អន្តរជាតិ
មេបង្ក្រាបគ្រឿងញៀនហ្វីលីពីន អស់តំណែងក្រោយធ្វើការគ្មានពិគ្រោះជាមួយប្រធានាធិបតី លោកស្រី Leni Robredo ដែលជាអនុប្រធានាធិបតីហ្វីលីពីន ហើយក៏ទើបព្រមទទួលយកតំណែងជាអ្នកមើលការខុសត្រូវយុទ្ធនាការបង្ក្រាបគ្រឿងញៀន កាលពីជាង២សប្ដាហ៍មុន (ឆ្វេង) និង លោកប្រធានាធិបតីហ្វីលីពីន រ៉ូឌ្រីហ្កោ ឌូទើតេ (Reuters)
× ប្រធានាធិបតីហ្វីលីពីន លោក រ៉ូឌ្រីហ្កោ ឌូទើតេ បានសម្រេចបណ្តេញលោកស្រី Leni Robredo ដែលជាអនុប្រធានាធិបតី ពីតួនាទីប្រមុខដឹកនាំយុទ្ធនាការបង្ក្រាបគ្រឿងញៀន។ បើតាមអ្នកអ្នកនាំពាក្យ រដ្ឋាភិបាលហ្វីលីពីន ទម្លាក់កំហុសដាក់លោកស្រីថាមើលស្រាលគោលនយោបាយនេះ ដោយអះអាងថា លោកស្រីអនុវត្តគម្រោងដោយខ្វះកិច្ចពិភាក្សាជាមួយលោកប្រធានាធិបតី។
លោកស្រី Leni Robredo ដែលជាគូប្រជែងនយោបាយម្នាក់របស់លោកប្រធានាធិបតី ឌូទើតេ ព្រមទទួលយកតំណែងជាអ្នកមើលការខុសត្រូវយុទ្ធនាការបង្ក្រាបគ្រឿងញៀន កាលពីជាង២សប្ដាហ៍មុន ។ ការយល់ព្រមនេះដែរ ធ្វើឡើងទោះបីជាដៃគូនយោបាយលោកស្រីឲ្យយោបល់ថា ការប្រគល់តួនាទីនេះ គឺជាអន្ទាក់របស់លោក ឌូទើតេ ក្នុងគោលដៅបង្ខូចកេរ្តិ៍ឈ្មោះលោកស្រីប៉ុណ្ណោះ។
ដូចការគិតទុកមែន លោកប្រធានាធិបតីហ្វីលីពីន តាមរយៈអ្នកនាំពាក្យ លើកឡើងហេតុផលនៃការសម្រេចដកហូតតំណែងលោកស្រី ដោយអះអាងថា នោះគឺដោយសារតែជំនួបរបស់លោកស្រីអនុប្រធានាធិបតី Robredo ជាមួយសម្ងាត់ជាមួយមន្ត្រីរបស់អង្គការសហប្រជាជាតិ និងស្ថានទូតអាមេរិកប្រចាំរដ្ឋធានីម៉ានីល។
ក្នុងសេចក្តីថ្លែងការណ៍នៅថ្ងៃអាទិត្យ ២៤វិច្ឆិកា អ្នកនាំពាក្យប្រធានាធិបតី លោក Salvador Penelo គូសបញ្ជាក់ទៀតនេះ មូលហេតុមួយទៀតនោះគឺថា លោកស្រី Robredo បានបរាជ័យក្នុងការពិភាក្សាជាមួយលោកប្រធានាធិបតីជុំវិញផែនការទប់ទល់បញ្ហាគ្រឿងញៀនរបស់ហ្វីលីពីន ហើយសង្កត់ធ្ងន់ថា លោកឌូទើតេ បានខំមាត់អត់ធ្មត់ចំពោះទង្វើរបស់លោកស្រី។ លោក បន្តថា ក្នុងយុទ្ធនាការដែលជីវិតមនុស្ស ប្រឈមហានិភ័យ ពេលមួយថ្ងៃគឺយូរណាស់។ ម្ល៉េះហើយ រដ្ឋាភិបាល ពុំអាចឱបដៃឈរមើល ដោយអង្គុយរង់ចាំក្តីសង្ឃឹមពីលោកស្រីឡើយ។
ឲ្យពិតទៅ សង្គ្រាមប្រឆាំងគ្រឿងញៀន ដែលជាគោលនយោបាយស្នូលក្នុងរដ្ឋបាលលោក ឌូទើតេ ទទួលរងការរិះគន់យ៉ាងចាស់ដៃពីសំណាក់សហគមន៍អន្តរជាតិ។ នោះក៏ព្រោះតែ ប៉ូលិសបានសម្លាប់ជនសង្ស័យពាក់ព័ន្ធគ្រឿងញៀនរាប់ពាន់នាក់ក្រៅប្រព័ន្ធតុលាការ គិតចាប់ពីយុទ្ធនាការនេះ បានចាប់ផ្តើមមក។
លោកស្រីអនុប្រធានាធិបតី Robredo បានធ្វើឲ្យលោកឌូទើតេ ខឹងសម្បារខ្លាំងក្រោយពីលោកស្រីបន្តរិះគន់ចំណាត់ការបង្ក្រាបគ្រឿងញៀនរបស់លោក ដោយប្រើកម្លាំងធម៌ក្តៅប៉ូលិសជាធំ ដែលបង្កឲ្យមនុស្សរាប់ពាន់នាក់ស្លាប់។ ទាក់ទិនរឿងនេះ ក្រុមអង្គការសិទ្ធិមនុស្ស លើកឡើងថា ជនរងគ្រោះភាគច្រើន គឺសុទ្ធសឹងតែ អ្នកប្រើប្រាស់គ្រឿងញៀន និងអ្នកជួញដូរតូចតាចប៉ុណ្ណោះ ដែលត្រូវប៉ូលិសសម្លាប់ជាលក្ខណៈប្រព័ន្ធ។ ទោះជាយ៉ាងណា ប៉ូលិសនិងរដ្ឋបាលលោក ឌូទើតេ បានទាត់ចោលការចោទប្រកាន់នេះ។
ម្យ៉ាងទៀត ក្រុមអង្គការសិទ្ធិមនុស្ស បញ្ជាក់ឲ្យដឹងទៀតថា ប៉ូលិស កំពុងបើកប្រតិបត្តិការដោយមានអភ័យឯកសិទ្ធិ ហើយទទួលបានការគាំទ្រពីសំណាក់ប្រធានាធិបតី ដែលធ្លាប់ប្តេជ្ញាថាសម្លាប់ពួករកស៊ីគ្រឿងញៀន១០ម៉ឺននាក់ ហើយក៏និយាយដែរថា លោកនឹងរីករាយក្នុងការសម្លាប់ពួកញៀនថ្នាំដល់១លាននាក់ថែមទៀតផង។ ដោយឡែក ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ក្នុងខែ កក្កដា បានអនុម័យសេចក្តីសម្រេចមួយដើម្បីបើកការស៊ើបអង្កេតប្រទេសហ្វីលីពីន ហើយតុលាការឧក្រិដ្ឋកម្មអន្តរជាតិ (ICC) ក៏កំពុងសិក្សាជាបឋមលើបទចោទប្រកាន់នៃឧក្រិដ្ឋកម្មប្រឆាំងមនុស្សជាតិ៕
Tag:
ហ្វីលីពីន
ឌូទើតេ
គ្រឿងញៀន
© រក្សាសិទ្ធិដោយ thmeythmey.com