អន្តរជាតិ
ក្រោយលោក ត្រាំ ហៅជួបគ្នាឡើងវិញ កូរ៉េខាងជើងប្រាប់វិញថា ខ្លួនមិនចូលតុចរចាអត់ប្រយោជន៍ទេ
មេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមេរិក ដូណាល់ ត្រាំ នាជំនួបកន្លងមក។ រូបថត Xinhua
×![]()
ដោយ: តន ចាន់រិទ្ធារ៉ា
កូរ៉េខាងជើង ហាក់កំពុងបំបាក់មុខប្រធានាធិបតីអាមេរិក ដូណាល់ ត្រាំ តាមរយៈការមិនឆ្លើយតបជាវិជ្ជមានទៅនឹងសំណើលោក ត្រាំ ដែលចង់ឲ្យមានជំនួបមេដឹកនាំដើម្បីបន្តដោះស្រាយបញ្ហានុយក្លេអ៊ែរ។ មន្ត្រីទីក្រុងព្យុងយ៉ាង និយាយថា កូរ៉េខាងជើង នឹងចូលតុចរចាដែលគ្មានអ្វីត្រឡប់មកវិញឡើយ ហើយអាមេរិកគួរតែលុបចោលសមយុទ្ធយោធាជាមួយកូរ៉េខាងត្បូង ដើម្បីបញ្ជាក់ចិត្តស្មោះសររបស់ខ្លួន និងត្រូវដាក់ចេញយុទ្ធសាស្ត្រថ្មីដើម្បីចរចា។
សំណើជួបគ្នាម្ដងទៀតតាម Twitter របស់ប្រធានាធិបតីអាមេរិក ដូណាល់ ត្រាំ ទៅកាន់មេដឹកនាំកូរ៉េខាងជើង គីម ជុងអ៊ុន ត្រូវបានក្រុមមន្ត្រីកូរ៉េខាងជើងចេញមុខបដិសេធ។ នៅលើគណនី Twitter របស់ខ្លួននៅថ្ងៃទី១៧ ខែវិច្ឆិកា លោក ត្រាំ បានប្រាប់លោក គីម ឲ្យប្រឹងសម្រេចកិច្ចព្រមព្រៀងរំសាយនុយក្លេអ៊ែរជាមួយលោកឲ្យបានឆាប់ ហើយលោកក៏ត្រៀមជួបមេដឹកនាំកូរ៉េខាងជើងក្នុងជំនួបលើកទីបួនឆាប់ៗផងដែរ។
កូរ៉េខាងជើង មិនចាប់អារម្មណ៍ជំនួបកំពូលដែលមិនមានប្រយោជន៍ឡើយ។ នេះជាការលើកឡើងរបស់លោក Kim Kye Gwan ទីប្រឹក្សាក្រសួងការបរទេសកូរ៉េខាងជើងនៅថ្ងៃទី១៨ ខែវិច្ឆិកា តបនឹងសំណើរបស់លោក ត្រាំ ។ បើតាមសេចក្ដីថ្លែងការណ៍ផ្សាយដោយទីភ្នាក់ងារព័ត៌មានរដ្ឋកូរ៉េខាងជើង KNCA មន្ត្រីដដែលនេះ បានប្រាប់ឲ្យអាមេរិកដកគោលនយោបាយបង្កអរិភាពរបស់ខ្លួនដែលចាត់ទុកកូរ៉េខាងជើងជាសត្រូវ បើអាមេរិកមិនចង់ឲ្យការចរចាជាមួយកូរ៉េខាងជើងទៅណាឆ្ងាយទេនោះ។
ការនិយាយរិះគន់ដោយផ្ទាល់លើលោក ត្រាំ បែបនេះ ត្រូវបានមើលឃើញថា ជាការងាកចេញពីជំហរចាស់របស់ព្យុងយ៉ាងដែលតែងតែថ្នាក់ថ្នមទំនាក់ទំនងរវាងមេដឹកនាំកំពូលៗនោះ។ កាលពីខែតុលាកន្លងទៅ លោក Kim នេះតែម្ដង ទើបបានសរសើរលោក ត្រាំ ថា ជាមេដឹកនាំអាមេរិកល្អជាងមន្ត្រីរដ្ឋបាលរបស់លោក ដែលមានជំហរអាក្រក់ដាក់កូរ៉េខាងជើង។ ក្នុងខែកញ្ញាឯណោះ មន្ត្រីរូបនេះថែមទាំហៅលោក ត្រាំ ជាប្រធានាធិបតីល្អជាងប្រធានាធិបតីមុនៗទៅទៀត។
មួយថ្ងៃបន្ទាប់ លោក គីម យ៉ុងឈុល អតីតប្រមុខដឹកនាំចរចាកូរ៉េខាងជើង ក៏ដាក់លក្ខខណ្ឌមួយជាន់ទៀតឲ្យអាមេរិក។ បើតាម KCNA លោក គីម ដែលបច្ចុប្បន្នជាអនុប្រធានគណៈកម្មាធិការមជ្ឈិមបក្សពលករកូរ៉េ បានទាមទារឲ្យអាមេរិកបញ្ឈប់សមយុទ្ធយោធាជាមួយកូរ៉េខាងត្បូងតែម្ដង មិនមែនពន្យារពេលឡើយ។ លោក គីម ដាក់ការទាមទារបែបនេះ បន្ទាប់អាមេរិក និងកូរ៉េខាងត្បូងសម្រេចចិត្តលើកពេលធ្វើសមយុទ្ធអាកាសដើម្បីផ្ដល់ឱកាសដល់ការចរចា។
«ការលើកពេលធ្វើសមយុទ្ធ មិនបានធានាពីសន្តិភាព និងសន្តិសុខនៅឧបទ្វីបកូរ៉េឡើយ ហើយក៏មិនបានជួយដល់ការចរចាផ្នែកការទូតដើម្បីដោះស្រាយបញ្ហាដែរ។» នេះជាការបញ្ជាក់របស់លោក គីម ដែលត្រូវបានប្រមុខដឹកនាំកូរ៉េខាងជើងដកតំណែងក្រោយការចរចានៅវៀតណាមបរាជ័យ។
មួយរយៈពេលចុងក្រោយនេះ កូរ៉េខាងជើង បានដាក់សម្ពាធកាន់តែខ្លាំងលើអាមេរិកឲ្យដាក់ចេញយុទ្ធសាស្ត្រចរចាថ្មី។ លោក គីម ជុងអ៊ុន បានទុកពេលឲ្យអាមេរិកត្រឹមចុងឆ្នាំ២០១៩ នេះប៉ុណ្ណោះក្នុងការយកសំណើថ្មីដាក់លើតុចរចាមុននឹងកូរ៉េខាងជើងដើរលើផ្លូវផ្សេង៕
Tag:
អាមេរិក
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com
