ជាតិ
សង្គមជាតិ
ក្រសួងមុខងារសាធារណៈ កំណត់មិនឲ្យមន្ត្រីរាជការចូលនិវត្តន៍ មុនអាយុ៦០ឆ្នាំឡើយ
រូបភាពពីក្រសួងមុខងារសាធារណៈ
×![]()
ភ្នំពេញ៖ ក្រសួងមុខងារសាធារណៈ បានប្រកាសឲ្យមន្ត្រីគ្រប់ក្រសួង ស្ថាប័ន អភិបាលនៃគណៈអភិបាលរាជធានី -ខេត្ត គ្រប់ជាន់ថ្នាក់ទាំងអស់ ដែលកំពុងបម្រើការងារនៅតាមស្ថាប័នរបស់ខ្លួន ត្រូវបម្រើការងារដល់អាយុ៦០ឆ្នាំ ទើបអាចចូលនិវត្តន៍បាន។ នេះបើតាមសេចក្តីជូនដំណឹងរបស់ក្រសួងមុខងារសាធារណៈ នៅថ្ងៃទី២១ ខែវិច្ឆិកា។
ក្រសួងមុខងារសាធារណៈ ដែលបានអនុលោមតាមមាត្រា២៦ នៃច្បាប់ស្តីពីរបបសន្តិសុខសង្គម បានសង្កត់ធ្ងន់ថា គ្រប់មន្ត្រីរាជការស៊ីវិល ដែលស្ថិតនៅក្រោមបទប្បញ្ញត្តិនៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៅក្នុងប្រភេទក្របខណ្ឌណាក៏ដោយ ត្រូវចាំបាច់បម្រើការងារដល់អាយុ៦០ឆ្នាំដែរ។
ក្រសួងមុខងារសាធារណៈ បានបញ្ជាក់ដូច្នេះថា៖«អនុលោមតាមមាត្រា១០៧នៃច្បាប់ស្តីពីរបបសន្តិសុខសង្គម ចែងថា ច្បាប់នេះត្រូវបានប្រកាសជាការប្រញាប់ ចាប់ពីខែវិច្ឆិកា ឆ្នាំ២០១៩នេះតទៅ ក្រសួងនឹងរក្សាទុកមន្ត្រីរាជការស៊ីវិលដែលមានក្របខណ្ឌ«ខ» និង«គ»ឲ្យបម្រើការងារបន្តទៀតរហូតដល់អាយុ៦០ឆ្នាំ»។
ចំពោះមន្ត្រីរាជការស៊ីវិលក្របខណ្ឌ «ខ» និង«គ» ដែលរៀបចំឲ្យចូលនិវត្តន៍ក្នុងខែវិច្ឆិកា ឆ្នាំ២០១៩មកនេះដែលមិនទាន់គ្រប់អាយុដល់៦០ឆ្នាំ ដែលក្រសួងបានផ្តល់ថវិកាចំនួន៨ខែដែលជាប្រាក់បៀវត្សមូលដ្ឋានកន្លងមកនេះ សូមឲ្យសាមីខ្លួនបង្វែរថវិកាចូលរដ្ឋវិញ និងបន្តបម្រើការងារក្នុងក្របខណ្ឌរបស់ខ្លួនវិញរហូតដល់អាយុ៦០ឆ្នាំ។ នេះជាការបញ្ជាក់របស់ក្រសួងមុខងារសាធរណៈ៕
Tag:
ក្រសួងមុខងារសាធារណៈ
មន្ត្រី
អាយុ
© រក្សាសិទ្ធិដោយ thmeythmey.com
