ក្រុមបាតុករហុងកុងដែលប្រមូលផ្តុំកម្លាំងគ្នាក្នុងសកលវិទ្យាល័យហុងកុងមួយ បានដុតបញ្ឆេះមាត់ទ្វារធំ ដើម្បីបង្ការប៉ូលិសដែលហ៊ុមព័ទ្ធទីតាំងនោះកុំឲ្យសម្រុកចូលទៅក្នុងបាន។ ការដុតភ្លើងបែបនេះ គឺធ្វើឡើងបន្ទាប់ពីប៉ូលិសហុងកុងបានព្រមានថា ពួកគេប្រហែលត្រូវប្រើប្រាស់កាំភ្លើងគ្រាប់ពិត ប្រសិនបើបាតុករមិនឈប់ប្រើអាវុធគ្រោះថ្នាក់ទេនោះ។
អំពើហិង្សាក្នុងទីក្រុងហុងកុង កំពុងរីករាលដាលដល់ដំណាក់កាលគ្រោះថ្នាក់ថ្មីមួយ គិតចាប់ពីវិបត្តិនេះផ្ទុះឡើងកាលពីខែមិថុនាមក ពោលគឺជិត៦ខែទៅហើយ។ នោះគឺ គេឃើញថា ទាហានចិន បានចាកចេញពីបន្ទាយពួកគេទៅបោសសម្អាតផ្លូវនានាក្នុងទីក្រុងហុងកុង ដោយគ្មានសំណើពីសំណាក់រដ្ឋាភិបាលហុងកុង ប៉ុន្តែទង្វើនេះ ត្រូវបានរដ្ឋាភិបាលលោកស្រី ការី ឡាំចាត់ទុកថាជា ស្មារតីស្ម័គ្រចិត្តបែបសហគមន៍។
រដ្ឋាភិបាលចិនបានបដិសេធតាមការទាមទារសំខាន់ៗដែលបានលើកឡើងដោយក្រុមបាតុករហុងកុង ដែលក្នុងនោះគឺមានការបោះឆ្នោតសេរីសម្រាប់ទីក្រុងដែលមានប្រជាជនរស់នៅសរុបប្រមាណ៧,៥លាននាក់ផងដែរ។ ក្រុងប៉េកាំង ម្តងហើយម្តងទៀត បានព្រមានថា ខ្លួននឹងមិនអត់ធ្មត់ចំពោះអ្នកប្រឆាំងណាមួយឡើយ ហើយកង្វល់ពាក់ព័ន្ធនឹងការលូកដៃដោយផ្ទាល់ពីសំណាក់យោធាចិនដើម្បីបង្ក្រាបភាពវឹកវរនេះ កំពុងកើនឡើងខ្លាំង។
នៅព្រឹកថ្ងៃចន្ទ ទី១៨ វិច្ឆិកា សំឡេងផ្ទុះខ្លាំងៗជាច្រើន ត្រូវបានគេស្តាប់ឮ មុននឹងអណ្ដាតភ្លើងយ៉ាងសន្ធោរសន្ធៅឆេះនៅមុខទ្វារធំចូលទៅកាន់សកលវិទ្យាល័យ Polytechnic ហុងកុង (PolyU) ។ បើតាមការចុះផ្សាយទីភ្នាក់ងារព័ត៌មាន AFP ដោយពួកគេសង្កេតឃើញថា កម្លាំងប៉ូលិសដែលព្យាយាមសម្រុកចូលទៅក្នុងទីធ្លានៃសកលវិទ្យាល័យនេះ ទទួលរងការរារាំងពីសំណាក់បាតុករ។ ពួកបាតុករហុងកុង បានបាញ់ព្រួញ, គប់គ្រាប់បែកសាំង និងដុំថ្មជាដើម។ ឡានប៉ូលិសមួយគ្រឿង បានឆាបឆេះក្រោយបាតុករគប់ដបសាំងដាក់។
ចំណែកប៉ូលិសវិញ ពួកគេ បានបាញ់កាំភ្លើងគ្រាប់ពិតចំនួន៣គ្រាប់ នៅទីតាំងប្រឈមមុខដាក់គ្នាក្បែរសកលវិទ្យាល័យ។ ក៏ប៉ុន្តែប៉ូលិសអះអាងថា គ្មានបាតុករណាម្នាក់រងរបួសឬស្លាប់ដោយសារការបាញ់គ្រាប់កាំភ្លើងនេះឡើយ។
មែនទែនទៅ ការប៉ះទង្គិចដ៏តានតឹងនេះ អូសបន្លាយតាំងពីថ្ងៃអាទិត្យ ១៧ វិច្ឆិកាមកម្ល៉េះ ដោយមន្ត្រីប៉ូលិសម្នាក់ ត្រូវរបួសត្រង់ជើងដោយសារគ្រាប់ព្រួញដែលបាតុករបាញ់ ខណៈបាតុកររងឧស្ម័នបង្ហូរទឹកភ្នែកនិងកាណូងបាញ់ទឹកពណ៌។ នៅទីនោះ ក្រុមបាតុករ បានប្រើប្រាស់ឆ័ត្រជាខែលការពារភ្លើង និងទឹកពណ៌របស់ប៉ូលិស។ ប៉ូលិសបានប្រកាសការប៉ះទង្គិចនៅទីធ្លាសកលវិទ្យាល័យនេះថាជាទង្វើកុបកម្មដែលពួកបាតុករអាចជាប់ពន្ធនាគាររហូតដល់១០ឆ្នាំ ហើយប៉ូលិសក៏បានចេញមុខ ព្រមានតាមរយៈបណ្តាញសង្គមហ្វេសប៊ុកថែមទៀតផង។
អ្នកនាំពាក្យម្នាក់របស់អាជ្ញាធរហុងកុង លោក Louis Lau និយាយបែបនេះ៖«ខ្ញុំសូមព្រមានដល់ក្រុមកុបកម្មកុំប្រើគ្រាប់បែកសាំង, ព្រួញ, រថយន្ត, ឬអាវុធគ្រោះថ្នាក់ណាមួយដើម្បីវាយប្រហារមន្ត្រីប៉ូលីស។ ប្រសិនបើ ពួកគេនៅតែបន្ត សកម្មភាពគ្រោះបែបនេះតទៅទៀត យើងនឹងគ្មានជម្រើសអ្វីក្រៅពីការប្រើវិធានការចាំបាច់ ក្នុងនោះក៏មាន គ្រាប់កាំភ្លើងពិត ដើម្បីបាញ់ទប់ទល់វិញ»៕