ជាតិ
វីដេអូ
«កន្ទេលស្លឹករំចេកព្រៃ»របស់ជនជាតិកួយអាចប្រើបាន១៥ឆ្នាំ តែប្រឈមនឹងលែងមានអ្នកចេះត្បាញ
×![]()
ភ្នំពេញ៖ ជនជាតិដើមភាគតិចកួយ នៅខេត្តកំពង់ធំ និយមយកស្លឹករំចេកព្រៃមកត្បាញជាកន្ទេល ដើម្បីប្រើប្រាស់។ អ្នកស្រី ជួប នឹម ដែលកំពុងអង្គុយត្បាញកន្ទេលស្លឹករំចេកព្រៃនេះ បានឲ្យដឹងថា កន្ទេលនេះ កាន់តែប្រើកាន់តែទន់រលោង និងអាចប្រើបានរហូតដល់ទៅ១៥ឆ្នាំ។ បទពិសោធជាង៣០ឆ្នាំនៃមុខរបរប្រពៃណីមួយនេះ ស្ត្រីវ័យ៦៥ឆ្នាំ ជួប នីម កំពុងបារម្ភពីការបាត់បង់មុខរបរត្បាញកន្ទេលនេះ ដោយសារព្រៃកាន់តែរេចរឹលដែលធ្វើឲ្យពិបាករកសឹ្លករំចេក។ ម្យ៉ាងទៀត យុវជនជំនាន់ក្រោយលែងចង់បន្តមុខរបរនេះពីឪពុកម្តាយរបស់ពួកគេ ព្រោះត្រូវចំណាយពេលច្រើនថ្ងៃ និងលក់បានតម្លៃទាបជាងទៅស៊ីឈ្នួលធ្វើការឲ្យគេ។
សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មាន ThmeyThmey ជាមួយអ្នកស្រី ជួប នីម បទពិសោធត្បាញកន្ទេលស្លឹករំចេកជាង៣០ឆ្នាំ ដូចតទៅ៖
ដៃកំពុងត្បាញកន្ទេលស្លឹករំចេកព្រៃ នៅក្នុងពិព័រណ៍ផលិតផល និងម្ហូបអាហារជនជាតិដើមភាគតិច កាលពីចុងខែតុលា ឆ្នាំ២០១៩ នេះ អ្នកស្រី ជួប នីម ជនជាតិដើមភាគតិចកួយ រស់នៅខេត្តកំពង់ធំ បានឲ្យដឹងថា កន្ទេលស្លឹករំចេកព្រៃ អាចប្រើបានយូរជាងកន្ទេលស្លឹករំចេកស្រុក ពោលគឺកន្ទេលស្លឹករំចេកព្រៃ ប្រើកាន់តែយូរកាន់តែទន់រលោង និងអាចប្រើបានរហូតជាង១៥ឆ្នាំ។ បទពិសោធត្បាញកន្ទេលជាង៣០ឆ្នាំ អ្នកស្រី ជួប នីម បានពន្យល់យ៉ាងដូច្នេះថា ស្លឹករំចេកព្រៃទន់ងាយត្បាញជាងស្លឹករំចេកស្រុក ម្យ៉ាងទៀត ស្លឹករំចេកព្រៃមានជាតិសរសៃធន់នឹងកម្ដៅថ្ងៃ និងរឹងមាំល្អ។
ទោះបីកន្ទេលស្លឹករំចេកព្រៃនេះ ប្រើបានយូរក៏ដោយ ប៉ុន្តែ ស្ត្រីជនជាតិដើមភាគតិចកួយវ័យ៦៥ឆ្នាំ រូបនេះ កំពុងបារម្ភខ្លាចបាត់បង់មុខរបរប្រពៃណីត្បាញកន្ទេលនេះ ខណៈដែលកូនចៅជំនាន់ក្រោយពុំសូវមានអ្នកចេះត្បាញ។ អ្នកស្រីបានឲ្យដឹងដូច្នេះថា ពិបាករករំចេកដោយត្រូវទៅកាប់នៅក្នុងព្រៃជ្រៅ ដែលមានចំងាយ២០ទៅ៣០គីឡូម៉ែត្តពីផ្ទះប្រជាជន ហើយការត្បាញត្រូវចំណាយពេលប្រមាណ១០ថ្ងៃទើបរួច ដែលអាចលក់បានក្នុងតម្លៃតែ៧-៨ម៉ឺនប៉ុណ្ណោះ។ មូលហេតុទាំងនេះ អ្នកស្រី នីម បញ្ជាក់ថា កូនចៅរបស់អ្នកស្រី និងយុវជនផ្សេងទៀត គេមិនសូវចាប់អារម្មណ៍ត្បាញកន្ទេលនេះទេ ហើយគេទៅធ្វើការស៊ីឈ្នួលគេវិញ អាចរកប្រាក់បាន២-៣ម៉ឺនរៀលក្នុងមួយថ្ងៃ។
ក្រៅពីយកស្លឹករំចេកធ្វើជាកន្ទេល ជនជាតិដើមភាគតិចកួយ ក៏បានយកស្លឹករំចេកនេះ ធ្វើជាស្រោមខ្នើយ និងការ៉ុងសម្រាប់ដាក់អង្ករ និងគ្រាប់ធញ្ញជាតិផងដែរ៕
Tag:
ស្លឹករំចេក
អាយុ
ជនជាតិភាគតិច
© រក្សាសិទ្ធិដោយ thmeythmey.com
