កីឡាអន្តរជាតិ
អន្តរជាតិ
Pacquiao៖ ឆ្នាំ២០២០ ខ្ញុំអាចឡើងសង្វៀននៅខែមីនា ឬមេសា
× Manny Pacquiao សង្ឃឹមថានឹងអាចឡើងសង្វៀនប្រដាល់ជាថ្មីដើម្បីការពារខ្សែក្រវាត់ WBA Welterweight របស់ខ្លួននៅដើមឆ្នាំ ២០២០។ ខណៈមិនទាន់ចេញកាលបរិច្ឆេទប្រកួតច្បាស់លាស់ ស្តេចប្រដាល់អាស៊ីរូបនេះអះអាងថាលោកអាចឡើងវាយបានអំឡុងពេលព្រឹទ្ធសភាហ្វីលីពីនឈប់សម្រាកប៉ុណ្ណោះ។
«ខ្ញុំអាចឡើងប្រកួតបាននៅក្នុងខែមីនា ឬខែមេសា ព្រោះព្រឹទ្ធសភានឹងឈប់សម្រាកក្នុងអំឡុងពេលនោះ»។ នេះជាការបញ្ជាក់របស់ Pacquiao ទៅកាន់កាសែតហ្វីលីពីន Manila Bulletin។ ស្របពេលនោះដែរ ប្រធានចរចាតម្លៃខ្លួន (MP Promotions) របស់ Pacquiao លោក Sean Gibbons ក៏រំពឹងថាអ្នកប្រដាល់ហ្វីលីពីនវ័យ៤០ឆ្នាំ នឹងបង្ហាញខ្លួនលើសង្វៀនអំឡុងពេលពាក់កណ្តាលត្រីមាសទី១ នៃឆ្នាំ២០២០ផងដែរ។
ការលើកឡើងរបស់ Pacquiao ពីពេលវេលាប្រកួតដូច្នេះ ព្រោះមិនចង់ឲ្យប៉ះពាល់ដល់ការងារជាសមាជិកព្រឹទ្ទសភារបស់លោក។ មួយវិញទៀត ការអវត្តន៍មានច្រើនដង ក៏អាចជះឥទ្ធិពលដល់តំណែងរបស់ Pacquiao ក្នុងវិស័យនយោបាយហ្វីលីពីននេះផងដែរ។
ក្នុងឆ្នាំ ២០១៩ កំពូលអ្នកប្រដាល់ហ្វីលីពីនរូបនេះបានឡើងសង្វៀនចំនួនពីរប្រកួត ក្នុងនោះឈ្នះកីឡាករអាមេរិក Adrien Broner ក្នុងខែមករា មុនផ្តួលអ្នកប្រដាល់មិនដែលចាញ់អាមេរិកដូចគ្នា Keith Thurman នៅខែកក្កដា ដោយដណ្តើមបានខ្សែក្រវាត់ពិភពលោក WBA ផង។
សម្រាប់ឆ្នាំ ២០២០ Pacquiao អាចនឹងឡើងសង្វៀនដើម្បីការពារខ្សែក្រវាត់ WBA ជាមួយម្ចាស់ជើងឯក WBC កីឡាករ Errol Spence Jr និងផ្សេងៗទៀតដូចជាកីឡាករ Yordenis Ugas, Shawn Porter, Mikey Garcia និង Danny Garcia ជាដើម។ ហើយកាលបរិច្ឆេទប្រកួត ទំនងជាអាចធ្វើនៅថ្ងៃទី១១ ខែមេសា៕
Tag:
Manny Pacquiao
Boxer
© រក្សាសិទ្ធិដោយ thmeythmey.com