អន្តរជាតិ
ប្រធានាធិបតីលោក Gotabaya Rajapaksa (ស្តាំ) និងលោក Mahinda Rajapaksa ជាបងប្រុស ដែលលោកទើបតែងតាំងជានាយករដ្ឋមន្ត្រី។ រូបថត AFP
×![]()
ដោយ: តន ចាន់រិទ្ធារ៉ា
ប្រធានាធិបតីស្រីលង្កា ហ្គូតាបាយ៉ា រាចាប៉ាក់សា (Gotabaya Rajapaksa) ដែលទើបជាប់ឆ្នោតថ្មីៗ បានតែងតាំងបងប្រុសបង្កើតរបស់ខ្លួន ម៉ាហ៊ិនដា រាចាប៉ាក់សា (Mahinda Rajapaksa) ជានាយករដ្ឋមន្ត្រីថ្មីដើម្បីដឹកនាំរដ្ឋាភិបាល។ ការតែងតាំងនេះ ជាការអនុវត្តតាមពាក្យសន្យាអំឡុងពេលឃោសនារកសំឡេងឆ្នោតក្នុងការបោះឆ្នោតប្រធានាធិបតីដែលលោកបានផ្ដួលបេក្ខជនបក្សកាន់អំណាច។ ត្រកូលរាចាប៉ាក់សា ល្បីឈ្មោះដោយសារការបញ្ចប់សង្គ្រាមជាមួយក្រុមខ្លាតាមិល។
លោក ម៉ាហ៊ិនដា រាចាប៉ាក់សា ត្រូវស្បថចូលកាន់តំណែងនាយករដ្ឋមន្ត្រីរបស់ស្រីលង្កានៅថ្ងៃទី២១ ខែវិច្ឆិកា បន្ទាប់ពីត្រូវបានប្អូនប្រុសបង្កើតរបស់លោក គឺប្រធានាធិបតីថ្មី ហ្គូតាបាយ៉ា រាចាប៉ាក់សា ចុចឈ្មោះឲ្យកាន់តំណែងកំពូលនេះនៅថ្ងៃទី១៩ ខែតុលា។ នេះជាលើកទីពីរដែលត្រកូលរាចាប៉ាក់សា មានសមាជិកពីរនាក់កាន់ក្បាលម៉ាស៊ីនដឹកនាំរដ្ឋបែបនេះ។
លោក ម៉ាហ៊ិនដា ដែលធ្លាប់ជាប្រធានាធិបតីស្រីលង្កាពីរអាណត្តិដែរនោះ នឹងអង្គុយកៅអីនាយករដ្ឋមន្ត្រីជំនួស Ranil Wickremesinghe ដែលសុំលាលែងពីតំណែង ក្រោយបេក្ខជនតំណាងបក្សរបស់លោក ចាញ់លោក ហ្គូតាបាយ៉ា ក្នុងការបោះឆ្នោតប្រធានាធិបតី។ លោក Ranil ដែលបក្សរបស់លោកមានសំឡេងភាគច្រើនក្នុងសភានិយាយថា លោកលាលែងដើម្បីផ្ដល់ឱកាសឲ្យលោក ហ្គូតាបាយ៉ា ដែលទទួលបានការទុកចិត្តពីប្រជាជនក្នុងការបង្កើតរដ្ឋាភិបាលថ្មី។
បានន័យថា លោក ម៉ាហ៊ិនដា វ័យ៧៤ឆ្នាំ នឹងត្រូវដឹកនាំរដ្ឋាភិបាលដែលមានសំឡេងភាគតិចក្នុងសភា។ សភាបច្ចុប្បន្ន ត្រូវបានជ្រើសរើសក្នុងការបោះឆ្នោតឆ្នាំ២០១៥ សម្រាប់អាណត្តិ៥ឆ្នាំ។ ប៉ុន្តែលោកប្រធានាធិបតី ហ្គូតាបាយ៉ា ដែលមានវ័យ៧០ឆ្នាំ គ្មានសិទ្ធិរំលាយសភាឡើយ ហើយត្រូវចាំដល់ខែមីនា ឆ្នាំ២០២០ ទើបរំលាយបានដើម្បីរៀបចំការបោះឆ្នោតអាណត្តិថ្មី។
តាមពិតទៅ នេះក៏មិនមែនជាលើកដំបូងដែលបងប្អូនរាចាប៉ាក់សា ធ្វើការក្នុងក្បាលម៉ាស៊ីនរដ្ឋរួមគ្នាដែរ។ ក្នុងអាណត្តិប្រធានាធិបតីលើកទីមួយរបស់លោក ម៉ាហ៊ិនដា លោក ហ្គូតាបាយ៉ា គឺជាលេខាធិការក្រសួងការពារជាតិ ដែលពេលនោះកំពុងធ្វើប្រតិបត្តិការបោសសម្អាតក្រុមឧទ្ទាមខ្លាតាមិល។ ទោះសង្គ្រាមក្នុងស្រុកចប់នៅឆ្នាំ២០០៩ មែន កម្លាំងសន្តិសុខរងការចោទប្រកាន់ពីបទឧក្រិដ្ឋកម្មសង្គ្រាម និងបានបំពានសិទ្ធិមនុស្សធ្ងន់ធ្ងរ។
ទោះរងការរិះគន់ពីខាងក្រៅ និងក្នុងចំណោមជនភាគតិចតាមិលក្ដី ត្រកូលរ៉ាចាប៉ាក់សានេះ បានទទួលការគោរពខ្លាំងពីប្រជាជន Sinhalese ដែលជាជនភាគច្រើននៅស្រីលង្កា។ ស្នាដៃទាំងនេះ ពិតជាជួយឲ្យត្រកូលនេះ ឡើងកាន់អំណាចជាថ្មី៕
Tag:
ស្រីលង្កា
Gotabaya Rajapaksa
Mahinda Rajapaksa
© រក្សាសិទ្ធិដោយ thmeythmey.com
