ខ្សែប្រយុទ្ធ Gareth Bale ជឿជាក់ថាសមិទ្ធផលដ៏អស្ចារ្យរបស់វេលស៍នៅ Euro 2016 ដែលឈានដល់វគ្គពាក់កណ្តាលផ្តាច់ព្រ័ត្រ នឹងជំរុញទឹកចិត្តក្រុមយកឈ្នះហុងគ្រី ដើម្បីបានកៅអីទៅកាន់ Euro 2020។
ក្រុមដែលដឹកនាំដោយគ្រូបង្វឹកលោក Ryan Giggs នឹងត្រូវទទួលស្វាគមន៍ភ្ញៀវហុងគ្រី សម្រាប់ជំនួបចុងក្រោយ នៃវគ្គសន្សំពិន្ទុពូល E នៅថ្ងៃទី១៩ ខែវិច្ឆិកា វេលាម៉ោង ២:៤៥នាទីរំលងអាធ្រាត្រ [ម៉ោងនៅកម្ពុជា] និងជាការប្រកួតកាត់សេចក្តីដើម្បីយកមួយក្រុមទៅវគ្គផ្តាច់ព្រ័ត្រពានរង្វាន់ទ្វីបអឺរ៉ុបឆ្នាំ២០២០។
ក្នុងការប្រកួតជម្រុះទាំង១០ពូលកន្លងមក គេបានរកឃើញក្រុមចំនួន១៩ ហើយដែលកក់កៅអីទៅ Euro 2020 ខណៈវេលស៍ ហុងគ្រី និងស្លូវ៉ាគីកំពុងមានពិន្ទុប្រដេញគ្នា ហើយត្រូវប្រជែងគ្នាចុងក្រោយដើម្បីយកតំណែងចំណាត់ថ្នាក់ទី២ក្នុងពូល E បន្ទាប់ពីក្រូអាស៊ីដែលឈរកំពូលតារាងបានកៅអីរួចស្រេច។
ឆ្លងកាត់ការប្រកួត៧លើក វេលស៍ដែលឈានដល់វគ្គពាក់កណ្តាល់ផ្តាច់ព្រ័ត្រកាលពីឆ្នាំ២០១៦ រកបាន១១ពិន្ទុ ឈរនៅលេខរៀងទី៣ តាមពីក្រោយហុងគ្រីដែលនៅលេខ២ចំនួន១ពិន្ទុ និងលើសស្លូវ៉ាគីដែលឈរលេខ៤ចំនួន១ពិន្ទុ។ ស្លូវ៉ាគីត្រូវតទល់ជាមួយក្រុមបាតតារាងអាស៊ែបៃហ្សង់សម្រាប់ការប្រកួតចុងក្រោយនេះ។
សម្រាប់ជំនួបកាត់សេចក្តីនេះ ខ្សែប្រយុទ្ធឆ្នើម Real Madrid អះអាងថាវេលស៍អាចប្រើប្រាស់បទពិសោធន៍ដែលទទួលបានកាលពី៣ឆ្នាំមុន បូករួមនឹងការខកខានមិនបានចូលរួមប្រកួត World Cup ឆ្នាំ ២០១៨ ជាការបំផុសគំនិតឆ្ពោះទៅរកការប្រកួតដ៏សំខាន់នៅយប់នេះ ។
Bale និយាយក្នុងសន្និសីទសារព័ត៌មានមុនការប្រកួតថា៖«ខ្ញុំគិតថាយើងអាចប្រើបទពិសោធន៍ទាំងពីរខាងលើជាប្រយោជន៍របស់យើង។ យើងបានទទួលលទ្ធផលល្អនៅ Euro 2016 ហើយយើងនឹងធ្វើឲ្យបានល្អបែបនេះម្តងទៀតនៅពេលប៉ះហុងគ្រី»។
សូមបញ្ជាក់ថា ក្រុមដែលបញ្ចប់ទៅក្នុងចំណាត់ថ្នាក់ទី១ និងទី២តាមពូលនិមូយៗ អាចឈាន់ទៅវគ្គផ្តាច់ព្រ័ត្រដោយស្វ័យប្រវត្តិ ខណៈក្រុមលេខ៣ត្រូវប្រកួត play-off បន្តដើម្បីយក៤ក្រុមបន្ថែមដើម្បីបង្គ្រប់២៤ក្រុម។
ក្រុមដែលទទួលបានកៅអីរួចស្រេចហើយចំនួន១៩ រួមមាន អង់គ្លេស ឆែក អ៊ុយក្រែន អេស្ប៉ាញ ស៊ុយអែត ប៉ូឡូញ បារាំង តួកគី បែលហ្ស៊ិក រុស្ស៊ី អ៊ីតាលី ហ្វាំងឡង់ ក្រូអាស៊ី ហូឡង់ អូទ្រីស អាល្លឺម៉ង់ ម្ចាស់ការពារជើងឯកព័រទុយហ្គាល់ ដាណឺម៉ាក និងស្វ៊ីស៕