លោក Felix Dalmas៖ ទោះ​ជួប​បញ្ហា​ខ្លះ​ពេលទៅដល់​ហ្វីលីពីន តែ​កម្ពុជា​អាច​សម្រប​ខ្លួន​បានល្អ​
កីឡាជាតិ
ជាតិ
លោក Felix Dalmas៖ ទោះ​ជួប​បញ្ហា​ខ្លះ​ពេលទៅដល់​ហ្វីលីពីន តែ​កម្ពុជា​អាច​សម្រប​ខ្លួន​បានល្អ​
24, Nov 2019 , 3:37 pm        
រូបភាព
លោក Felix Dalmas គ្រូបង្វឹកក្រុមជម្រើសជាតិកម្ពុជា, រូបភាពពី FFC
លោក Felix Dalmas គ្រូបង្វឹកក្រុមជម្រើសជាតិកម្ពុជា, រូបភាពពី FFC
​គ្រូបង្វឹក​ក្រុម​ជម្រើសជាតិ​កម្ពុជា​លោក Felix Dalmas បាន​លើកឡើងថា ក្រុម​កម្ពុជា​បាន​ព្យាយាម​សម្រប​ខ្លួន​តាម​ស្ថានការណ៍​ជាក់ស្តែង​បានល្អ ទោះបី​ជួប​បញ្ហា​មួយចំនួន​ពេលទៅដល់​ហ្វីលីពីន​ក៏ដោយ​។ បញ្ហា​មួយចំនួន​នោះ គឺ​ការ​បដិសណ្ឋារកិច្ច​មិនបាន​ល្អ​ពី​សំណាក់​ម្ចាស់ផ្ទះ​ស៊ី​ហ្គេម​ហ្វីលីពីន​។ តែ​យ៉ាងណា លោក​អះអាងថា កម្ពុជា​បាន​ត្រៀមខ្លួន​រួចរាល់​ហើយ​ក្នុងការ​តទល់​ជាមួយ​ម្ចាស់ផ្ទះ​នៅ​ថ្ងៃទី​២៥ ខែវិច្ឆិកា ឆ្នាំ​២០១៩​។

 
​ក្រុមបាល់ទាត់​ជម្រើសជាតិ​កម្ពុជា​បាន​ជួប​បញ្ហា​មួយចំនួន​ពេលទៅដល់​ហ្វីលីពីន នៅ​ថ្ងៃទី​២៣ វិច្ឆិកា ដោយ​ពួកគេ​ត្រូវ​រង់ចាំ​យ៉ាងយូរ​នៅ​សណ្ឋាគារ ទម្រាំ​បាន​ចូល​បន្ទប់​សម្រាក​។ ទោះបី​យ៉ាងនេះ​ក្តី គ្រូបង្វឹក​ក្រុម​ជម្រើសជាតិ​កម្ពុជា​លោក Felix Dalmas បាន​និយាយថា ក្រុម​កម្ពុជា​សម្រប​ខ្លួន​តាម​ស្ថានការណ៍​ជាក់ស្តែង​បាន​យ៉ាង​ល្អ ដោយមាន​អ្នកខ្លះ​សម្រាក​លើ​សា​ឡុង និង​កម្រាល​ក្នុងអំឡុងពេល​រង់ចាំ​នៅ​សណ្ឋាគារ​។​
 
​គ្រូបង្វឹក​សញ្ជាតិ​អា​ហ្ស​ង់​ទីន​រូបនេះ​បាន​លើក​ពី​បញ្ហា​នៅក្នុង​សន្និសីទ​សារព័ត៌មាន​មុន​ការប្រកួត​នៅ​ថ្ងៃទី​២៤ វិច្ឆិកា​នេះ​យ៉ាង​ដូច្នេះ​ថា​៖«​ថ្វិ​ត្បិត​មាន​បញ្ហា​រអាក់រអួល​ជាច្រើន​ចំពោះ​ក្រុម​កម្ពុជា​យើង​តាំងពី​មកដល់​ទីនេះ​ពិន​មែន តែ​ក្រុម​យើង​អាច​ព្យាយាម​សម្រប​តាម​ស្ថានភាព​ជាក់ស្តែង​បានល្អ​»​។ 


 
​មិនមែន​មានតែ​កម្ពុជា​នោះទេ ក្រុម​ស្ថិតក្នុង​ពូ​ល​ជាមួយ​ម្ចាស់ផ្ទះ​ហ្វីលីពីន​ក្នុង​ព្រឹត្តិការណ៍​ស៊ី​ហ្គេម រួមមាន​ទី​ម័​រ​ខាងកើត មី​យ៉ាន់​ម៉ា និង​ថៃ ក៏​ជួប​បញ្ហា​ពេលទៅដល់​ហ្វីលីពីន​ដែរ​។ ក្រុមទី​ម័​រ​ខាងកើត​ត្រូវ​រង់ចាំ​៣​ម៉ោង​នៅ​ព្រលានយន្តហោះ ទម្រាំ​ឡាន​ដឹក​ពួកគេ​មកដល់​។ អ្វីដែល​កាន់តែ​ហួសចិត្ត​ទៀត​នោះ គឺ​ឡាន​ដឹក​កីឡា​ករទី​ម័​រ​ទៅ​ច្រឡំ​សណ្ឋាគារ​ទៀត​។ នេះ​បើតាម​ការផ្សាយ​របស់​សារព័ត៌មាន​ហ្វីលីពីន Manila Bulletin​។ 
 
​មិន​ខុសគ្នា​ឡើយ ក្រុម​មី​យ៉ាន់​ម៉ា​វិញ បាន​ត្អូញត្អែរ​ពី​ការរង់ចាំ​យូរ​នៅ​ព្រលានយន្តហោះ Ninoy Aquino​។ មី​យ៉ាន់​ម៉ា​ក៏​មិន​ពេញចិត្ត​រថយន្ត​ដឹក​កីឡាករ​ដែលមាន​ទំហំ​តូច ពិបាក​ដល់​កីឡាករ​ពួកគេ​។​
 
​ចំណែក​ម្ចាស់​ការពារ​មេដាយមាស​ដំរី​សឹក​ថៃ​វិញ ក៏​ប្រទះ​បញ្ហា​ដែរ​។ បើតាម Rappler ក្រុម​ថៃ​ត្អូញត្អែរ​ពី​ការខ្វះខាត​បន្ទប់ ដែល​បង្ខំ​ឲ្យ​កីឡាករ​ពួកគេ​បីនាក់​ត្រូវ​សម្រាក​ក្នុង​បន្ទប់​សម្រាប់​មនុស្ស​ពីរ​នាក់​។ ថៃ ក៏ត្រូវ​បង្ខំចិត្ត​លុបចោល​ការហ្វឹកហាត់​រប​ស់​ខ្លួន​ផងដែរ ព្រោះ​ទីលាន​ហ្វឹកហាត់​នៅ​ចម្ងាយ​ដល់​ទៅ​៣៨​គីឡូម៉ែត្រ​ពី​សណ្ឋាគារ​។ ចម្ងាយ​នេះ គេ​ត្រូវ​ចំណាយពេល​ធ្វើដំណើ​រយ៉ា​ង​ហោចណាស់​ក៏​ពីរ​ម៉ោង​ដែរ​។ ជំនួស​មកវិញ កីឡាករ​ថៃ​ត្រូវ​ហ្វឹកហាត់​នៅក្បែរ​សណ្ឋាគារ​ពួកគេ​។​
 
​បញ្ហា​បដិសណ្ឋារកិច្ច​នេះ ធ្វើ​ឲ្យ​ហ្វីលីពីន ដែលជា​ម្ចាស់ផ្ទះ​រៀបចំ​ព្រឹត្តិការណ៍​កីឡា​ស៊ី​ហ្គេម​នៅ​ឆ្នាំនេះ រង​ការរិះគន់​យ៉ាង​ចាស់ដៃ​។ ទង្វើ​នេះ​ជា​គំរូ​អាក្រក់ ដែល​ប្រទេស​ដទៃ​មិនគួរ​យកតម្រាប់​តាម ហើយ​វា​ក៏​ពុំគួរ​កើតមាន​សម្រាប់​ម្ចាស់ផ្ទះ​នៅ​លើក​ក្រោយៗ​ដែរ​។ 
 
​ទោះបី​ជួប​បញ្ហា​បែបនេះ​ក្តី តែ​វា​មិនជា​បញ្ហា​ធ្ងន់ធ្ងរ​ដល់​ក្រុម​ជម្រើសជាតិ​កម្ពុជា​ឡើយ​។ លោក Felix Dalmas អះអាងថា កម្ពុជា​បាន​ត្រៀម​យ៉ាង​ល្អ​ក្នុងការ​តទល់​ជាមួយ​ក្រុម​ម្ចាស់ផ្ទះ​ហ្វី​លីន នា​ជំនួប​បើកឆាក​ពូ​ល A ក្នុង​ព្រឹត្តិការណ៍​កីឡា​ស៊ី​ហ្គេម​នៅ​ថ្ងៃទី​២៥ ខែវិច្ឆិកា ឆ្នាំ​២០១៩ នា​កីឡដ្ឋាន Rizal Memorial Complex៕  

Tag:
 ក្រុម​ជម្រើសជាតិ​កម្ពុជា​
  Felix Dalmas
  SEA Games
© រក្សាសិទ្ធិដោយ thmeythmey.com