កីឡាជាតិ
ជាតិ
អត្តពលិកជាង៤០០នាក់មកពី៥០ប្រទេស ប្រជែងគ្នាក្នុងព្រឹត្តិការណ៍ប៉េតង់ពិភពលោក នៅកម្ពុជា
កីឡាការិនី កែ ឡេង និង អ៊ុក ស្រីមុំ (រាប់ពីស្តាំ)ពេលទទួលបានមេដាយមាសពិភពលោកកាលពីពេលកន្លងទៅ
×![]()
នៅសល់តែមួយថ្ងៃទៀតប៉ុណ្ណោះ ការប្រកួតកីឡាប៉េតង់ជ្រើសរើសជើងឯកពិភពលោកស្ត្រី និងយុវជន 17th Juniors & Women Petanque World Championship ដែលកម្ពុជាធ្វើម្ចាស់ផ្ទះ ឈានមកដល់ ។ ការប្រកួតនេះ មានអត្តលិកជាង៤៤០នាក់ មកពី៥០ប្រទេសចូលរួម (បូកទាំងកម្ពុជា)។ វីរកីឡាការិនី កែ ឡេង និង អ៊ុក ស្រីមុំ នឹងត្រូវការពារតំណែងជើងឯក។ ក្រៅពីផ្តល់ឱកាសឲ្យយុវជនបានបង្ហាញសមត្ថភាព ការដកស្រង់បច្ចេកទេសរៀបចំ និងផ្សព្វផ្សាយពីវប្បធម៌ខ្មែរ ក៏ស្ថិតក្នុងគោលបំណង នៃការធ្វើម្ចាស់ផ្ទះលើកដំបូងនេះដែរ។
កីឡាករកីឡាការិនីកម្ពុជា ត្រូវប្រជែងជាមួយអត្តពលិកមកពី៤៩ប្រទេស ដើម្បីដណ្តើមមេដាយក្នុងព្រឹត្តិការណ៍ប្រកួតកីឡាប៉េតង់ ជ្រើសរើសជើងឯកពិភពលោកស្ត្រី និងយុវជន ដែលកម្ពុជាធ្វើជាម្ចាស់ផ្ទះលើកដំបូង។ ការប្រកួត នឹងប្រព្រឹត្តទៅចាប់ពីថ្ងៃទី ១៩-២៣ ខែវិច្ឆិកា ឆ្នាំ២០១៩ នៅទីលានប៉េតង់ ក្នុងពហុកីឡដ្ឋានជាតិ។ ដើម្បីត្រៀមទទួលប្រតិភូកីឡាអន្តរជាតិ ថ្នាក់ដឹកនាំសហព័ន្ធកីឡា ប៊ូល និងប៉េតង់កម្ពុជា បានជួលជុលកែលម្អ និងសាងសង់ហេដ្ឋារចនាសម្ព័ន្ធមួយចំនួនដូចជា ដំបូលទីលាន ទីលានប្រកួត និងបំពាក់កៅអីអង្គុយសម្រាប់ទស្សនិកជនជាដើម។
លោក ស សុខា ប្រធានសហព័ន្ធកីឡាប៊ូលនិងប៉េតង់កម្ពុជា ចាត់ទុកព្រឹត្តិការណ៍នេះ គឺជាឱកាសផ្សារភ្ជាប់ទំនាក់ទំនង រវាងអត្តពលិកជាតិ និងអន្តរជាតិ និងបង្ហាញពិភពលោក ឲ្យឃើញពីសមត្ថភាពក្នុងការរៀបចំរបស់កម្ពុជា។ លើសពីនេះ គឺដើម្បីផ្សព្វផ្សាយពីអរិយធម៌ និងវប្បធម៌ខ្មែរ ទៅកាន់ពិភពលោក តាមរយៈប្រព័ន្ធផ្សព្វផ្សាយអន្តរជាតិ និងប្រតិភូ កីឡាករកីឡាការិនី ដែលចូលរួមក្នុងព្រឹត្តិការណ៍នេះ។
ការផ្តល់ឱកាសឲ្យយុវជនបានកសាងបទពិសោធន៍ និងពង្រឹងសមត្ថភាពកីឡាករកីឡាការិនី និង មន្ត្រីបច្ចេកទេស អាជ្ញាកណ្តាលចៅក្រម ដើម្បីឈានឆ្ពោះ ទៅធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ក៏ស្ថិតក្នុងគោលបំណងនៃព្រឹត្តិការណ៍នេះផងដែរ ។
ជាមួយគ្នានេះ រដ្ឋលេខាធិការក្រសួងអប់រំ យុវជន និងកីឡារូបនេះ ជំរុញឲ្យកីឡាករខិតខំប្រឹងប្រែងប្រកួតឲ្យអស់ពីសមត្ថភាពក្នុងការស្វែងរកមេដាយជូនជាតិមាតុភូមិ ដើម្បីលើកមុខមាត់ខ្លួនឯង និងប្រទេសជាតិ។ ជាពិសេស គឺដើម្បីលើកស្ទួយវិស័យកីឡាប៉េតង់កម្ពុជា ទៅកាន់ពិភពលោក។
បើតាមលោក សុខ សប្បាយណា អគ្គលេខាធិការសហព័ន្ធកីឡាប៊ូលនិងប៉េតង់កម្ពុជា ការប្រកួតនេះមានអត្តពលិកចំនួន៤៤៩នាក់មកពី៥០ប្រទេស(បូកទាំងកម្ពុជា)ចូលរួម ក្នុងនោះយុវជនមាន៣០ក្រុម និងស្ត្រី៥០ក្រុម។ អត្តពលិកទាំងនេះប្រកួតប្រជែងលើ៦វិញ្ញាសា។
វីរកីឡាការិនី កែ ឡេង ម្ចាស់មេដាយមាស៣ជំនាន់ និងកីឡាការិនី អ៊ុក ស្រីមុំ ម្ចាស់មេដាយមាសពិភពលោក នៅប្រទេសបែលហ្ស៊ិកកាលពីឆ្នាំ២០១៧ នឹងត្រូវការពារតំណែងជើងឯកខ្លួនក្នុងព្រឹត្តិការណ៍នេះផងដែរ៕
Tag:
ប៉េតង់
ជើងឯកពិភពលោក
© រក្សាសិទ្ធិដោយ thmeythmey.com
