ខ្មែរក្រហម
ជាតិ
លោក មាស មុត នាបទសម្ភាសជាមួយអ្នកសារព័ត៌មាននៅអន្លង់វែង កាលពីឆ្នាំ២០០៦។ រូបថត AFP
×![]()
ដោយ: ថ្មីៗ
អង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា នឹងចាប់ផ្តើមសវនាការរយៈពេល៣ថ្ងៃ ក្នុងសំណុំរឿង០០៣ ប្រឆាំង មាស មុត ចាប់ពីថ្ងៃទី២៧ ខែវិច្ឆិកា ឆ្នាំ២០១៩។ នេះបើតាមការសេចក្តីប្រកាសព័ត៌មានរបស់សាលាក្តីខ្មែរក្រហមនាថ្ងៃទី២០ ខែវិច្ឆិកា។
មាស មុត បច្ចុប្បន្នអាយុ៧៩ឆ្នាំ ដែលមានកំណើតនៅស្រុកឈូក ខេត្តកំពត ជាអតីតសមាជិកគណៈមជ្ឈឹម លេខាធិការរង លេខាកងពល១៦៤ (រាប់បញ្ចូលទាំងកងទ័ពជើងទឹក) លេខាស្វយ័តកំពង់សោម។ អតីតមេដឹកនាំមូលដ្ឋានរបស់ខ្មែរក្រហមរូបនេះ ត្រូវបានដាក់ឈ្មោះថាជាជនសង្ស័យក្នុងសំណុំរឿង០០៣។
នាខែមិនា ឆ្នាំ២០១៥ លោក មាស មុត ត្រូវបានចោទប្រកាន់ដោយកំបាំងមុខតែម្នាក់ឯង ដោយសារការស៊ើបអង្កេតរបស់តុលាការប្រឆាំង លោក ស៊ូ ម៉េត ត្រូវបានបញ្ចប់នៅថ្ងៃទី២ ខែមិថុនា ឆ្នាំ២០១៥ បន្ទាប់ពីបុគ្គលរូបនេះបានស្លាប់។
មេធាវីការពារក្តីរបស់ មាស មុត មានលោក អាង ឧត្តម (កម្ពុជា) និងលោក ម៉ៃឃើល កាណាវាស (អាមេរិក)។ ក្នុងសំណុំរឿង០០៣នេះ មាស មុត រងការចោទប្រកាន់ពីអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ អំពើបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ឆ្នាំ១៩៤៩ និងការរំលោភលើក្រមព្រហ្មទណ្ឌកម្ពុជា ឆ្នាំ១៩៥៦ ។
ឧក្រិដ្ឋកម្មទាំងនេះត្រូវបានចោទថាបានប្រព្រឹត្តផ្សេងៗគ្នា ដូចជា មន្ទីរសន្តិសុខ ស-២១ (ទួលស្លែង), មន្ទីរសន្តិសុខ វត្តឥន្ទញាណ, ការដ្ឋានស្ទឹងហាវ សហករណ៍តំបន់រាម រួមមាន ការដ្ឋាននៅកងកេង និងបិតត្រាំង ទីតាំងសម្លាប់មនុស្សចម្ការធូរេន និងមន្ទីរសន្តិសុខទឹកសាប ជាពិសេសនៅកំពង់សោម (ខេត្តព្រះសីហនុ) តែម្តង។
សកម្មភាពឧក្រិដ្ឋទាំងនោះ មានដូចជា ឧក្រិដ្ឋកម្មលើសមាជិកកងពលលេខ ១៦៤, ៥០២, ១១៧ និង ៣១០ ឧក្រិដ្ឋកម្មដែលបានប្រព្រឹត្តឡើងដោយកងទ័ពជើងទឹកកម្ពុជាប្រជាធិបតេយ្យនៅលើកោះ និងជុំវិញកោះដែលកម្ពុជាប្រជាធិបតេយ្យ អះអាងថាជារបស់ខ្លួន។
សវនាការចាប់ផ្តើមនៅថ្ងៃទី២៧ ហើយនឹងបន្តទៅថ្ងៃទី២៨ និងទី២៩ ខែវិច្ឆិកា។ ប្រសិនបើចាំបាច់ ចៅក្រមនឹងតាំងសំណួរដល់ភាគីនានាជាសាធារណៈនៅថ្ងៃទី២៩ ខែវិច្ឆិកា ឆ្នាំ២០១៩ មុនពេលបញ្ចប់សវនាការ៕
Tag:
មាស មុត
© រក្សាសិទ្ធិដោយ thmeythmey.com
