អន្តរជាតិ
កូរ៉េខាងត្បូង សម្រេចចិត្តមិនបញ្ចប់កិច្ចព្រមព្រៀងចែកព័ត៌មានសម្ងាត់ជាមួយជប៉ុនវិញ
× នៅថ្ងៃទី២២ ខែវិច្ឆិកា ប៉ុន្មានម៉ោងមុនកិច្ចព្រមព្រៀងចែករំលែកព័ត៌មានសម្ងាត់ជាមួយតូក្យូអស់សុពលភាព ទីក្រុងទីក្រុងសេអ៊ូល ក៏បែរជាប្រកាសបន្តអនុវត្តកិច្ចព្រមព្រៀងនេះទៀត។ ការសម្រេចចិត្តរបស់សេអ៊ូល បានស្រោចស្រង់កិច្ចព្រមព្រៀងព័ត៌មានសន្តិសុខយោធាទូទៅ (GSOMIA) ដែលជាកិច្ចព្រមព្រៀងផ្ដល់ព័ត៌មានសម្ងាត់ឲ្យគ្នាទៅវិញទៅមករវាងអ្នកជិតខាងទាំងពីរ និងអាមេរិក ខណៈដែលការប្រឈមមុខជាមួយកូរ៉េខាងជើងកើនឡើង។
កិច្ចព្រមព្រៀងព័ត៌មានសន្តិសុខយោធាទូទៅ (GSOMIA) រវាងកូរ៉េខាងត្បូង និងជប៉ុន នឹងត្រូវអស់សុពលភាពនៅពាក់កណ្ដាលយប់ថ្ងៃទី២២ ខែវិច្ឆិកា។ ទំនាស់ប្រវត្តិសាស្ត្រដែលនាំឲ្យផ្ទុះការរឹតត្បិតផ្នែកពាណិជ្ជកម្មរវាងភាគីទាំងពីរ បានធ្វើឲ្យកិច្ចព្រមព្រៀងសម្ងាត់ដ៏សំខាន់នេះ ឈានដល់ដង្ហើមចុងក្រោយ។ ពីដំបូង កូរ៉េខាងត្បូងប្រកាសថា ខ្លួន នឹងមិនបន្តសុពលភាពដល់កិច្ចព្រមព្រៀងនេះទៀតឡើយ បើជប៉ុនមិនដកការរឹតត្បិតរបស់ខ្លួនទេនោះ។
ប៉ុន្តែបន្ទាប់ពីមានការចរចាការទូតនៅពេលចុងក្រោយ កូរ៉េខាងត្បូងក៏ប្ដូរចិត្តវិញ។ ៦ម៉ោងមុនកិច្ចព្រមព្រៀងអស់សុពលភាព សេអ៊ូលប្រកាសផ្អាកការអស់សុពលភាពនៃកិច្ចព្រមព្រៀងនេះ ដោយមានភ្ជាប់លក្ខខណ្ឌ។ អនុប្រធានការិយាល័យក្រុមប្រឹក្សាសន្តិជាតិកូរ៉េខាងត្បូង Kim You-geun និយាយថា កូរ៉េខាងត្បូងនៅតែអាចផ្អាកកិច្ចព្រមព្រៀងនេះគ្រប់ពេល។ លោកបន្តថា រដ្ឋាភិបាលក្រុងតូក្យូ ក៏យល់ពីបញ្ហានេះផងដែរ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
ទន្ទឹមនឹងការផ្អាកការបញ្ចប់កិច្ចព្រមព្រៀងព័ត៌មានសម្ងាត់ សេអ៊ូល ក៏ផ្អាកដំណើរការញ្ញត្តិតវ៉ានៅអង្គការពាណិជ្ជកម្មពិភពលោក (WTO) ពាក់ព័ន្ធការរឹតត្បិតការនាំចេញទៅកាន់កូរ៉េខាងត្បូងដោយជប៉ុន ដោយភាគីទាំងពីរបន្តចរចាលើគោលនយោបាយរបស់ជប៉ុនទៀត។ បើតាមលោក Kim សេអ៊ូល និងតូក្យូ ឯកភាពគ្នាឲ្យក្រុមចរចាថ្នាក់ក្រុមការងារបន្តការចរចាទៀតដើម្បីស្វែងរកច្រកចេញ។
ការផ្អាកដោយមានលក្ខខណ្ឌលើកិច្ចព្រមព្រៀងសម្ងាត់ និងដំណើរការនៅ WTO នឹងផ្ដល់ឱកាសឲ្យភាគីទាំងជជែកពីបញ្ហាសំខាន់ដែលមិនត្រូវគ្នាដូចជាទំនាស់ពាណិជ្ជកម្ម និងប្រវត្តិសាស្ត្ររឿងតុលាការកូរ៉េខាងត្បូងឲ្យជប៉ុនសងសំណងពលករកូរ៉េខាងត្បូងដែលដើមចមសំខាន់នៃបញ្ហា។ សេអ៊ូល និងតូក្យូ កំពុងញាប់ដៃជើងដើម្បីរៀបចំជំនបួប្រមុខការទូតនៅទឹកដីជប៉ុន ហើយបើការចរចាល្អ ជំនួបថ្នាក់ដឹកនាំក៏អាចកើតឡើងផងដែរ។
ឯទីក្រុងតូក្យូវិញ រដ្ឋមន្ត្រីការពារជាតិជប៉ុន តារ៉ូ កូណូ និយាយថា ការសម្រេចចិត្តរបស់កូរ៉េខាងត្បូង ជារឿងបណ្ដោះអាសន្នប៉ុណ្ណោះ ហើយសេអ៊ូលត្រូវបន្តកិច្ចព្រមព្រៀងនេះដោយអាកប្បកិរិយាម៉ឺងម៉ាត់។ ចំណែកនាយករដ្ឋមន្ត្រី ស៊ិនហ្សូ អាបេ វិញ ចាត់ទុកកិច្ចពិភាក្សាត្រីភាគីជប៉ុន-កូរ៉េខាងត្បូង-អាមេរិក ជារឿងសំខាន់ ហើយថា ការសម្រេចចិត្តខាងលើរបស់សេអ៊ូល កើតចេញពីគំនិតយុទ្ធសាស្ត្រតែម្ដង៕
Tag:
កូរ៉េខាងត្បូង
ជប៉ុន
អាមេរិក
© រក្សាសិទ្ធិដោយ thmeythmey.com