ជាតិ
សត្វក្រៀលជិតផុតពូជ៥ក្បាល ចូលរស់នៅ ក្នុងតំបន់បឹងព្រែកល្ពៅ ខេត្តតាកែវ
រូបថតពី BirdLife International Cambodia
×![]()
ភ្នំពេញ៖ សត្វក្រៀលដែលជិតផុតពូជចំនួន៥ បានចូលមករស់នៅ ក្នុងតំបន់ការពារទេសភាពបឹងព្រែកល្ពៅ ខេត្តតាកែវ។ បើតាមលោក ប៊ូ វរសក្ស ប្រធានអង្គការជីវិតសត្វស្លាបអន្តរជាតិ (BirdLife International Cambodia) សត្វក្រៀលទាំងនេះ បានចូលមករស់នៅ កាលពីថ្ងៃទី២០វិច្ឆិកា ឆ្នាំ២០១៩។
លោក ប៊ូ វរសក្ស ប្រាប់សារព័ត៌មានថ្មីៗ ថា សត្វក្រៀលទាំងនោះ តែងតែចល័តរស់នៅនិងរកចំណី នៅតំបន់ដីសើមតាមទន្លេមេគង្គ និងទន្លេសាប។ ដោយឡែក នៅរដូវពងកូន សត្វជិតផុតពូជនេះ នឹងផ្លាស់ទីទៅរស់នៅក្នុងតំបន់ដែលមានព្រៃច្រើន ត្រពាំង ស្ងប់ស្ងាត់ ក្នុងខេត្តព្រះវិហារ ស្ទឹងត្រែង និងខេត្តរតនគិរី ជាដើម។ លោក ប៊ូ វរសក្ស ជារៀងរាល់ឆ្នាំសត្វក្រៀល បានទាក់ទាញភ្ញៀវជាតិ និង អន្តរជាតិ ទៅទស្សនាជាប្រចាំ នៅតំបន់តំបន់ការពារទេសភាពអន្លង់ព្រីង ស្ថិតនៅស្រុកកំពង់ត្រាច ខេត្តកំពត។
ប្រធានអង្គការ BirdLife International Cambodiaរូបនេះ បានអះអាងថា បច្ចុប្បន្ន សត្វក្រៀលនៅកម្ពុជា គឺកំពុងស្ថិតនៅក្នុងស្ថានភាពរងគ្រោះ និងមានការថយចុះ គួរឲ្យបារម្ភ។ ជាមួយគ្នានេះ អង្គការ BirdLife International Cambodia និង ស្ថាប័នពាក់ព័ន្ធ ក៏បានចុះត្រួតពិនិត្យ និងតាមដាន ចំនួនប្រជាសាស្ត្រ ចំណី ជម្រក ការគ្រប់គ្រងទឹក ដើម្បីចូលរួមអភិរក្ស សត្វក្រៀល នៅកម្ពុជាផងដែរ។
សត្វក្រៀល គឺជាសត្វស្លាបមានកម្ពស់ខ្ពស់ជាងគេបង្អស់រហូតដល់១,៦៥ម៉ែត្រ។ វា រស់នៅតែក្នុងប្រទេសអូស្ត្រាលី កម្ពុជា ឥណ្ឌា ឡាវ មីយ៉ាន់ម៉ា ប៉ាគីស្ថាន នេប៉ាល់ និងវៀតណាមប៉ុណ្ណោះ៕
Tag:
សត្វក្រៀល
បឹងព្រែកល្ពៅ
តាកែវ
© រក្សាសិទ្ធិដោយ thmeythmey.com
