ជាតិ
ក្រសួងទេសចរណ៍ឲ្យផ្អាកអាជីវកម្មខារ៉ាអូខេ រង្គសាល បៀរហ្គាឌិន...ពេញមួយថ្ងៃពុធនេះ
× ភ្នំពេញ៖ សម្រាប់ពេញមួយថ្ងៃពុធ ទី២០ ខែវិច្ឆិកា នេះ ក្រសួងទេសចរណ៍ បានចេញសារាចរណែនាំឲ្យម្ចាស់អាជីវកម្មខារ៉ាអូខេ ឌីស្កូតែក រង្គសាល និងបៀរហ្គាឌិន ផ្អាកសកម្មភាពអាជីវកម្ម រីឯភោជនីយដ្ឋាន និងអាហាររដ្ឋបាលត្រូវផ្អាកសកម្មភាពលក់គ្រឿងស្រវឹង។ នេះជាការអនុវត្តតាមការណែនាំរបស់រដ្ឋាភិបាល ដើម្បីចូលរួមគោរពព្រះវិញ្ញាណក្ខន្ធព្រះបរមសព សម្តេចរាជបុត្រី ព្រះរៀម នរោត្តម បុប្ផាទេវី។
សម្ដេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះពិរាល័យក្នុងព្រះជន្ម ៧៧ព្រះវស្សា កាលពីថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យ ក្រុងបាងកក ប្រទេសថៃ ដោយជរាពាធ។ ព្រះសពព្រះអង្គ ត្រូវបានដង្ហែចេញពីអាកាសយានដ្ឋានអន្តរជាតិភ្នំពេញ ឆ្ពោះទៅវត្តបុទុមវតី កាលពីយប់ថ្ងៃអង្គារ ទី១៩ ខែវិច្ឆិកា។
ដើម្បីចូលរួមគោរពព្រះវិញ្ញាណក្ខន្ធ ព្រះអង្គដែលជាឧត្តមទីប្រឹក្សាផ្ទាល់ព្រះមហាក្សត្រ សមាជិកាក្រុមប្រឹក្សាធម្មនុញ្ញ និងជាអតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ រដ្ឋាភិបាល ជាពិសេសក្រសួងទេសចរណ៍ បានស្នើឲ្យផ្អាកសកម្មភាពសប្បាយៗផ្សេងៗ ពេញមួយថ្ងៃទី២០ ខែវិច្ឆិកា នេះ។
កាលពីថ្ងៃទី១៨ ខែវិច្ឆិកា សម្តេចនាយករដ្ឋមន្ត្រី ហ៊ុន សែន បានប្រកាសយកថ្ងៃទី២០ ខែវិច្ឆិកា នេះ ជាថ្ងៃកាន់ព្រះមរណទុក្ខទូទាំងប្រទេស ដោយគ្រប់ស្ថាប័ន សាលារៀន មន្ទីរពេទ្យ វត្តអារាម ត្រូវបានតម្រូវឲ្យបង្ហូតទង់ជាតិត្រឹមពាក់កណ្តាលនៃដងទង់ជាមួយ។
ជាមួយគ្នានេះ ប្រមុខរដ្ឋាភិបាល ក៏បានប្រាប់ទៅគ្រប់ស្ថានីយ៍វិទ្យុ និងទូរទស្សន៍ទាំងអស់ ផ្អាកការសម្តែង និងការចាក់ផ្សាយទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេង។
បន្ថែមលើការណែនាំរបស់រដ្ឋាភិបាល ក្រសួងទេសចរណ៍ បានតម្រូវឲ្យម្ចាស់ ឬអ្នកគ្រប់គ្រងអាជីវកម្មខារ៉ាអូខេ ឌីស្កូតែក រង្គសាល និងបៀរហ្គាឌិន ផ្អាកសកម្មភាពអាជីវកម្ម រីឯភោជនីយដ្ឋាន និងអាហារដ្ឋាន ផ្អាកលក់គ្រឿងស្រវឹង នៅថ្ងៃទី២០ខែវិច្ឆិកា នេះ៕
Tag:
សម្តេចព្រះរៀម
នរោត្តម បុប្ផាទេវី
© រក្សាសិទ្ធិដោយ thmeythmey.com