កីឡាជាតិ
ជាតិ
×![]()
ម្ចាស់ផ្ទះស៊ីហ្គេមហ្វីលីពីន សុំទោសចំពោះការបដិសណ្ឋារកិច្ចមិនបានល្អដោយបណ្តោយឲ្យកីឡាករ គ្រូបង្វឹករង់ចាំជាច្រើនម៉ោងនៅព្រលានយន្តហោះ និងការដឹកកីឡាករទៅខុសសណ្ឋាគារ ដែលនាំឲ្យមានការរិះគន់។ គណៈកម្មការរៀបចំការប្រកួតស៊ីហ្គេមហ្វីលីពីនអះអាងថា បញ្ហានេះបណ្តាលមកពីការផ្លាស់ប្តូរម៉ោងហោះហើរចុងក្រោយ និងបញ្ហាម៉ោង Check In របស់សណ្ឋាគារ។
គណៈកម្មការរៀបចំការប្រកួតកីឡាស៊ីហ្គេមរបស់ហ្វីលីពីន នៅថ្ងៃអាទិត្យ ទី២៤ វិច្ឆិកា នេះ បានចេញមកសុំទោសក្រុមបាល់ទាត់ ដែលជួបបញ្ហាពេលពួកគេមកដល់ហ្វីលីពីន។ ការសុំទោសនេះ ធ្វើឡើងក្រោយមានការរិះគន់លើការបដិសណ្ឋារកិច្ចរបស់ខ្លួន ពីសំណាក់ក្រុមបាល់ទាត់ដែលស្ថិតក្នុងពូលជាហ្វីលីពីន។ មូលហេតុដែលនាំឲ្យមានការរិះគន់ គឺបន្ទាប់ពីម្ចាស់ផ្ទះទុកឲ្យក្រុមបាល់ទាត់កម្ពុជា និងទីម័រខាងកើតរង់ចាំឡានជាច្រើនម៉ោងនៅព្រលានយន្តហោះ និងដឹកកីឡាករទៅខុសសណ្ឋាគារជាដើម។
បើតាមការចុះផ្សាយរបស់ AFP គណៈរៀបចំការប្រកួតកីឡាស៊ីហ្គេមរបស់ហ្វីលីពីន បានព្យាយាមពន្យល់លើបញ្ហាខាងលើដោយដាក់បន្ទុកលើការផ្លាស់ប្តូរម៉ោងហោះហើរចុងក្រោយ និងពេលវេលា Check In របស់សណ្ឋាគារ។ ពួកគេទុកបញ្ហានេះថា ជាការយល់ច្រឡំ។ «យើងសុំទោសដោយស្មោះដល់អត្តពលិកជាភ្ញៀវ សម្រាប់ភាពរញ៉េរញ៉ៃ ដែលនាំឲ្យពួកគេយល់ច្រឡំ»។ នេះជាការលើកឡើងរបស់គណៈកម្មការរៀបចំការប្រកួតស៊ីហ្គេមរបស់ហ្វីលីពីន ដែលអះអាងថា ពួកគេនឹងព្យាយាមធ្វើឲ្យបានល្អ។
ក្រុមបាល់ទាត់កម្ពុជា ទីម័រខាងកើត មីយ៉ាន់ម៉ា និងថៃ ដែលស្ថិតក្នុងពូល A ជាមួយម្ចាស់ផ្ទះហ្វីលីពីនបានទៅដល់ទឹកដីហ្វីលីពីនកាលពីថ្ងៃទី២៣ វិច្ឆិកា ដើម្បីរង់ចាំប្រកួតលើវិញ្ញាសាបុរសក្នុងព្រឹត្តិការណ៍កីឡាស៊ីហ្គេម។ ប៉ុន្តែមានបញ្ហាជាបន្តបន្ទាប់ពេលពួកគេទៅដល់ទឹកដីហ្វីលីពីន។
ក្រុមកម្ពុជាដែលជួបបញ្ហានៅព្រលានយន្តហើយនោះ បានចំណាយពេលជាច្រើនម៉ោង ដើម្បីរង់ចាំ Check In នៅសណ្ឋាគារមុនបានចូលបន្ទប់គេង។ ទាំងថ្នាក់ដឹកនាំ និងកីឡាករបាននាំគ្នាសម្រាកលើកម្រាល និងសាឡុងនៅកន្លែងរង់ចាំក្នុងសណ្ឋាគារ។
«យើងបានរង់ចាំប្រហែល៨ទៅ៩ម៉ោងពេលទៅដល់សណ្ឋាគារ»។ លោក Felix Dalmas គ្រូបង្វឹកក្រុមជម្រើសជាតិកម្ពុជាលើកឡើងដូច្នេះក្នុងសន្និសីទសារព័ត៌មានមុនការប្រកួតនៅថ្ងៃទី២៤ វិច្ឆិកា ដែលបានបន្ថែមថា ពួកគេក៏បានរង់ចាំជាច្រើនម៉ោងសម្រាប់ការដឹកជញ្ជូននៅព្រលានយន្តហោះផងដែរ។
មិនខុសគ្នាពីកម្ពុជានោះទេ ក្រុមទីម័រខាងកើត ត្រូវរង់ចាំឡានដឹកពួកគេយ៉ាងយូរពេលពួកគេទៅដល់ព្រលានយន្តហោះ។ កាន់តែហួសចិត្តឡានដឹកពួកគេទៅហុសសណ្ឋាគារទៀត ដែលធ្វើឲ្យកាលវិភាគនៃការមកដល់ និងហ្វឹកហាត់មានភាពរញ៉េរញ៉ៃ។ «គ្រប់ប្រទេសទាំងអស់សមនឹងទទួលបានការគោរពពីម្ចាស់ផ្ទះ ហើយរឿងដែលបានកើតឡើងកាលពីម្សិលមិញ(សៅរ៍) គឺមិនល្អនោះទេ»។ នេះជាការលើកឡើងរបស់លោក Fabiano Flora គ្រូបង្វឹកក្រុមទីម័រខាងកើត។
បញ្ហាខាងលើក៏បានកើតឡើងចំពោះក្រុមបាល់ទាត់ថៃ ផងដែរ។ បើតាម Rappler ក្រុមថៃត្អូញត្អែរពីការខ្វះខាតបន្ទប់ ដែលបង្ខំឲ្យកីឡាករពួកគេបីនាក់ត្រូវសម្រាកក្នុងបន្ទប់សម្រាប់មនុស្សពីរនាក់។ ថៃ ក៏ត្រូវបង្ខំចិត្តលុបចោលការហ្វឹកហាត់របស់ខ្លួនផងដែរ ព្រោះទីលានហ្វឹកហាត់នៅចម្ងាយដល់ទៅ៣៨គីឡូម៉ែត្រពីសណ្ឋាគារ។ ចម្ងាយនេះ គេត្រូវចំណាយពេលធ្វើដំណើរយ៉ាងហោចណាស់ក៏ពីរម៉ោងដែរ។ ជំនួសមកវិញ កីឡាករថៃត្រូវហ្វឹកហាត់នៅក្បែរសណ្ឋាគារពួកគេ។
រីឯក្រុមមីយ៉ាន់ម៉ាវិញ បានត្អូញត្អែរពីការរង់ចាំយូរនៅព្រលានយន្តហោះ Ninoy Aquino ។ មីយ៉ាន់ម៉ា ក៏មិនពេញចិត្តរថយន្តដឹកកីឡាករដែលមានទំហំតូច ពិបាកដល់កីឡាករពួកគេដែរ។
ទាក់ទងនឹងការត្អូញត្អែរបស់លោក Felix សណ្ឋាគារ Century Park Hotel បានបកស្រាយនៅលើទំព័រហ្វេសប៊ុករបស់ថា ក្រុមកម្ពុជាទៅលឿនពេក ដូច្នេះពួកគេមិនអាចឆ្លើយតប និងប្រគល់បន្ទប់បានភ្លាមៗឡើយ ដោយសារតែម៉ោង Check Out របស់ភ្ញៀវផ្សេង ត្រូវរង់ចាំរហូតដល់ម៉ោង១២ថ្ងៃត្រង់ ប៉ុន្តែក្រុមកម្ពុជាមកដល់តាំងពីម៉ោង៨ និង២៥នាទីពេលព្រឹក៕
Tag:
SEA Games
Felix Dalmas
ហ្វលីពីន
© រក្សាសិទ្ធិដោយ thmeythmey.com
