ជាតិ
សម្តេច ហ៊ុន សែន គ្រោងពិភាក្សាអំពីលទ្ធភាពនៃការអនុវត្ត FTA ជាមួយលោក មូន ចេអុីន សម្តេចនាយករដ្ឋមន្ត្រី ហ៊ុន សែន អោបប្រធានាធិបតីកូរ៉េខាងត្បូង មូន ចេអុីន មុនជំនួបនៅវិមានសន្តិភាព។ រូបថត AFP
× សម្តេចនាយករដ្ឋមន្ត្រី ហ៊ុន សែន នឹងចេញដំណើរទៅទីក្រុងប៊ូសាននៃប្រទេសសាធារណរដ្ឋកូរ៉េនៅថ្ងៃទី២៤វិច្ឆិកានេះ ដើម្បីចូលរួមក្នុងកម្មវិធីខួបអនុស្សាវរីយ៍ឆ្នាំទី៣០នៃទំនាក់ទំនងអាស៊ាន-កូរ៉េ និងជំនួបកំពូលលើកទី១មេគង្គ-សាធារណរដ្ឋកូរ៉េ។ សម្តេច ហ៊ុន សែន គ្រោងនឹងជួបជាមួយលោកប្រធានាធិបតី មូន ចេអ៊ីន ដើម្បីពិភាក្សាលើគម្រោងសហប្រតិបត្តិការជាច្រើន។ ប្រមុខរដ្ឋាភិបាលកម្ពុជាក៏គ្រោងជួបសំណេះសំណាលជាមួយពលករ ពលការិនី និងសហគមន៍ស្ត្រីខ្មែររៀបការជាមួយស្វាមីកូរ៉េប្រមាណ២០០០នាក់ផងដែរ។
មានឯកសារជាច្រើនដែលសម្តេចនាយករដ្ឋមន្ត្រី ហ៊ុន សែន គ្រោងយកទៅពិភាក្សាជាមួយប្រធានាធិបតីនៃសាធារណរដ្ឋកូរ៉េ លោក មូន ចេអ៊ីន នៅដើមសប្តាហ៍ក្រោយនេះ ខណៈដែលសម្តេចនឹងមានវត្តមាននៅក្នុងប្រទេសកូរ៉េខាងត្បូងនោះ។ ក្នុងចំណោមប្រធានបទសំខាន់ៗទាំងនោះ វាក៏មានឯកសារខ្លះនឹងអាចឈានដល់ការចុះហត្ថលេខាផ្លូវការរវាងតំណាងរដ្ឋាភិបាលទាំងពីរ។
លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េបានអះអាងប្រាប់សារព័ត៌មានថ្មីៗនៅថ្ងៃទី២១វិច្ឆិកានេះថា ភាគីទាំងពីរនឹងជជែកអំពីកិច្ចសហប្រតិបត្តិការផ្នែកច្បាប់ ការលុបចោលការយកពន្ធត្រួតគ្នា ផ្នែកពាណិជ្ជកម្ម កសិកម្ម ហិរញ្ញវត្ថុ ព័ត៌មានវិទ្យា និងបច្ចេកវិទ្យាគមនាគមន៍។
លោកឯកអគ្គរាជទូតបានបញ្ជាក់យ៉ាងដូច្នេះ៖«ភាគីទាំងពីរក៏នឹងពិភាក្សាគ្នាឈានទៅរកការសិក្សាលើភាពអាចធ្វើបាននៃកិច្ចព្រមព្រៀងពាណិជ្ជកម្មសេរី (FTA)។ កូរ៉េមានកិច្ចព្រមព្រៀងពាណិជ្ជកម្មសេរីនេះជាមួយអាស៊ាន ហើយគេមានFTAនេះចំនួន១៦ទៀតជាមួយប្រទេសនានា។ »។
ចំពោះលោកឯកអគ្គរាជទូត ប្រសិនបើកម្ពុជានិងកូរ៉េខាងត្បូងអាចឈានដល់ចុះហត្ថលេខាលើកិច្ចព្រមព្រៀងពាណិជ្ជកម្មសេរីនេះ វាក៏ជាចលករជំរុញឱ្យប្រទេសដទៃទៀតដូចជាជប៉ុនធ្វើដូចគ្នា។ ឯកអគ្គរាជទូតកម្ពុជាប្រចាំសាធារណរដ្ឋកូរ៉េគ្រាន់តែអះអាងថា កិច្ចព្រមព្រៀងពាណិជ្ជកម្មសេរីនឹងផ្តល់ផលប្រយោជន៍ច្រើនដល់ពលរដ្ឋទាំងសងខាង៕
© រក្សាសិទ្ធិដោយ thmeythmey.com