ភ្នំពេញ៖ កម្ពុជា មិនចង់បាត់បង់ការអនុគ្រោះពន្ធ (Everything But Arms) នោះទេ ។ប៉ុន្តែកម្ពុជា ក៏មិនចង់ឱ្យអឺរ៉ុប យកប្រព័ន្ធអនុគ្រោះពន្ធនេះ ដើម្បីជាឈ្នាន់លូកដៃចូលកិច្ចការផ្ទៃក្នុង និងអធិបតេយ្យភាពរបស់កម្ពុជានោះដែរ។ នេះជាការលើកឡើងរបស់សម្ដេច ហ៊ុន សែន ដែលបានបន្ថែមថា កម្ពុជា នឹងត្រូវបង់ពន្ធនាំចូលទំនិញទៅអឺរ៉ុប នៅឆ្នាំ២០២៥ ។
ថ្លែងចំពោះមុខមន្ត្រីរដ្ឋាភិបាល និងនិស្សិតថ្នាក់បណ្ឌិត អនុបណ្ឌិតនៃរាជបណ្ឌិត្យសភា នាយករដ្ឋមន្ត្រី ហ៊ុន សែន បានបញ្ជាក់ថា កម្ពុជា គង់តែបាត់បង់ប្រព័ន្ធអនុគ្រោះពន្ធ ដែលសហភាពអឺរ៉ុបផ្ដល់ឱ្យនេះទេ។ បើតាមសម្ដេច ហ៊ុន សែន មូលហេតុដែលកម្ពុជា ត្រូវបាត់បង់EBA នោះ ដោយសារកម្ពុជា បានប្រែក្លាយខ្លួនទៅជាប្រទេសអភិវឌ្ឍ ដែលមានចំណូលមធ្យមកម្រិតខ្ពស់ ហើយលែងស្ថិតនៅក្រោមគោលការណ៍អនុគ្រោះពន្ធរបស់សហភាពអឺរ៉ុប។
នៅក្នុងពិធីសម្ពោធ «អគារឥន្ទ្រទេវី» របស់រាជបណ្ឌិត្យសភាកម្ពុជា នៅព្រឹកថ្ងៃព្រហស្បតិ៍ ទី២១ ខែវិច្ឆិកា ប្រមុខរដ្ឋាភិបាល បាននិយាយដូច្នេះថា៖«នៅឆ្នាំ២០២៥ ឬ ២០២៦ យើងត្រូវបង់ពន្ធ(EBA) ឱ្យគេ ព្រោះសេដ្ឋកិច្ចកើនឡើង វាអស់ភាពអនុគ្រោះ»។
មិនតែប៉ុណ្ណោះសម្ដេច ហ៊ុន សែន ឆ្លៀតរិះគន់ថា អឺរ៉ុបតែងតែមានបញ្ហាជាមួយបណ្ដាអាស៊ាន ពោលគឺមិនមែនមានតែកម្ពុជានោះទេ។ «ហើយរឿងអឺរ៉ុបជាមួយអាស៊ាន មិនមែនជាបញ្ហា ដាច់ដោយឡែករបស់កម្ពុជាទេ។ អឺរ៉ុបគំរាមកម្ពុជា គំរាមហ្វីលីពីន គំរាមមីយ៉ាន់ម៉ា លើបញ្ហាសិទ្ធិមនុស្ស។ អឺរ៉ុបគំរាមឥណ្ឌូណេស៊ី ម៉ាឡេស៊ី ទៅលើបញ្ហាដូងប្រេង»។ នេះជាការលើកឡើងរបស់ប្រមុខរដ្ឋាភិបាល។
ត្រង់ចំណុចនេះសម្ដេច ហ៊ុន សែន បានលើកឡើងពីករណីឥណ្ឌូណេស៊ី និងម៉ាឡេស៊ី ថា នៅពេលដែលអឺរ៉ុបរបស់វត្ថុធាតុដើម ដែលអាចជំនួសឱ្យការនាំចូលដូងប្រេងពីប្រទេសឥណ្ឌូណេស៊ី និងម៉ាឡេស៊ីនោះ អឺរ៉ុប បែរជាចោទប្រទេសទាំងពីរថា កាប់ឈើដើម្បីដាំដូងប្រេងទៅវិញ។ «(អឺរ៉ុប) មានហេតុផល១០០ជំពូក បើសិនជាគេចង់ធ្វើបាបយើងហើយ គេមានហេតុផល១០០ជំពូក។ ដូច្នេះបានជាយើងត្រូវប្រឹងត្រៀមខ្លួនឯង (នៅពេលគ្មានEBA)»។ នេះជាការអះអាងរបស់លោកនាយករដ្ឋមន្ត្រីកម្ពុជា ។
សហភាពអឺរ៉ុប ទើបនឹងចេញរបាយការណ៍បឋមស្តីពីនីតិវិធីនៃការដកឬមិនដក EBA ហើយបានផ្ញើមកកាន់រដ្ឋាភិបាលកម្ពុជា កាលពីថ្ងៃទី១២ ខែវិច្ឆិកា ឆ្នាំ២០១៩ ដោយទុករយៈពេល១ខែ ឲ្យរដ្ឋាភិបាលកម្ពុជា ប្រតិកម្មនឹងរបាយការណ៍នោះ។ ជាមួយគ្នានេះ សហភាពអឺរ៉ុប បានរម្លឹកថា នៅអំឡុងខែកុម្ភៈ ឆ្នាំ២០២០ សហភាពអឺរ៉ុប នឹងចេញរបាយការណ៍ចុងក្រោយ ហើយក៏នឹងធ្វើសេចក្តីសម្រេចចុងក្រោយផងដែរថា ដក EBA ពីកម្ពុជា ឬបន្តរក្សាទុក។
សហភាពអឺរ៉ុប ផ្តើមនីតិវិធីដំបូងស្តីពីការដកឬមិន EBA នេះ តាំងពីខែកុម្ភៈ ឆ្នាំ២០១៩មក។ មូលហេតុចម្បងដែលសហភាពអឺរ៉ុប បង្ហាញបំណងចង់ដក EBA គឺដោយសារតែមិនសូវពេញចិត្តនឹងស្ថានការណ៍សិទ្ធិមនុស្សនិងលទ្ធិប្រជាធិបតេយ្យនៅកម្ពុជា។
មុនចាកចេញពីប្រទេសកម្ពុជា លោក George EDGAR ឯកអគ្គរដ្ឋទូតសហភាពអឺរ៉ុបប្រចាំកម្ពុជាផុតអាណត្តិ បានជំរុញឲ្យរដ្ឋាភិបាលបន្តគោរព និងលើកកម្ពស់សិទ្ធិមនុស្សឡើងវិញ ដើម្បីរក្សាប្រព័ន្ធអនុគ្រោះ«អ្វីគ្រប់យ៉ាងលើកលែងតែអាវុធ(EBA)។លោក George EDGAR បានបន្ថែមថា ក្នុងករណីប្រទេសកម្ពុជាអាចស្ដារស្ថានភាពល្អប្រសើរឡើងវិញ នោះកម្ពុជានឹងអាចបន្តទទួលបានប្រព័ន្ធអនុគ្រោះពន្ធពាណិជ្ជកម្ម រហូតដល់ឆ្នាំ២០២៥។
ករណីមានការព្យួរការអនុគ្រោះពន្ធ EBA ពីកម្ពុជា នោះការនាំចេញនឹងអាចធ្លាក់ចុះ ដែលគិតជាទឹកប្រាក់ចន្លោះប្រមាណ ៥១៣លានដុល្លារ ទៅ ៦៥៤លានដុល្លារក្នុងមួយឆ្នាំ។ ការគណនានេះ ដោយផ្អែកតួលេខនៃនាំចេញទៅ EU ឆ្នាំ២០១៨ ទំហំ ៤៣៤០លានដុល្លារ នៃផលិតផលសម្លៀកបំពាក់ ស្បែកជើង និងអង្ករ ដោយមិនគិតផលិតផលកង់។ គួរបញ្ជាក់ថា គ្រាន់តែសម្លៀកបំពាក់ កាន់ទំហំដល់ទៅ ៨០ភាគរយនៃការនាំចេញសរុបរបស់កម្ពុជាទៅ EU ។
ប្រសិនបើកម្ពុជាបាត់បង់ EBA អ្នករងគ្រោះពិតប្រាកដគឺពលរដ្ឋក្រីក្រ ជាពិសេសអ្នកធ្វើការក្នុងវិស័យកាត់ដេរ ។ នេះបើតាមការយល់ឃើញរបស់លោក George EDGAR ឯកអគ្គរដ្ឋទូតសហភាពអឺរ៉ុបប្រចាំកម្ពុជាផុតអាណត្តិ៕