អន្តរជាតិ
មហាធៀ៖ ការផ្ទេរអំណាច នឹងត្រូវបានសម្រេច នៅពេលវេលាជាក់លាក់មកដល់ លោក Anwar Ibrahim (ខាងឆ្វេង) និងលោកមហាម៉ាត់ មហាធៀ, រូបភាព៖ AFP
× ការផ្ទេរអំណាច នឹងត្រូវបានសម្រេច នៅពេលវេលាជាក់លាក់មកដល់។ នេះបើតាមការលើកឡើងរបស់នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី១៩ ខែវិច្ឆិកា។ ការអះអាងរបស់នាយករដ្ឋមន្ត្រីបែបនេះ គឺធ្វើឡើង បន្ទាប់ពីអតីតឧបនាយករដ្ឋមន្ត្រីម៉ាឡេស៊ី Syed Husin Ali បានរិះគន់ នាយករដ្ឋមន្ត្រីថា មិនមានគម្រោងច្បាស់លាស់លើកការរៀបចំផ្ទេរអំណាច។
«យើងមិនដឹងទេ ថាតើស្ថានភាពប្រទេសក្នុងពេលបច្ចុប្បន្នអំណោយផលក្នុងការផ្ទេរតំណែងឬក៏អត់នោះទេ។ នៅពេលវេលាជាក់លាក់មកដល់ យើងនឹងសម្រេច»។ នេះបើតាមការអះអាងរបស់អ្នកសារព័ត៌មានរបស់នាយករដ្ឋមន្ត្រី មហាធៀ មហាម៉ាត់ ដោយមិនបានបញ្ជាក់ពីពេលវេលាជាក់លាក់ គឺជាពេលណាឡើយ ។
ការលើកឡើងរបស់ លោក មហាធៀ បែបនេះ គឺដើម្បីឆ្លើយតបទៅនឹងពាក្យរិះគន់របស់អតីតឧបនាយករដ្ឋមន្ត្រី Syed Hsin Ali ដែលបានលើកឡើងថា លទ្ធផលឈ្នះការបោះឆ្នោតបំពេញបន្ថែមនៅមណ្ឌល Tanjung Piai របស់លោក Wee Jeck Seng នៃបក្ស Barisan National ផ្ដួលបេក្ខជន Karmaine Sardini មកពីសម្ពន្ធភាពកាន់អំណាច Pakatan Harapan គឺអាចសបញ្ជាក់ឲ្យឃើញថា ការគាំទ្រភាពជាអ្នកដឹកនាំរបស់លោក មហាធៀ ក៏មានការធ្លាក់ចុះផងដែរ។ លោក មហាធៀ គឺជាប្រធានសម្ពន្ធភាពកាន់អំណាច Pakatan Harapan។
ពាក់ព័ន្ធទៅនឹងការចុះសំគឡេងឆ្នោតរបស់សម្ពន្ធភាពកាន់អំណាច Pakatan Harapan នេះផងដែរ មានសមាជិកសភា ៤ ឬ៥នាក់ បានបន្ទោសរូបលោកថា ជាអ្នកធ្វើឲ្យចាញ់ក្នុងការបោះឆ្នោតមួយនេះ។ ជាការឆ្លើយតបនាយករដ្ឋមន្ត្រីម៉ាឡេស៊ីវ័យ៩៤ឆ្នាំរូបនេះ បានលើកឡើងថា៖ « ប្រហែលជាខ្ញុំខុស។ តើខ្ញុំធ្វើម្តេចនឹងដឹងទៅ?»។ នេះបើតាមការចុះផ្សាយរបស់សារព័ត៌មាន Bernama។
បើតាមការសន្យាកន្លងមក លោកមហាធៀ ធ្លាប់បានលើកឡើងថា ខ្លួននឹងមិនកាន់តំណាងជានាយករដ្ឋមន្ត្រីឲ្យលើសពីបីឆ្នាំឡើយ រួចនឹងផ្ទេរតួនាទីឲ្យលោក អាន់វ៉ា អ៊ីប្រាហ៊ីម (Anwar Ibrahim) កាន់តំណែងជំនួសវិញ។ ជាការពិតកិច្ចព្រមព្រៀងរបស់លោក មហាធៀ និង លោក Anwar នឹងត្រូវផុតកំណត់នៅក្នុងខែឧសភា ឆ្នាំ ២០២០ ខាងមុខនេះ៕
© រក្សាសិទ្ធិដោយ thmeythmey.com