បាតុករ​ហុងកុង​រត់គេច​ពី​ការឡោមព័ទ្ធ​នៅ​សកល​វិទ្យាល័យ ក្រោយ​ចិន​ព្រមាន​ប្រើ​យោធា​
អន្តរជាតិ
បាតុករ​ហុងកុង​រត់គេច​ពី​ការឡោមព័ទ្ធ​នៅ​សកល​វិទ្យាល័យ ក្រោយ​ចិន​ព្រមាន​ប្រើ​យោធា​
19, Nov 2019 , 11:41 am        
រូបភាព
​បាតុករ​ហុងកុង​រាប់សិប​នាក់ បាននាំគ្នា​រត់គេច​ពី​ការហ៊ុមព័ទ្ធ​ពី​សំណាក់​ប៉ូលិស​ហុងកុង​រយៈពេល​២​ថ្ងៃ នៅឯ​បរិវេណ​សកលវិទ្យា​ល័យ​មួយ ។ សកម្មភាព​នេះ​បាន​កើតឡើង​កាលពី​យប់​ថ្ងៃ​ចន្ទ ១៨​វិច្ឆិកា ដោយ​ពួក​បាតុករ​តោង​ខ្សែពួរ​ទម្លាក់ខ្លួន​ចុះមក​ក្រោមពីលើ​ស្ពាន​ឆ្ពោះទៅរក​ម៉ូតូ​ជាច្រើន​ដែល​កំពុង​រង់ចាំ​ដឹក​ពួកគេ​។ ការភិតភ័យ​ដល់​ថ្នាក់​រត់គេច​បែបនេះ កើតឡើង​ក្រោយពី​រដ្ឋាភិបាល​ក្រុង​ប៉េកាំង​ចេញមុខ​ព្រមាន​ជាថ្មី​ថា ខ្លួន​អាចធ្វើ​អន្តរាគមន៍​យោធា​ដើម្បី​បិទ​បញ្ចប់​វិបត្តិ​ដែល​កំពុង​ញាំញី​ទីក្រុង​នេះ​។

 
​ការប៉ះទង្គិច​យ៉ាង​ហិង្សា បានអូសបន្លាយ​រហូត​ដល់​ព្រលឹម​ថ្ងៃទី​១៩ ខែវិច្ឆិកា​រវាង​ក្រុមបាតុករ និង​ប៉ូលិស​ដែល​បាន​គំរាម​ប្រើ​វិធានការ​ក្តៅ​ដើម្បី​វាយ​បំបែក​ក្រុមបាតុករ​ដែល​បាន​ចូល​លាក់ខ្លួន​នៅ​សកល​វិទ្យាល័យ Polytechnic ហុងកុង (PolyU)​។ ការឡោមព័ទ្ធ​សកលវិទ្យា​ល័យ បាន​ក្លាយជា​សមរភូមិ​ឆន្ទៈ​មួយ​រវាង​កម្លាំង​ប៉ូលីស​ហុងកុង និង​ចលនា​តវ៉ា​ថ្មី​របស់​ក្រុមបាតុករ​។​


 
​យោងតាម​ការសង្កេត​ឃើញ​របស់​ទីភ្នាក់ងារ​ព័ត៌មាន AFP នៅ​យប់​ថ្ងៃ​ចន្ទ​ម្សិលមិញ ក្រុមបាតុករ​ឈុតខ្មៅ​ហុងកុង​រាប់សិប​នាក់ បាន​សម្រូត​ខ្លួន​ចុះ​តាម​ខ្សែពួរ​ទៅកាន់​ផ្ទៃដី​ខាងក្រោម ដោយមាន​ម៉ូតូ​ជាច្រើន​គ្រឿង​រង់ចាំ​ដឹក​ពួកគេ​រត់គេច​ពី​ទីនោះ​។ ទោះបី​ជាមាន​អ្នក​រត់គេច​ច្រើន​ក៏ដោយ​ក្តី បាតុករ​រាប់សិប​នាក់​ផ្សេងទៀត នៅតែ​បន្ត​ពួន​សម្ងំ​នៅក្នុង​ទីធ្លា​សកលវិទ្យា​ល័យ​នេះ​ដដែល​។ ទន្ទឹមនេះ គេ​ក៏​មើលឃើញថា ពលរដ្ឋ​ហុងកុង​ជាច្រើន​រាប់រយ​នាក់ បាននាំគ្នា​ដើរ​សំដៅ​ទៅកាន់​ទីធ្លា​សកលវិទ្យា​ល័យ PolyU ដើម្បី​បំបែក​ការឡោមព័ទ្ធ​រប​ស់​ប៉ូលិស​ហុងកុង ខណៈ​ស្ថានការណ៍​កាន់តែ​ដុនដាប​។ 
 
​កាលពី​សប្តាហ៍​មុន គេ​សង្កេតឃើញថា ទាហាន​ចិន​បាន​ចាក​ចេញពី​បន្ទាយ​ពួកគេ​ទៅ​បោសសម្អាត​នៅតាម​ដងផ្លូវ​នានា​ក្នុង​ទីក្រុង​ហុងកុង ដោយ​គ្មាន​សំណើ​ពី​សំណាក់​រដ្ឋាភិបាល​ហុងកុង​។ ទង្វើ​នេះ​នេះ កំពុង​បង្ក​ឲ្យ​មាន​កង្វល់​ពាក់ព័ន្ធ​ការ​លូកដៃ​ដោយផ្ទាល់​ពី​សំណាក់​យោធា​ចិន​ដើម្បី​បង្ក្រាប​ភាពវឹកវរ​នេះ​កើនឡើង​កាន់តែខ្លាំង​។ 
 
​បើតាម AFP អគ្គរដ្ឋទូត​ចិន​ប្រចាំ​ចក្រភព​អង់គ្លេស នៅ​ថ្ងៃទី​១៨ ខែវិច្ឆិកា ប្រកាស​ក្ដែ​ង​ថា រដ្ឋាភិបាល​ហុងកុង​កំពុង​ព្យាយាម​យ៉ាងខ្លាំង​ដើម្បី​គ្រប់គ្រង​ស្ថានការណ៍​ដែល​កំពុង​កើតឡើង​នៅ​ទីក្រុង​ហុងកុង ក៏ប៉ុន្តែ​ប្រសិនបើ​ស្ថានការណ៍​វឹកវរ​បែបនេះ លែង​អាច​គ្រប់គ្រង​បាន​ហើយ​នោះ រដ្ឋាភិបាល​ចិន ច្បាស់​ណាស់ នឹងមិន​ឱបដៃ​ឈរ​មើល​ទេ​។ ត្រង់នេះ លោក Liu Xiaoming  សង្កត់ធ្ងន់ថា ក្រុង​ប៉េកាំង​មានអំណាច​និង​សេចក្តី​ស​ម្រ​ច​គ្រប់គ្រាន់​ក្នុងការ​បញ្ចប់​ភាពចលាចល​នេះ​៕



Tag:
 ហុងកុង​
  ចិន​
  ប៉ូលិស​
  សកលវិទ្យា​ល័យ​
  បាតុកម្ម​
© រក្សាសិទ្ធិដោយ thmeythmey.com