អន្តរជាតិ
លោក ស៊ិនហ្សូ អាបេ ក្លាយជានាយករដ្ឋមន្ត្រីយូរជាងគេរបស់ជប៉ុន។ រូបថត AFP
×![]()
ដោយ: តន ចាន់រិទ្ធារ៉ា
លោក ស៊ិនហ្សូ អាបេ នៅថ្ងៃទី២០ ខែវិច្ឆិកា បានក្លាយជានាយករដ្ឋមន្ត្រីកាន់តំណែងយូរជាងគេរបស់ជប៉ុន ដោយបំបែកកំណត់ត្រាកាលពីជាងមួយសតវត្សរ៍មុន។ លោក អាបេ ដឹកនាំជប៉ុនដំបូងនៅឆ្នាំ២០០៦ មុននឹងលាលែងនៅឆ្នាំបន្ទាប់ ហើយក៏ក្លាយជានាយករដ្ឋមន្ត្រីម្ដងទៀតនៅឆ្នាំ២០១២ រហូតមកដល់បច្ចុប្បន្ននេះ។ ជានាយករដ្ឋមន្ត្រីជប៉ុន លោក អាបេ បានជម្នះបញ្ហាជាច្រើនទាំងផ្នែកនយោបាយ និងសេដ្ឋកិច្ច។
គិតត្រឹមថ្ងៃទី២០ ខែវិច្ឆិកា លោក ស៊ិនហ្សូ អាបេ អង្គុយកៅអីនាយករដ្ឋមន្ត្រីជប៉ុនសរុបចំនួន ២៨៨៧ថ្ងៃ ដែលធ្វើឲ្យលោកក្លាយជានាយករដ្ឋមន្ត្រីកាន់តំណែងយូរជាងគេរបស់ជប៉ុន។ លោក អាបេ បានបំបែកកំណត់ត្រារបស់លោក តារ៉ូ កាស៊ូរ៉ា ដែលកាន់តំណែងនាយករដ្ឋមន្ត្រីចំនួន ២៨៨៦ថ្ងៃចន្លោះឆ្នាំ១៩០១ ដល់ឆ្នាំ១៩១៣ ។
ជាប្រធានបក្សកាន់អំណាចប្រជាធិបតេយ្យសេរី លោក អាបេ ចូលកាន់តំណែងនាយករដ្ឋមន្ត្រីជប៉ុនលើកដំបូងនៅខែកក្កដា ឆ្នាំ២០០៦ ក្នុងវ័យ៥២ឆ្នាំដែលធ្វើឲ្យលោកជានាយករដ្ឋមន្ត្រីក្មេងជាងគេគិតតាំងពីឆ្នាំ១៩៤១ ។ ប៉ុន្តែលោកសម្រេចចិត្តលាលែងពីតំណែងនៅខែកញ្ញា ឆ្នាំ២០០៧ ដោយអះអាងថា មានបញ្ហាសុខភាព និងដើម្បីស្រោចស្រង់ប្រជាប្រិយភាពបក្សផង។ លោក យ៉ាស៊ូ ហ្វ៊ូគូដា ក៏ក្លាយជានាយករដ្ឋមន្ត្រីថ្មី។
លោក អាបេ ដែលមានជីតាជានាយករដ្ឋមន្ត្រីជប៉ុនដែរនោះ ក៏ត្រឡប់មកដឹកនាំជប៉ុនម្ដងទៀតក្រោយការបោះឆ្នោតខែធ្នូ ឆ្នាំ២០១២ ។ ៧ឆ្នាំមកនេះ លោកដឹកនាំបក្សប្រជាធិបតេយ្យឲ្យឆ្លងកាត់ការបោះឆ្នោតចំនួន៦ដង ទោះជាមានរឿងអាស្រូវចោលរោម និងបញ្ហាគោលនយោបាយមិនទាន់សម្រេចជាច្រើនក្ដី។ អ្នកស្រី Seiko Noda សមាជិកសភាបក្សកាន់អំណាចប្រាប់ទីភ្នាក់ងារព័ត៌មាន Reuters ថា លោក អាបេ កាន់តំណែងបានយូរ ក៏ព្រោះគ្មានគូប្រជែងខ្លាំង។
ទោះជាគ្មានគូប្រជែងក្ដី លោក អាបេ កំពុងប្រឈមមុខបញ្ហាជាច្រើន។ គម្រោងកែរដ្ឋធម្មនុញ្ញសន្តិភាពនិយម នៅតែមិនទាន់អាចកើតឡើង ខណៈមតិសាធារណៈទូទៅ មិនយល់ស្របលើគម្រោងផ្លាស់ប្ដូរឋានៈកងស្វ័យការពារជប៉ុនទៅជាកងទ័ពប្រយុទ្ធនៅឡើយ។ បញ្ហាសេដ្ឋកិច្ចមិនសូវទៅមុខ រឿងអាស្រូវរបស់សមាជិកគណៈរដ្ឋមន្ត្រី ក៏យាយីប្រជាប្រិយភាពបក្សលោកដែរ។ រដ្ឋមន្ត្រីដល់ទៅពីររូបបាន លាលែងពីតំណែងក្រោយរងការចោទប្រកាន់ថា បំពានច្បាប់បោះឆ្នោត។
សូមបញ្ជាក់ថា នៅជប៉ុន ប្រធានបក្សកាន់អំណាច នឹងក្លាយជានាយករដ្ឋមន្ត្រីដោយស្វ័យប្រវត្តិ ដូចនេះលោក អាបេ ដែលទើបទទួលការទុកចិត្តឲ្យដឹកនាំបក្សប្រជាធិបតេយ្យដល់ឆ្នាំ២០២១ ក៏ត្រូវដឹកនាំជប៉ុនដល់ឆ្នាំ២០២១ ដែរ លុះត្រាតែមានការបោះឆ្នោតថ្នាក់ជាតិមុនអាណត្តិ ឬការផ្លាស់ប្ដូរតំណែងប្រធានបក្ស។ ប៉ុន្តែបច្ចុប្បន្ននេះ គេមិនឃើញមានគូប្រជែងណាអាចដណ្ដើមតំណែងពីលោក អាបេ បាននៅឡើយទេ។
សម្រាប់រយៈពេលខាងមុខ លោក អាបេ ទំនងបន្តផ្ដល់អាទិភាពលើបញ្ហាសេដកិច្ច ស្ដារទំនាក់ទំនងជាមួយកូរ៉េខាងជើងតាមរយៈការដោះស្រាយបញ្ហាចាប់ជំរិតជនជាតិជប៉ុន និងការរកច្រកចេញជម្លោះជាមួយរុស្ស៊ីជាដើម។ ទំនាក់ទំនងជាមួយកូរ៉េខាងត្បូងដែលសព្វថ្ងៃល្អក់កករខ្លាំង ក៏អាចជាអាទិភាពសម្រាប់រដ្ឋាភិបាលលោក អាបេ ដែរ៕
Tag:
ជប៉ុន
ស៊ិនហ្សូ អាបេ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
