម៉ោង ១២:៣០ នាទី ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យប្រទេសថៃ ដោយជរាពាធ។ ការបាត់ព្រះនិមិត្តរូបនៃរបាំព្រះរាជទ្រព្យ ដែលទទួលបានព្រះគោរមងារថា «ទេពនាថរដ្តីឯក» និងជា «មរតកមនុស្សរស់របស់កម្ពុជា» គឺជាការបាត់បង់ដ៏ធំធេងរបស់កម្ពុជា ជាពិសេសវប្បធម៌។

អត្ថបទទាក់ទង

សម្តេចរាជបុត្រី ព្រះរៀម នរោត្តម បុប្ផាទេវី សុគតក្នុងព្រះជន្ម៧៧ព្រះវស្សា

«សោកស្តាយ, ក្តុកក្តួល, រន្ធត់ចិត្ត»។ នេះជាអារម្មណ៍របស់អ្នកសិល្បៈវប្បធម៌ ដែលធ្លាប់ធ្វើការដោយផ្ទាល់ និងមិនផ្ទាល់ជាមួយសម្តេចព្រះរាជបុត្រី ព្រះរៀម នរោត្តម បុប្ផាទេវី នៅពេលដែលក្រុមការងារសារព័ត៌មានសាកសួរទាក់នឹងដំណឹងនៃការយាងសោយព្រះពិរាល័យរបស់ព្រះអង្គ។ ពួកគាត់បានរំលឹកពីព្រះគុណបំណាច់ដ៏ធំធេងរបស់សម្តេចព្រះរាជបុត្រី ព្រះរៀម ដែលបានចំណាយពេលមួយព្រះជន្មដើម្បីវប្បធម៌ជាតិ។

រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ដែលកំពុងប្រជុំនៅប្រទេសបារាំង បានថ្លែងទាំងក្ដុកក្ដួលប្រាប់សារព័ត៌មានថ្មីៗ តាមទូរសព្ទថា៖ «មួយព្រះជន្មរបស់សម្ដេចព្រះរៀម ព្រះអង្គបានបូជារាជកាយពលំតាំងពីក្មេងនៅក្នុងវិស័យសិល្បៈ ហើយស្នាដៃរបស់លោកច្រើនណាស់ តាំងពីការថែរក្សា ការធ្វើឱ្យរស់ឡើងវិញនូវរបាំព្រះរាជទ្រព្យតាំងពី១០០ឆ្នាំមុន។ ប៉ុន្តែយ៉ាងណាស្មារតីរបស់សិល្បករ សិល្បការិនី និងថ្នាក់ដឹកនាំយើងទាំងអស់ នៅតែបន្តកិច្ចការព្រះរាជកិច្ចរបស់ព្រះអង្គ ដែលព្រះអង្គបានធ្វើ ក្នុងការថែរក្សា ចងក្រងជាឯកសារថតជាវីដេអូ និងស្រាវជ្រាវរបស់បុរាណពីព្រះអង្គ ហើយយើងពិនិត្យលើស្នាព្រះហស្ថទាំងប៉ុន្មានរបស់ព្រះអង្គ យកមករៀបចំចងក្រងទុកថែរក្សា ដើម្បីយើងអាចធ្វើសកម្មភាពបន្តទៀតពីព្រះអង្គ»។

លោកស្រី ភឿង សកុណា និងសម្តេចរាជបុត្រីព្រះរៀម នរោត្តម បុប្ផាទេវី នាពិធីបួងសួងសុំព្រះរាជានុញ្ញាតិ ពីព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រីយានី ដើម្បីរៀបចំ ស្រាវជ្រាវ ចងក្រង និង ថតទុកជាឯកសារផ្លូវការ នូវរបាំក្បាច់បុរាណខ្មែរ។ រូបថតក្រសួងវប្បធម៌

អតីតនាថការី ព្រឿង ឈៀង ទីប្រឹក្សាក្រសួងវប្បធម៌ អ្នកស្និទ្ធនឹងសម្តេចព្រះរាម តាំងពីកុមារ៖ «ខ្ញុំជឿថា នេះមិនមែនជាការបាត់បង់សម្រាប់តែមជ្ឈដ្ឋានអ្នកសិល្បៈឡើយ។ គឺជាបាត់បង់ធនធានសិល្បៈបុរាណរបស់កម្ពុជាទាំងមូល។ សម្តេចព្រះរៀមបានបង្កើតស្នាព្រះហស្ថច្រើនណាស់ នៅក្នុងវិស័យសិល្បៈបុរាណនេះ។ ព្រះអង្គគឺជាអ្នកបន្តវេនរបាំព្រះរាជទ្រព្យពីព្រះឯយ្យិកា គឺព្រះអគ្គមហេសី ស៊ីសុវត្ថិ កុសុមៈនារីរ័ត្ន ព្រះអង្គជាអប្សរាដំបូងដែលធ្វើឱ្យអន្តរជាតិស្គាល់កម្ពុជា។ ក្រោយសម័យប៉ុលពត ដែលធ្វើឱ្យធនធានសិល្បៈបុរាណនៅសល់បន្តិចបន្តួច ព្រះអង្គបានជំរុញ និងលើកស្ទួយសិល្បៈបុរាណរហូតបានបណ្តុះតួអប្សរាជាច្រើនទៀតក្នុងពេលបច្ចុប្បន្ននេះ។ សម្តេចព្រះរៀម ជាមនុស្សសាមញ្ញ ដូចព្រះបរមរតនកោដ្ឋ ដែលស្និទ្ធស្នាលនឹងប្រជារាស្ត្រ។ ព្រះអង្គឱ្យតម្លៃអ្នកសិល្បៈជារួម ដោយមិនបែងចែក អ្នកអាជីព ឬមិនអាជីពឡើយ»។

អតីតនាថការី ព្រឿង ឈៀង ទីប្រឹក្សាក្រសួងវប្បធម៌ អ្នកស្និទ្ធនឹងសម្តេចព្រះរាម តាំងពីកុមារ

អ្នកស្រី ថោង គឹមអាន ទីប្រឹក្សាក្រសួងវប្បធម៌ និងជាកូនស្រីរបស់ទេវរាជនិមិត្ត ឯម ធាយ ដែលជាគ្រូបង្ហាត់របាំព្រះរាជទ្រព្យនៅក្នុងព្រះបរមរាជវាំង៖ «សម្តេចព្រះរាម ជាគ្រូ ហើយដូចជាម្តាយរបស់ពួកយើង។ ខ្ញុំបានធ្វើការជាមួយសម្តេចច្រើនឆ្នាំ ហើយក៏ចេញសម្តែងរបាំនៅក្រៅប្រទេសជាច្រើនជាមួយសម្តេច។ សម្តេចជាអ្នកឃុំគ្រង មើលការខុសត្រូវពួកយើង។ យើងបានបាត់បង់មរតករបាំមួយរូបហើយ។ ក្នុងព្រះកាយរបស់ព្រះអង្គ មានតួអង្គរបាំជាច្រើន ដែលយើងត្រូវរៀនសូត្រពីព្រះអង្គ»។

អ្នកស្រី ថោង គឹមអាន ទីប្រឹក្សាក្រសួងវប្បធម៌ និងជាកូនស្រីរបស់ទេវរាជនិមិត្ត ឯម ធាយ

លោក ខុន ច័ន្ទសិទ្ធិការ្យ ប្រធានក្រុមយុវជនល្ខោនខោលកម្ពុជា ដែលធ្លាប់ចេញទៅសម្តែងនៅបរទេសជាមួយព្រះអង្គ បានលើកឡើងថា៖ «នេះ ជាការបាត់បង់ធំធេងសម្រាប់ខ្ញុំផ្ទាល់ និងក្រុមយុវជនល្ខោនខោលកម្ពុជា ព្រះអង្គតែងតែគាំទ្រការងារល្ខោនខោលរបស់ពួកខ្ញុំ។ ព្រះអង្គជាបុគ្គលសំខាន់ក្នុងវិស័យសិល្បៈបុរាណ។ ព្រះអង្គពិតជាមានព្រះតួនាទីសំខាន់ក្នុងវិស័យសិល្បៈរបស់ខ្មែរ ទ្រង់ជាព្រឹទ្ធាចារ្យ ជាចាស់ទុំ ដែលជាអ្នកជំរុញនូវវិស័យសិល្បៈ ហើយទ្រង់តែងតែដឹកនាំការសម្ដែងទៅប្រទេសជាច្រើន។ ទ្រង់ពេញចិត្តការរាំរបស់បងប្អូនយើង ទ្រង់ក៏ហៅខ្ញុំថា ម៉ូ និងណាន់ ពេញៗមាត់»។