អន្តរជាតិ
ប្រធានាធិបតីកូរ៉េខាងត្បូង៖ កូរ៉េខាងត្បូង-អាស៊ាន ត្រូវសហការជាមួយគ្នា ដើម្បីជម្នះគាំពារនិយម លោកប្រធានាធិបតីកូរ៉េខាងត្បូង មូន ចេអ៊ីន និយាយនៅក្នុងកិច្ចប្រជុំ Korea-ASEAN CEO នាមជ្ឈមណ្ឌលសន្និបាទ BEXCO ក្នុងទីក្រុងប៊ូសាន កូរ៉េខាងត្បូង នៅថ្ងៃទី២៥ ខែវិច្ឆិកា ឆ្នាំ២០១៩, រូបភាព៖ Yonhap
× អាស៊ាន និងកូរ៉េខាងត្បូង ទាមទារឲ្យមានកិច្ចសហប្រតិបត្តិការ និងសាមគ្គីភាពជាមួយគ្នា ដើម្បីដោះស្រាយបញ្ហាប្រឈមផ្សេងៗដូចជា ការគាំពារនិយម។ នេះបើតាមការលើកឡើងរបស់ប្រធានាធិបតីកូរ៉េខាងត្បូង មូន ចេអ៊ីន នាថ្ងៃទី២៦ វិច្ឆិកា ក្នុងពេលបើកកិច្ចប្រជុំខួបអនុស្សាវរីយ៍អាស៊ាន-កូរ៉េខាងត្បូង នៅទីក្រុងកំពង់ផែប៊ូសាន កូរ៉េខាងត្បូង។
ថ្លែងនៅក្នុងមជ្ឈមណ្ឌលសន្និបាត BEXCO ក្នុងទឹកដីកំពង់ផែប៊ូសាន កូរ៉េខាងត្បូង លោកមូន ចេអ៊ីន ប្រធានាធិបតីកូរ៉េខាងត្បូង បានចង្អុលបង្ហាញថា ពិភពលោកបច្ចុប្បន្ន កំពុងប្រឈមទៅនឹងបញ្ហាប្រឈមជាច្រើន ដូចជា ការគាំពារនិយមជាដើម។ ក្នុងន័យនេះ ប្រធានាធិបតីកូរ៉េខាងត្បូង មិនបានសំដៅទៅលើប្រទេសណាមួយឡើយ ប៉ុន្តែលោក គ្រាន់តែអំពាវនាវឲ្យអាស៊ាន ចេះសហការ និងសាមគ្គីជាមួយកូរ៉េខាងត្បូង ដើម្បីដោះស្រាយបញ្ហាទាំងនេះ។
ក្រៅពីបញ្ហាគាំពារនិយម លោក មូន ក៏បានលើកឡើងពីបញ្ហាឧក្រិដ្ឋកម្មឆ្លងព្រំដែន និងបដិវត្តន៍ឧស្សាហកម្មលើកទី៤ផងដែរ។ បើតាមលោកប្រធានាធិបតី កូរ៉េខាងត្បូង ក៏ដូចជាបណ្តាប្រទេសអាស៊ាន មិនទាន់ដឹងច្បាស់នៅឡើយទេពីអនាគត ថាតើបដិវត្តឧស្សាហកម្មនឹងនាំឲ្យមានអ្វីកើតឡើង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
នៅក្នុងពិធីបើកកិច្ចប្រជុំអាស៊ាន-កូរ៉េខាងត្បូងផ្លូវការ លោកមូន ក៏បានរំលឹកផងដែរ ពីវិបត្តិសេដ្ឋកិច្ចអាស៊ីខាងកើតឆ្នាំ១៩៩៧ និងវិបត្តិហិរញ្ញវត្ថុសកលនៅឆ្នាំ ២០០៨។ ក្នុងនោះលោកប្រធានាធិបតីបានគូសបញ្ជាក់ថា មូលហេតុ ដែលនាំឲ្យថ្នាក់ដឹកនាំបណ្តាលប្រទេសអាស៊ាន អាចជួយសង្គ្រោះសេដ្ឋកិច្ចបាន គឺដោយសារតែចំណងទំនាក់ទំនង និងការជឿទុកចិត្ត ដែលប្រទេសទាំងអស់បានបង្កើតឡើង។
សូមបញ្ជាក់ថា នយោបាយសម្លឹងទៅភាគខាងត្បូងថ្មី ឬ New Southern Policy គឺជាគំនិតផ្តួចផ្តើមឡើងដោយលោកប្រធានាធិបតី មូន ដើម្បីរឹតចំណងមិត្តភាព និងពង្រីកទំហំពាណិជ្ជកម្មរវាងកូរ៉េខាងត្បូង និងអាស៊ាន។ តាមរយៈគោលនយោបាយនេះ កូរ៉េខាងត្បូង បានចុះហត្ថលេខាលើអនុស្សរណៈយោគយល់គ្នាជាមួយបណ្តាប្រទេសអាស៊ានចំនួន៥ ដូចជា កម្ពុជា ឡាវ មីយ៉ាន់ម៉ា ហ្វីលីពីន និងវៀតណាម ទាក់ទងទៅនឹងវិស័យអប់រំ ប្រព័ន្ធដឹកជញ្ជូន និងទីក្រុងវៃឆ្លាតជាដើម។ ក្រៅពីនេះ លោកមូន ក៏មានជំនួបទ្វេភាគី ជាមួយប្រមុខរដ្ឋ និងប្រមុខរដ្ឋាភិបាលមកពីបណ្តាប្រទេសអាស៊ានផងដែរ៕
Tag:
អាស៊ាន
កូរ៉េខាងត្បូង
មូន ចេអ៊ីន
© រក្សាសិទ្ធិដោយ thmeythmey.com