តើអាចទេ? ចំណាយ៣០ដុល្លារមើលល្ខោន១ឆ្នាំ ដើម្បីស្ដារតម្លៃសិល្បៈវប្បធម៌ជាតិ

ជាតិ

តើអាចទេ? ចំណាយ៣០ដុល្លារមើលល្ខោន១ឆ្នាំ ដើម្បីស្ដារតម្លៃសិល្បៈវប្បធម៌ជាតិ

26, Nov 2019 , 11:59 am

រូបភាព

ល្ខោនស្រមោលស្បែកធំសម្ដែងនៅឆាកសម្ដែងសមាគមសិល្បករគោកធ្លក ក្នុងបរិវេណបណ្ណាល័យជាតិ កាលពីពេលកន្លងទៅ

ដោយ: ប៉ូ សាគុន

ភ្នំពេញ៖ មើលល្ខោនបុរាណពេញ១ឆ្នាំសម្រាប់មួយគ្រួសារ តម្លៃត្រឹមតែ៣០ដុល្លារអាមេរិកប៉ុណ្ណោះ ដើម្បីជួយស្ដារតម្លៃសិល្បៈវប្បធម៌ជាតិ។ ទម្រង់ល្ខោនបុរាណចម្រុះ១៤រឿង នឹងសម្ដែងរៀងរាល់ថ្ងៃសុក្រ សៅរ៍ និងថ្ងៃអាទិត្យ ពេញមួយឆ្នាំ ពីម៉ោង៦កន្លះដល់ម៉ោង៧កន្លះយប់ នៅឆាកសម្ដែងសមាគមសិល្បករគោកធ្លក ក្នុងបរិវេណបណ្ណាល័យជាតិ។ នេះជាការរួមចំណែកដ៏សំខាន់របស់មាតាបិតា និងប្រជាជនកម្ពុជា ដើម្បីជួយទ្រទ្រង់សិល្បៈវប្បធម៌អត្តសញ្ញាណជាតិឱ្យរឹងមាំ តាមរយៈការនាំកូនៗទៅមើលសិល្បៈបុរាណចម្រុះ។

តម្លៃសំបុត្រធម្មតា ១២,០០០រៀល សម្រាប់មនុស្សម្នាក់និងអាចមើលមួយថ្ងៃ។ ចំពោះក្មេងអាយុក្រោម១៤ឆ្នាំមិនគិតថ្លៃ។ បើទិញបណ្ណសមាជិកតម្លៃសំបុត្រ១ឆ្នាំ ត្រឹមតែ៣០ដុល្លារអាមេរិកប៉ុណ្ណោះ សម្រាប់១គ្រួសារ ចូលទស្សនាល្ខោនចម្រុះ។

សមាគមសិល្បករគោកធ្លក មានការសម្ដែងទម្រង់ល្ខោនបុរាណច្រើនទម្រង់ ដូចជាល្ខោនខោល ល្ខោនស្រមោលស្បែកធំ ល្ខោនស្រមោលស្បែកតូច ល្ខោនយីកេ ល្ខោនយីកេតំកង់ និងមានទម្រង់ផ្សេងទៀត នៅរៀងរាល់ថ្ងៃសុក្រ សៅរ៍ និងអាទិត្យ។

សូមបញ្ជាក់ថា ល្ខោនស្រមោលស្បែកធំ បានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ កាលពីថ្ងៃទី២៥ ខែវិច្ឆិកា ឆ្នាំ ២០០៥ គិតមកដល់ឆ្នាំ២០១៩នេះ មានអាយុ១៤ឆ្នាំហើយ។ ចំណែកល្ខោនខោល បានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី២៨ ខែវិច្ឆិកា ឆ្នាំ២០១៨ ហើយពិធីគម្រប់ខួប១ឆ្នាំនៃការចុះបញ្ជីនេះ និងប្រារព្វនៅខេត្តសៀមរាប ដោយមានការសម្ដែងល្ខោនខោលទ្រង់ទ្រាយធំ នៅព្រះលានជល់ដំរី ថ្ងៃទី២៨វិច្ឆិកា វេលាម៉ោង៦កន្លះល្ងាច៕