ជាតិ
សង្គមជាតិ
លោក ភោ សុភក្តិ ឈ្នះពានលេខ១ពីរឆ្នាំជាប់គ្នា ពីការប្រកួតវីដេអូស្តីពី«កំណប់សហគមន៍ និងជំរំទេសចរណ៍» លោក ភោ សុភក្តិ អ្នកផលិតវីដេអូ«រតនៈនិស្ស័យ» ដែលទទួលបានជ័យលាភីលេខមួយ
× ភ្នំពេញ៖ «រតនៈនិស្ស័យ» ជាចំណងជើងវីដេអូជ័យលាភីលេខមួយ នៅក្នុងកម្មវិធីប្រណាំងវីដេអូក្រោមប្រធានបទ«កំណប់សហគមន៍ និងជំរំទេសចរណ៍» ដែលរៀបចំដោយក្រសួងទេសចរណ៍។ ការប្រកាសជ័យលាភី ត្រូវបានធ្វើឡើងក្នុងវេទិកាអេកូទេសចរណ៍លើកទី១ កាលពីថ្ងៃទី១៩ ខែវិច្ឆិកា នៅរាជធានីភ្នំពេញ។ វីដេអូជ័យលាភីលេខ២ មានចំណងជើងថា «ផ្ទះទី២» និងវីដេអូលេខ៣ មានចំណងជើងថា«បុព្វេសន្និវាស»។ អ្នកផលិតវីដេអូដែលទទួលបានពានលេខ១ គឺលោក ភោ សុភក្តិ ដែលធ្លាប់ទទួលបានជ័យលាភីម្តងរួចមកហើយក្នុងការប្រកួតកាលពីឆ្នាំ២០១៨។
វីដេអូ ដែលបានទទួលជ័យលាភីលេខ១ ក្នុងកម្មវិធីប្រណាំងវីដេអូក្រោមប្រធានបទ«កំណប់សហគមន៍ និងជំរំទេសចរណ៍» មានចំណងជើងថា«រតនៈនិស្ស័យ»។ វីដេអូនេះ មានរយៈពេលជិត៦នាទី រៀបរាប់ពីតំបន់ទេសចរណ៍សក្តានុពលនៅក្នុងខេត្តរតនគិរី និងជីវភាពរស់នៅរបស់ជនជាតិដើមភាគតិចនៅក្នុងខេត្តនេះ។ លោក ភោ សុភក្តិ អ្នកផលិតវីដេអូដែលទើបតែទទួលពានរង្វាន់ ពីសម្តេចស ខេង រដ្ឋមន្ត្រីក្រសួងមហាផ្ទៃ បានប្រាប់សារព័ត៌មានថ្មីៗថា មូលហេតុដែលលោកជ្រើសរើសខេត្តរតនគិរីសម្រាប់ផលិតវីដេអូប្រកួត ដោយសារតែលោកស្រឡាញ់ និងចូលចិត្តខេត្តភាគឦសានមួយនេះខ្លាំង ហើយលោកបានស្គាល់តំបន់ និងសហគមន៍ទេសចរណ៍ច្រើន រួមទាំងដឹងពីស្ថានភាពរស់នៅក្នុងតំបន់នោះ ជាពិសេសទំនៀមទម្លាប់ប្រពៃណី និងការរស់នៅរបស់ជនជាតិភាគតិច។
សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានផ្តល់ពានរង្វាន់ដល់ជ័យលាភីលេខមួយ គឺលោក ភោ សុភក្តិ ដែលផលិតវីដេអូ«រតនៈនិស្ស័យ»រូបពីក្រសួងទេសចរណ៍
ភ្នែកសំឡឹងមើលពានដែលនៅនឹងដៃ លោក សុភក្តិ រៀបរាប់ថាលោកមានមោទកភាពណាស់ ចំពោះការទទួលបានជ័យលាភីលេខមួយនៅពេលនេះ។ លោកបន្តពន្យល់ថា តាមរយៈពានរង្វាន់នេះ ធ្វើឲ្យលោកអាចបង្ហាញពីគំរូដល់យុវជនជំនាន់ក្រោយ ឲ្យផលិតវីដេអូដែលទាក់ទងនឹងតំបន់ទេសចរណ៍នៅក្នុងប្រទេសកម្ពុជាឲ្យបានច្រើន ដើម្បីឲ្យមហាជនបានស្គាល់ និងកោតសរសើរស្ងប់ស្ងែងពីតំបន់ទេសចរណ៍ដែលកម្ពុជាមានផងដែរ។
តាមពិត នេះមិនមែនជាលើកដំបូងនោះទេ ដែល លោក សុភក្តិ ធ្លាប់បានជាប់ជ័យលាភីក្នុងការប្រកួតផលិតវីដេអូទាក់ទងនឹងតំបន់ទេសចរណ៍នេះ។ កាលពីឆ្នាំមុន វីដេអូរបស់លោក ដែលមាន ចំណងជើងថា«ដើរតាមក្តីស្រមៃ»ក៏ទទួលបានជ័យលាភីលេខមួយដែរ។
ដ្បិតបានទទួលជ័យលាភី ២ឆ្នាំជាប់គ្នាមែន ប៉ុន្តែទម្រាំអាចផលិតបានវីដេអូនីមួយៗ លោក សុភក្តិ ថាបានចំណាយពេលច្រើន និងទាមទារការអត់ធ្មត់ណាស់។ លោក រៀបរាប់ដូច្នេះ៖«មុនផលិតវីដេអូមួយៗ យើងមានការស្រាវជ្រាវ ស្វែងយល់ពីតំបន់ទេសចរណ៍ជាច្រើន និងមានចិត្តអំណត់អត់ធ្មត់ ទាំងគ្រប់គ្រងពេលវេលាឲ្យបានល្អ និងមានភាពច្នៃប្រឌិត»។
រហូតមកនេះ លោក សុភក្តិ បានផលិតជាវីដេអូ និងវីដេអូឯកសារមួយចំនួន ស្តីពីសកម្មភាពដំណើរកម្សាន្តទៅតំបន់ទេសចរណ៍នានា ជាមួយនឹងក្រុមគ្រួសាររបស់លោក។ ប៉ុន្តែបំណងរបស់បុរសរូបនេះ គឺផលិតវីដេអូដែលទាក់ទងនឹងតំបន់ទេសចរណ៍ នៅ២៥ រាជធានី ខេត្ត ក្នុងប្រទេសកម្ពុជាតែម្តង៕
Tag:
ទេសចរណ៍
វីដេអូ
ផលិតករ
© រក្សាសិទ្ធិដោយ thmeythmey.com