កូរ៉េខាងត្បូង នឹងបញ្ចប់កិច្ចព្រមព្រៀងសម្ងាត់យោធាជាមួយជប៉ុន

អន្តរជាតិ

កូរ៉េខាងត្បូង នឹងបញ្ចប់កិច្ចព្រមព្រៀងសម្ងាត់យោធាជាមួយជប៉ុន

22, Nov 2019 , 9:59 pm

រូបភាព

ប្រធានាធិបតីកូរ៉េខាងត្បូងមូន ចេអ៊ីន (ខាងឆ្វេង) ចាប់ដៃជាមួយនឹងលោកនាយករដ្ឋមន្រ្តីជប៉ុន ស៊ិនហ្សូ អាបេ, រូបភាព៖ AFP

ដោយ: ធៀន ភារិន្ទ

កូរ៉េខាងត្បូង នឹងដើរចេញពីកិច្ចព្រមព្រៀងសម្ងាត់យោធា ឬGSOMIA ជាមួយជប៉ុន នៅថ្ងៃទី២៣ ខែវិច្ឆិកានេះ បន្ទាប់ពីប្រទេសពីរមានមានជម្លោះពាណិជ្ជកម្ម និងប្រវត្តិសាស្ត្រជាមួយគ្នា។

តាមរយៈលិខិតមួយច្បាប់ ដែលបានដាក់ទៅជប៉ុនកាលពីខែសីហា ទីក្រុងសេអ៊ូល បានព្រមានថា ខ្លួនអាចនឹងដើរចេញពីកិច្ចព្រមព្រៀងសម្ងាត់យោធារវាងជប៉ុន-កូរ៉េខាងត្បូង ដែលបណ្តាលមកពីជប៉ុន បានរឹតត្បិតលើការនាំចេញធាតុកម្របីប្រភេទទៅកូរ៉េខាងត្បូង និងជម្លោះប្រវត្តិសាស្ត្រ។ ប្រសិនបើគ្មានអ្វីប្រែប្រួលទេ កិច្ចព្រមព្រៀងសម្ងាត់យោធា ឬ GSOMIA រវាងកូរ៉េខាងត្បូង-ជប៉ុន នឹងត្រូវបញ្ចប់ក្នុងថ្ងៃទី២៣ ខែវិច្ឆិកាដោយស្វ័យប្រវត្តិតែម្ដង បើគ្មានការបន្តសុពលភាពទេនោះ។

ទាក់ទងទៅនឹងការដោះស្រាយបញ្ហាមួយនេះ ភាគីទាំងពីរនៅតែមានការខ្វែងគំនិតគ្នា។ ជាក់ស្តែងកូរ៉េខាងត្បូង បានទាមទារឲ្យជប៉ុនដកចោលការរឹតត្បិតការនាំចេញជាមុនសិន។ នៅក្នុងសភា លោក Kang Kyung-wha រដ្ឋមន្ត្រីក្រសួងការបរទេសកូរ៉េខាងត្បូង បានលើកឡើងថា ប្រសិនបើទីក្រុងតូក្យូមិនផ្លាស់ប្តូរឥរិយាបថរបស់ខ្លួនទេ សេអ៊ូល នឹងមិនផ្លាស់ប្តូរការគិតរបស់ខ្លួនឡើយ។

ដោយលើកឡើងស្រដៀងទៅនឹងប្រមុខការទូតកូរ៉េខាងត្បូងដែរ លោក Kang Gi-jung លេខាធិការជាន់ខ្ពស់របស់លោកមូន ចេអ៊ីន ទទួលបន្ទុកកិច្ចការនយោបាយ បានបញ្ជាក់យ៉ាងដូច្នេះថា ជប៉ុនមិនបានទទួលស្គាល់កំហុសរបស់ខ្លួនឡើយ ហើយថែមទាំងព្យាយាមធ្វើឲ្យកូរ៉េខាងត្បូងលើកទង់សទៀត ប៉ុន្តែអ្វីៗនៅតែដំណើរការល្អដដែល។ នេះបើតាមចុះផ្សាយរបស់ទីភ្នាក់ងារព័ត៌មានYonhap។

ចំណែកភាគីជប៉ុនវិញ បានត្រឹមតែអំពាវនាវឲ្យភាគីកូរ៉េខាងត្បូងរក្សាកិច្ចព្រមព្រៀងសម្ងាត់យោធាឲ្យនៅដដែល ដើម្បីការពារពីការគំរាមកំហែងរបស់កូរ៉េខាងជើង។ លោក Taro Kono រដ្ឋមន្ត្រីការពារជាតិជប៉ុន បានអះអាងថា ការបញ្ចប់កិច្ចព្រមព្រៀងមួយនេះ មិនបានប៉ះពាល់ដល់ជប៉ុនឡើយ ផ្ទុយទៅវិញ វាជាការផ្តល់សញ្ញាវិជ្ជមានដល់កូរ៉េខាងជើងទៅវិញទេ។ ទន្ទឹមនេះ លោក Taro ក៏បានទទូចឲ្យកូរ៉េត្បូង ពិចារណាឲ្យបានល្អិតល្អន់ផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

សូមបញ្ជាក់ថា កិច្ចព្រមព្រៀងព័ត៌មានសម្ងាត់យោធារវាងកូរ៉េខាងត្បូង- ជប៉ុន បានចាប់ផ្តើមឡើងនៅក្នុងឆ្នាំ ២០១៦ បន្ទាប់ពីមានការគំរាមកំហែងពីសំណាក់កូរ៉េខាងជើង។ មួយរយៈចុងក្រោយនេះ វិបត្តិរវាងជប៉ុន និងកូរ៉េខាងត្បូង គឺកើតចេញពីសាលក្រមកូរ៉េខាងត្បូង ដែលបង្ខំឲ្យក្រុមហ៊ុនជប៉ុនបង់សំណងទៅជនរងគ្រោះ ដែលត្រូវបានបង្ខំឲ្យធ្វើការក្នុងសម័យអាណានិគម និងបញ្ហាទីក្រុងតូក្យូរឹតត្បិតការនាំចេញធាតុគីមីសំខាន់ៗបីប្រភេទទៅកូរ៉េខាងត្បូង៕