៥ចំណុច ដែលព្រឹត្តិការណ៍ ONE: AGE OF DRAGONS នៅចិនលេចធ្លោ

ONE Championship

កីឡាជាតិ

ជាតិ

៥ចំណុច ដែលព្រឹត្តិការណ៍ ONE: AGE OF DRAGONS នៅចិនលេចធ្លោ

18, Nov 2019 , 10:59 pm

រូបភាព

អត្ថបទ៖ ស៊ីធី

ONE Championship បានរៀបចំព្រឹត្តិការណ៍យ៉ាងរំភើបមុនដាច់ឆ្នាំ ២០១៩ ដែលមានឈ្មោះថា ONE: AGE OF DRAGONS នៅទីក្រុងប៉េកាំងប្រទេសចិនកាលថ្ងៃទី ១៦ ខែ វិច្ឆិកា កន្លងទៅ។ ក្នុងនោះមានលទ្ធផលជាច្រើននៅក្រុងប៉េកាំង ពិតជាធ្វើឲ្យអ្នកគាំទ្រមិននឹកស្មានដល់។ ខាងក្រោមនេះជាហេតុផលចំនួន ៥ ដែលមិនអាចបំភ្លេចបាន និង ជាការប្រកួតដ៏អស្ចារ្យកាលសប្ដាហ៍មុននៅសង្វៀន Cadillac Arena ប្រទេសចិន។

#1 Ennahachi នៅតែជាកីឡាករលេខ១

Elias Ennahachi ឬ មានឈ្មោះក្រៅថា “Tweety” ការពារខ្សែក្រវាត់របស់ខ្លួន ONE Flyweight Kickboxing World Championship បានសម្រេចក្រោយដណ្ដើមបានកាលខែសីហា ប៉ុន្តែសំណួរមួយសួរថាតើរូបគេអាចក្លាយជាកីឡាករលេខ១ក្នុងលោកឬទេ។ អ្នកគាំទ្រនៅប្រទេសចិនមិនទាន់អស់ចិត្តចំពោះកីឡាករម្ចាស់ខ្សែក្រវាត់ KLF World Champion, Wang Wenfeng ឬ “Metal Storm” ដែលធ្លាប់ឈ្នះពិន្ទុ Tweety កាលឆ្នាំ ២០១៧ បែរចាញ់ពិន្ទុមិនឯកច្ឆន្ទទៅវិញ។ ពួកគេទាំងពីរបានធ្វើឲ្យការប្រកួតកក្រើកនៅលើសង្វៀន ហើយសក្ដិសមជាកីឡាករដែលអាចប្រកួតប្រជែងក្នុងកម្មវិធីធំៗ។ យ៉ាងណាក្ដី Ennahachi បានបង្ហាញឲ្យឃើញថារូបគេសមជាកីឡាករល្អនៅក្នុងលោក។ ទោះជា Wang ព្យាយាមបម្លាស់ទីគាបសង្កត់ កីឡាករចិនវ័យ ២៣ឆ្នាំបានចេញកណ្ដាប់ដៃនិងជើងជាច្រើនរួមគ្នាក្នុងនាមជាកីឡាករម្ចាស់ផ្ទះដើម្បីដណ្ដើមខ្សែក្រវាត់។ តាមរយៈការប្រកួត ៥ ទឹកពេញ Ennahachi បានប្រើក្បាច់កណ្ដាប់ដៃយ៉ាងអស្ចារ្យជាពិសេសការប្រកួតប្រកបដោយភាពវៃឆ្លាតនិងការទាត់ចំកលើកីឡាករចិនជារឿយៗដែលសក្ដិសមជាម្ចាស់ជើងឯក។

#2 Kryklia បង្ហាញភាពខ្លាំងឡើងវិញ

កីឡាករគីឡូធ្ងន់អ៊ុយក្រែន Roman Kryklia ធ្លាប់ជួប Tarik Khbabez កាលឆ្នាំ ២០១៥ ប៉ុន្តែរូបគេចាញ់ការប្រកួតនាគ្រានោះ ស្របពេលកូនកាត់ហូឡង់-ម៉ារ៉ុក ឈ្នះខ្សែក្រវាត់ SUPERKOMBAT World Grand Prix Title។ ៤ឆ្នាំក្រោយមក កីឡាករទាំងពីរជួបគ្នាជាថ្មីដើម្បី ONE Light Heavyweight Kickboxing World Championship ហើយម្ចាស់ខ្សែក្រវាត់ KLF World Champion បង្ហាញភាពខ្លាំងស្ទើរមិនគួរឲ្យជឿដោយបញ្ចប់គូបដិបក្ខ ត្រឹមទឹកទី២។ Khbabez ព្យាយាមប្រើកណ្ដាប់ដៃដើម្បីប៉ងផ្ដួល Kryklia ប៉ុន្តែបែរជារងគ្រោះទៅវិញ។ ការទាត់ចំក្បាលលើកដំបូង និងការម៉ាត់ជាច្រើនដៃរបស់ Kryklia បានបញ្ចប់ក្ដីសង្ឃឹមរបស់ Khbabez។ វាបានបង្ហាញឲ្យឃើញថា Kryklia បានរៀនសូត្រអំពីបទពិសោធន៍បរាជ័យកន្លងមកដើម្បីទទួលបានជ័យជម្នះជាប្រវត្តិសាស្ត្រនៅសង្វៀន ONE Championship។

#3 មិនគួរជឿសម្រាប់ការប្រកួត ONE Super Series

វាពិតជាមិនគួរឲ្យជឿទាល់តែសោះសម្រាប់ពីរគូនៃការប្រកួត ONE Super Series នៅ ONE: AGE OF DRAGONS។ អ្នកគាំទ្រជាច្រើនបានដាក់ការទុកចិត្តលើ Yodsanklai IWE Fairtex ឬ “The Boxing Computer” និង Jorina Baars។ អ្នកទាំងពីរគឺជាវីរបុរសនៃក្បាច់គុនមួយថៃក្នុងលោក និង kickboxing ប៉ុន្តែបែរជាទទួលបរាជ័យសឹងមិនគួរឲ្យជឿក្នុងប្រវត្តិសាស្ត្ររបស់ONE។ Yodsanklai មិនចាញ់បែបនេះរយៈពេល ១០ឆ្នាំមកហើយ ប៉ុន្តែត្រូវសន្លប់ក្រោមកណ្ដាប់ដៃរបស់ Jamal Yusupov យ៉ាងស្រឡាំងកាំងដល់អ្នកគាំទ្រ។ កីឡាកររុស្សីដែលមានមូលដ្ឋាននៅប៉េកាំង បានផ្ដួលវីរបុរសថៃត្រឹមទឹកទី២ដោយសារកណ្ដាប់ដៃឆ្វេងស្ដាំ។ កីឡាការិនី Christina Breuer តែងតែចេញអាវុធប្រយោលលើដើម្បីបញ្ចប់ Baars។ នេះជាការចាញ់យ៉ាងឈឺចាប់របស់ Baars លើកដំបូង។ ព្រឹត្តិការណ៍នេះបង្ហាញឲ្យឃើញថាកីឡាករ-កីឡាការនីដែលមានកេរ្តិ៍ឈ្មោះលំដាប់ពិភពលោកបែរទទួលលទ្ធផលមិនសមប្រកបដូចគ្នា។

#4 Phogat មានដុងពិសេសខាងក្បាច់គុនចម្រុះ

កីឡាការិនីចំបាប់ឥណ្ឌា Ritu Phogat ឬ ហៅថា “The Indian Tigress” បានប្រឡូកសង្វៀនគុនចម្រុះលើកដំបូងប្រកបដោយទំនុកចិត្ត និង បញ្ចេញក្បាច់ធ្វើចលនាដើម្បីផ្ដួលគូប្រកួតបានយ៉ាងល្អ។ Phogat រីករាយចំពោះការបង្ហាញខ្លួនលើកដំបូងនៅប៉េកាំង បន្ទាប់ពីឈ្នះ កីឡាការិនីកូរ៉េខាងត្បូង Nam Hee Kim ដើម្បីទទួលបានកំណត់ត្រាល្អក្នុងអាជីព។ ដ្បិតតែប្រកួតលើកដំបូង ប៉ុន្តែ Phogat បង្ហាញជំនាញយ៉ាងពិសេសដើម្បីគ្រប់គ្រងលើគូប្រកួត និង ប្រើក្បាច់ប្រកួតនៅលើក្ដារេញបានយ៉ាងល្អពេលផ្ដួលដៃគូមកពីកូរ៉េឲ្យសន្លប់។ Phogat ត្រូវបានគេចាត់ជាកីឡាការិនីមានសក្ដានុពលម្នាក់ក្នុងក្បាច់គុនចម្រុះ។ កីឡាការិនីវ័យ២៥ឆ្នាំរូបនេះមានក្រុមការងារយ៉ាងល្អនៅក្លិប Evolve នាប្រទេសសិង្ហបុរី ដែលតែងតែនៅពីក្រោយរូបគេហើយគេអាចនឹងរះចិញ្ចែងចិញ្ចាចទៅថ្ងៃអនាគត។

#5 Saadulaev មើលទៅមិនមាននរណាអាចបញ្ឈប់បានក្នុងទម្ងន់ Bantamweight

Yusup Saadulaev ឬ មានឈ្មោះក្រៅ “Maestro” បានឡើងរប្រកួតយ៉ាងទាញនៅពេលរូបគេ ឈ្នះកីឡាករជប៉ុន Daichi Takenaka ដើម្បីរុញច្រានឲ្យរូបគេកាន់តែខិតជិតទៅដណ្ដើមខ្សែក្រវាត់ ONE Bantamweight World Title។ កីឡាកររុស្សីឈ្នះពិន្ទុមិនឯកច្ឆន្ទលើកីឡាករជប៉ុន ហើយនេះបញ្ជាក់ថារូបគេកាន់តែខ្លាំងឡើងៗក្នុងប្រភេទទម្ងន់នេះ។ Yusup គ្រប់គ្រងការប្រកួតបានល្អទោះមានបញ្ហាឈឺដៃក្នុងការប្រកួតទឹកដំបូងក្ដី។ ដោយមានការតាំងចិត្ត និង មានក្បាច់ចាប់ល្អផងនោះ Yusup អាចជម្នះឧបសគ្គបាន។ កីឡាករវ័យ ៣៤ ឆ្នាំរូបនេះគឺជាការគំរាមខ្ពស់ដល់កីឡាករក្នុងប្រភេទគីឡូដូច្នា។ បន្ទាប់ពីជ័យជម្នះ កីឡាករមកពីរុស្សី អាចនឹងជួបគូប្រជែងមានសក្ដានុពល Bibiano Fernandes ឬ “The Flash” នៅពេលរូបគេសះស្បើយពីរបួស ១០០%៕

កម្មវិធីបន្ទាប់ សូមកុំភ្លេចទស្សនាកម្មវិធីប្រកួតបន្ទាប់នៅ ONE: AGE OF GREATNESS នៅថ្ងៃទី ២២ ខែ វិច្ឆិកា ខាងមុខ ពីសិង្ហបុរីចាប់ពីម៉ោង ៦:៣០ ល្ងាចតទៅ (ម៉ោងកម្ពុជា) តាមរយៈ Facebook, Twitter, YouTube, ONE Super App, និង ផ្សាយបន្តផ្ទាល់ដោយ CBS៕