មេធាវី ព្យាយាមពន្យល់ផ្លូវច្បាប់ ដើម្បីឲ្យទម្លាក់បទចោទពីលោក កឹម សុខា

ជាតិ

នយោបាយជាតិ

មេធាវី ព្យាយាមពន្យល់ផ្លូវច្បាប់ ដើម្បីឲ្យទម្លាក់បទចោទពីលោក កឹម សុខា

19, Nov 2019 , 11:00 am

រូបភាព

ពីឆ្វេងទៅស្តាំ៖ លោកមេធាវី ផាន់ ច័ន្ទសាក់, អ្នកស្រីមេធាវី ម៉េង សុភារី, អ្នកស្រី តែ ច័ន្ទមនោ (ភរិយាលោក កឹម សុខា), លោក កឹម សុខា ប្រធាននៃអតីតគណបក្សសង្គ្រោះជាតិ, លោកមេធាវី ផែង ហេង, និង លោកមេធាវី ចាន់ ចេង ជួបគ្នាកាលពីចុងខែកុម្ភៈ ឆ្នាំ២០១៩។ រូបពីគណនីហ្វេសប៊ុក Chantha Muth

ដោយ: ថ្មីៗ

សហមេធាវី បានដាក់សំណើទៅលោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ សុំឲ្យទម្លាក់បទចោទសន្ទិដ្ឋិភាពចេញពីលោក កឹម សុខា ប្រធានអតីតគណបក្សសង្គ្រោះជាតិ ដើម្បីឲ្យលោក មានសិទ្ធិសេរីភាពពេញលេញឡើងវិញ។

ក្នុងសំណើដែលចុះនៅថ្ងៃទី១៨ ខែវិច្ឆិកា ឆ្នាំ២០១៩ សហមេធាវី បានលើកឡើងពីអង្គហេតុផង និងអង្គច្បាប់ផង ដើម្បីបញ្ជាក់ថាលោក កឹម សុខា ដែលជាកូនក្តីរបស់ពួកគេ មិនបានប្រព្រឹត្តបទល្មើសនោះទេ។ សហមេធាវី ក៏បានលើកឡើងដែរថា ការដោះលែងលោក កឹម សុខា គឺនាំឲ្យមានផលប្រយោជន៍ដល់ប្រទេសជាតិ។

សហមេធាវី លើកហេតុផលថា ការស៊ើបសួរលើសំណុំរឿងរបស់លោក កឹម សុខា គឺមានរយៈពេលដល់ទៅ២ឆ្នាំ មុននឹងបិទបញ្ចប់ ដោយគ្មានរកឃើញជនបរទេស ឬអ្នកសមគំនិតណាផ្សេង ដែលពាក់ព័ន្ធនឹងសំណុំរឿងឡើយ។ សហមេធាវី បន្តថា ការស៊ើបសួរនេះ គឺលើសពីនីតិវិធីក្រមព្រហ្មទណ្ឌត្រង់មាត្រា២០៨ ដែលចែងថា ការស៊ើបសួរ ត្រូវប្រើពេលយ៉ាងយូរត្រឹម១៨ខែប៉ុណ្ណោះ។

សហមេធាវី ទាញមាត្រា៣៨នៃរដ្ឋធម្មនុញ្ញ មកសំអាងថា វិមតិសង្ស័យ ត្រូវបានជាប្រយោជន៍ដល់ជនជាប់ចោទ និង បានទាញមាត្រា៤នៃក្រមព្រហ្មទណ្ឌ មកធ្វើជាសំអាងបន្ថែមថា ពុំមានបទល្មើសទេ បើគ្មានចេតនាប្រព្រឹត្ត។ វិមតិសង្ស័យ សំដៅថា ការសង្ស័យលើជនណាម្នាក់ ដោយមិនដាច់ស្រេច មានន័យថា មិនដឹងច្បាស់ ឬមិនមានភស្តុតាងច្បាស់ថាជននោះ ប្រព្រឹត្តបទល្មើស ឬមិនប្រព្រឹត្ត។

សហមេធាវី បានបរិយាយទៀតថា បុគ្គលណាម្នាក់ អាចមានបទល្មើស លុះត្រាតែមានធាតុផ្សំ៣យ៉ាង គឺ អង្គហេតុ (ប្រព្រឹត្តបទល្មើស) អង្គច្បាប់ (បទល្មើស ដែលមានចែងក្នុងច្បាប់) និង ចេតនាក្នុងការប្រព្រឹត្តបទល្មើស។ សហមេធាវី អះអាងថា លោក កឹម សុខា នៅខ្វះធាតុផ្សំ២ គឺលោក មិនបានប្រព្រឹត្តបទល្មើស និង គ្មានចេតនាក្នុងការប្រព្រឹត្ត។

សហមេធាវី សង្កត់ធ្ងន់ដូច្នេះថា៖«តាមក្រមនីតិវិធីព្រហ្មទណ្ឌ គឺចៅក្រមស៊ើបសួរ អាចសម្រេចលើកលែងការចោទប្រកាន់ដោយឯកឯង»។

ក្រៅពីលើកឡើងពីអង្គច្បាប់និងអង្គហេតុ សហមេធាវី នៅរៀបរាប់ទៀតថា លោក កឹម សុខា តែងគិតប្រយោជន៍ជាតិ និងប្រជាពលរដ្ឋជាធំ និងយកចិត្តទុកដាក់លើការងារអភិវឌ្ឍជាតិ ហើយតែងប្រកាន់ភ្ជាប់នូវគោលការណ៍អហិង្សា នីតិរដ្ឋ ប្រជាធិបតេយ្យ និង រដ្ឋធម្មនុញ្ញ។

សហមេធាវី រំលេចពីផលប្រយោជន៍បែបនេះថា៖«ការលើកលែងការចោទប្រកាន់ឯកឧត្តម កឹម សុខា ឲ្យមានសេរីភាពពេញលេញឡើងវិញ គឺជាការចូលរួមចំណែកក្នុងការបង្រួបបង្រួមជាតិ ផ្សះផ្សាជាតិ និង ផ្តល់ឱកាសឲ្យអ្នកនយោបាយជជែកគ្នា ដើម្បីប្រយោជន៍ជាតិ និង កិត្តិយសរវាងខ្មែរនិងខ្មែរផងដែរ»។

សហមេធាវី រម្លឹកថា ប្រសាសន៍របស់លោក កឹម សុខា ដែលថ្លែងក្នុងពិធីជួបសំណេះសំណាលជាមួយអ្នកគាំទ្រក្នុងប្រទេសអូស្ត្រាលី កាលពី៥-៦ឆ្នាំមុន គឺគ្មានចេតនាប្រព្រឹត្តហិង្សា ឬបទសន្ទិដ្ឋិភាពជាមួយបរទេសនោះទេ។ សហមេធាវី បកស្រាយថា ក្នុងពិធីនោះ លោក កឹម សុខា គ្រាន់តែចង់បង្ហាញពីការវិវត្តនយោបាយនៅស្រុកខ្មែរ និងជំហររបស់អតីតគណបក្សសង្គ្រោះជាតិប៉ុណ្ណោះ។

សមត្ថកិច្ចនិងតុលាការ ពឹងផ្អែកលើវីដេអូឃ្លីបមួយ ដែលលោក កឹម សុខា បានថ្លែងសារនយោបាយទៅកាន់អ្នកគាំទ្រនៅអូស្ត្រាលី តាំងពីឆ្នាំ២០១៣មកម្ល៉េះ។ ក្នុងវីដេអូឃ្លីបនោះ លោក កឹម សុខា ប្រាប់អ្នកគាំទ្រថា លោក មានអ្នកជំនាញដែលជាជនបរទេសនៅពីក្រោយ ដើម្បីជ្រោមជ្រែងក្នុងការផ្លាស់ប្តូររដ្ឋាភិបាលកម្ពុជា។

ក្រោយវីដេអូឃ្លីបនោះ បានបែកធ្លាយលើបណ្តាញសង្គមហ្វេសប៊ុក សមត្ថកិច្ច ក៏បាននាំគ្នាចុះទៅចាប់លោក កឹម សុខា ដល់គេហដ្ឋានតែម្តង កាលពីថ្ងៃទី២រំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ ហើយក៏ដឹកលោក យកទៅឃុំនៅពន្ធនាគារត្រពាំងផ្លុងខេត្តត្បូងឃ្មុំ ក្រោមបទចោទសន្ទិដ្ឋិភាពជាមួយបរទេស ដែលសំដៅថា លោក លួចទៅគប់គិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា។

ជាប់ឃុំបាន១ឆ្នាំ ចៅក្រមស៊ើបសួរ បានអនុញ្ញាតឲ្យលោក កឹម សុខា នៅក្រៅឃុំបណ្តោះអាសន្ន និងអនុញ្ញាតឲ្យលោក ត្រឡប់ទៅរស់នៅក្នុងគេហដ្ឋាជាមួយគ្រួសារវិញ កាលពីថ្ងៃទី១០ ខែកញ្ញា ឆ្នាំ២០១៨។ តែកាលនោះ ចៅក្រមស៊ើបសួរ បានដាក់បម្រាមយ៉ាងតឹងរ៉ឹងចំពោះលោក រួមមាន មិនឲ្យចេញទៅណាឆ្ងាយពីផ្ទះ មិនឲ្យជួបថ្នាក់ដឹកនាំអតីតគណបក្សប្រឆាំង មិនឲ្យជួបជនបរទេស មិនឲ្យចេញទៅក្រៅប្រទេស និង មិនឲ្យធ្វើសកម្មភាពនយោបាយ។

កាលពីថ្ងៃទី១០ ខែវិច្ឆិកា ឆ្នាំ២០១៩ ចៅក្រមស៊ើបសួរ សម្រេចលុបបម្រាមមួយចំនួនចេញពីលោក កឹម សុខា គឺ បម្រាមមិនឲ្យចេញទៅណាឆ្ងាយពីផ្ទះ បម្រាមមិនឲ្យជួបថ្នាក់ដឹកនាំអតីតគណបក្សប្រឆាំង និង បម្រាមមិនឲ្យជួបជនបរទេស។ បម្រាមផ្សេងទៀត ច្រៅក្រមស៊ើបសួរ នៅរក្សាទុកដដែល។

រហូតដល់ថ្ងៃទី១៥ ខែវិច្ឆិកា ឆ្នាំ២០១៩ ចៅក្រមស៊ើបសួរ សម្រេចបិទការស៊ើបសួរលើលោក កឹម សុខា ក្រោយប្រើរយៈពេលអស់២ឆ្នាំ។ ជានីតិវិធី ចៅក្រមស៊ើបសួរ នឹងចេញដីកាដំណោះស្រាយ ដើម្បីសម្រេចថា បញ្ជូនសំណុំរឿងរបស់លោក កឹម សុខា ទៅជំនុំជម្រះ ឬក៏ទម្លាក់បទចោទ។ មជ្ឈដ្ឋាននានា កំពុងទន្ទឹងរង់ចាំមើលដីកាដំណោះស្រាយ របស់ចៅក្រមស៊ើបសួរ។

យ៉ាងណា សំណុំរឿងរបស់លោក កឹម សុខា ទំនងជានឹងត្រូវបញ្ជូនទៅជំនុំជម្រះ។ នេះបើតាមការលើកឡើងរបស់សម្តេចនាយករដ្ឋមន្ត្រី ហ៊ុន សែន។ ក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យធនធានមនុស្ស កាលពីព្រឹកថ្ងៃទី១៨ ខែវិច្ឆិកា ឆ្នាំ២០១៩ ប្រធានគណបក្សកាន់អំណាច ថ្លែងដូច្នេះថា៖«...គេគ្រាន់តែបិទការស៊ើបអង្កេតលើសំណុំរឿងប៉ុណ្ណោះ ដើម្បីបញ្ជូនទៅជម្រះ តែរឿងជម្រះ ជារឿងតុលាការ យើងអត់មានសិទ្ធិទៅជ្រៀតជ្រែកគេទេ»៕

អត្ថបទទាក់ទង

សម្តេច ហ៊ុន សែន សន្និដ្ឋានមុនតុលាការថា សំណុំរឿងលោក កឹម សុខា នឹងត្រូវបញ្ជូនទៅកាត់ក្តី

លោក កឹម សុខា មានសិទ្ធិកម្រិតណា?