អន្តរជាតិ
សភា និងរដ្ឋាភិបាលវៀតណាម តតាំងគ្នាជុំវិញការក្តោបក្តាប់អំណាចពិនិត្យលើសេចក្តីព្រាងច្បាប់មុនពេលដាក់ឲ្យអនុម័តរួម
×![]()
អង្គនិតីបញ្ញត្តិ និងនិតីប្រតិបត្តិវៀតណាម បានមានការតតាំងគ្នាលើសំណើមួយរបស់រដ្ឋាភិបាល ដែលចង់កាត់បន្ថយអំណាចរបស់សភា តាមរយៈការយកតួនាទីជាអ្នកប្រមូលមតិយោបល់ និងពិនិត្យលើសេចក្តីព្រាងច្បាប់ទៅធ្វើដោយខ្លួនឯង។ សម្រាប់មន្ត្រីសភាវៀតណាម សំណើនេះ គឺជាការដើរថយក្រោយមួយជំហាននៃគោលការណ៍តុល្យភាពនៃអំណាច។
តាមការចុះផ្សាយរបស់សារព័ត៌មានវៀតណាម Vietnam News នៅថ្ងៃ២២ វិច្ឆិកា រដ្ឋសភាវៀតណាម បានសម្តែងការព្រួយបារម្ភលើសំណើធ្វើវិសោធនកម្មច្បាប់របស់រដ្ឋាភិបាលវៀតណាម ដែលចង់ឲ្យការទទួលខុសត្រូវលើការប្រមូលមតិយោបល់ និងការពិនិត្យលើសេចក្តីព្រាងច្បាប់នានា ស្ថិតក្រោមការគ្រប់គ្រងរបស់អ្នកផ្តួចផ្តើច ឬក្រសួងសាម៉ីតែម្តង។
កន្លងមកតាមប្រភពព័ត៌មានដដែលនេះ ការប្រមូលមតិយោបល់ ពិនិត្យឡើងវិញ និងសម្រេចចុងក្រោយលើសេចក្តីព្រាងច្បាប់ មុនពេលដាក់ឲ្យសភាអនុម័តសម្រេច គឺជាការទទួលខុសត្រូវរបស់គណៈកម្មាធិការមួយរបស់រដ្ឋសភានោះទេ។
សម្រាប់អ្នកតំណាងរាស្ត្រមួយរូបមកពីខេត្ត An Giang របស់វៀតណាម យល់ឃើញថា ប្រសិនបើរដ្ឋាភិបាល គឺជាអ្នកស្នើផង កែប្រែផង សម្រេចផង និងអនុវត្តច្បាប់ផង នោះវា នឹងផ្ទុយនឹងគោលការណ៍ហើយ ។ អ្នកតំណាងរាស្ត្រ បានប្រៀបធៀបដំណើរការនេះដូចទៅនឹង រដ្ឋាភិបាល គឺជាអ្នកទាត់បាល់ផង និងផ្លុំកញ្ចែផងក្នុងពេលតែមួយ។
បន្ថែមពីនេះ អ្នកតំណាងរាស្ត្រពីរដ្ឋធានីហាណូយ បានយល់ឃើញថា ប្រសិនបើរដ្ឋាភិបាលចង់បន្ថែមអំណាចទៅឲ្យអ្នកធ្វើច្បាប់ ដែលកន្លងមកភាគច្រើនជាក្រសួង នោះវានឹងប្រៀបដូចជាការដើរថយក្រោយក្នុងប្រវត្តិសាស្ត្រមួយនៃសភាវៀតណាមហើយ។ តាមអ្នកតំណាងរាស្ត្ររូបនេះ ការណ៍ដែលអំណាចនេះ ត្រូវផ្តល់ឲ្យគណៈកម្មាធិការរបស់សភា ដើម្បីធានាថារាល់នីតិវិធីធ្វើច្បាប់មិនមានលម្អៀង និងធ្វើឡើងដើម្បីផលប្រយោជន៍ប្រជាជននិងការធ្វើធុរកិច្ចជាដើម។
យ៉ាងណាមិញ តាមប្រភពព័ត៌មានដដែលនោះ មិនមានការបញ្ជាក់ពីគោលបំណង និងចេតនាជាក់លាក់របស់រដ្ឋាភិបាលវៀតណាម លើសំណើធ្វើវិសោធនកម្មច្បាប់ពាក់ព័ន្ធនឹងសមត្ថកិច្ចសភាវៀតណាមនោះឡើយ ហើយសំណើនេះ ក៏មិនទាន់អនុម័តពីសភាវៀតណាមនៅឡើយផងដែរ៕
Tag:
វៀតណាម
អាស៊ាន
© រក្សាសិទ្ធិដោយ thmeythmey.com
