អន្តរជាតិ
លោក ប្រាយុទ្ធ ប្រាប់ឲ្យអ្នកជំនួញកូរ៉េខាងត្បូងបង្កើនការវិនិយោគនៅថៃ លោកប្រាយុទ្ធ ចន្ទអូចា នាយករដ្ឋមន្ត្រីថៃ ចាប់ដៃជាមួយលោក មូន ចេអ៊ីន ប្រធានាធិបតីកូរ៉េខាងត្បូង ក្រោយសន្និសីទកាសែតមួយ ក្នុងក្រុង បាងកក ថ្ងៃ ២ កញ្ញា ២០១៩ (Reuters)
× លោកនាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃចន្ទ ២៥វិច្ឆិកា បានទទូចឲ្យអ្នកជំនួញកូរ៉េខាងត្បូងបោះទុនវិនិយោគក្នុងប្រទេសថៃ ជាពិសេស ក្នុងគម្រោងច្រករបៀងសេដ្ឋកិច្ចភាគខាងកើត (EEC)។ នេះបើតាមការបញ្ជាក់របស់អ្នកនាំពាក្យរដ្ឋាភិបាលថៃ លោកស្រី Narumon Pinyosinwat ។ ពីប្រទេសកូរ៉េខាងត្បូង អំឡុងទស្សនកិច្ចចូលរួមជំនួបកំពូលអាស៊ាន-កូរ៉េខាងត្បូង លោក ប្រាយុទ្ធ អះអាងថា កូរ៉េខាងត្បូងគឺជាដៃគូដ៏សំខាន់មួយរបស់តំបន់អាស៊ាន។
ថ្លែងអំឡុងកិច្ចប្រជុំទ្វេភាគីជាមួយប្រធានាធិបតីកូរ៉េខាងត្បូង មូន ចេអ៊ីន ក្នុងទីក្រុង ប៊ូសាន លោក ប្រាយុទ្ធ ស្នើឲ្យអ្នកវិនិយោគកូរ៉េខាងត្បូងបង្កើនការបោះទុនវិនិយោគ ជាពិសស ក្នុងឧស្សាហកម្ម 4.០ ដែលកូរ៉េខាងត្បូង មានជំនាញខាងផ្នែក យានយន្ត, គ្រឿងអេឡិចត្រូនិក, បច្ចេកវិទ្យាជីវៈ, នវានុវត្តន៍ឌីចីថល និងមនុស្សយន្ត ជាដើម។
ទន្ទឹមនេះ បើតាមលោកស្រី Narumon មេដឹកនាំទាំងពីរ ក៏បានយល់ព្រមពន្លឿនកិច្ចសហប្រតិបត្តិការពហុភាគីក្នុងវិស័យទាំងអស់ រួមមាន ការគ្រប់គ្រងធារាសាស្ត្រ, ហេដ្ឋារចនាសម្ព័ន្ធ, ពង្រឹងការអភិវឌ្ឍន៍ប្រព័ន្ធអប់រំ និងការតភ្ជាប់ជាដើម។ តាមការចុះផ្សាយរបស់កាសែតបាងកកប៉ុស្តិ៍ លោកស្រី សង្កត់ធ្ងន់ថា កូរ៉េខាងត្បូង ត្រៀមលក្ខណៈចែករំលែកចំណេះដឹង និងជំនាញជាមួយប្រទេសថៃក្នុងវិស័យដែលថៃខ្វះខាត។
ឆ្លៀតក្នុងឱកាសជំនួបទ្វេភាគីនេះ លោក ប្រាយុទ្ធ ក៏បានថ្លែងអរគុណដល់កូរ៉េខាងត្បូងសម្រាប់ការជួយគាំទ្រប្រទេសថៃ អំឡុងពេលធ្វើជាម្ចាស់ផ្ទះអាស៊ានឆ្នាំ២០១៩នេះ ហើយបានលើកសរសើរពីគោលនយោបាយទិសខាងត្បូងថ្មី (NSP) ដែលជួយជំរុញកូរ៉េខាងត្បូងនិងអាស៊ានឆ្ពោះទៅរកគោលដៅពួកគេ។ ចំណែក លោក មូន ចេអ៊ីន បានលើកសរសើរលោកនាយករដ្ឋមន្ត្រីថៃចំពោះតួនាទីរបស់លោកក្នុងការជំរុញសេដ្ឋកិច្ច និងបានយល់ព្រមពង្រឹងកិច្ចសហប្រតិបត្តិការជាមួយថៃ ជាពិសេសក្នុងវិស័យសេដ្ឋកិច្ច ធនធានមនុស្ស និងការអភិវឌ្ឍទីក្រុងឆ្លាតវៃ ដែលដើរទន្ទឹមគ្នាជាមួយគោលនយោបាយទិសខាងត្បូង (NSP) របស់កូរ៉េខាងត្បូង ។
ម្យ៉ាងទៀត ក្នុងសុន្ទរកថាអំឡុងពេលបើកជំនួបកំពូលអាស៊ាន-កូរ៉េខាងត្បូងលើកទី៣ លោកឧត្តមសេនីយ៍ ប្រាយុទ្ធ បានថ្លែងថា កូរ៉េខាងត្បូងគឺជាដៃគូដ៏សំខាន់មួយនៃសហគមន៍តំបន់អាស៊ាន។ ជាមួយគ្នានេះ មេដឹកនាំរូបនេះ ក៏កត់សម្គាល់ពីតួនាទីរបស់វិស័យឯកជនក្នុងការជំរុញសេដ្ឋកិច្ច ដោយអះអាងថា អាស៊ាន បានយល់ព្រមជំរុញកិច្ចសហប្រតិបត្តិការកាន់តែជិតស្និទ្ធរវាងវិស័យសាធារណៈនិងឯកជន។
សូមបញ្ជាក់ថា កិច្ចប្រជុំកំពូលអាស៊ាន-កូរ៉េខាងត្បូងនេះ គឺជាការអបអរសាទរដល់ខួបទី៣០ឆ្នាំនៃភាពជាដៃគូសន្ទនារវាងអាស៊ាន និងកូរ៉េខាងត្បូង ខណៈជំនួបកំពូលមេគង្គ-កូរ៉េខាងត្បូងលើកទី១ រវាងកូរ៉េខាងត្បូង និងបណ្តាប្រទេស៥ទៀត ក្នុងដងទន្លេមេគង្គ រៀបចំពង្រឹងកិច្ចសហប្រតិបត្តិការក្នុងវិស័យនយោបាយ សេដ្ឋកិច្ច និងសង្គម-វប្បធម៌។ ប្រទេសទាំង៥នោះគឺមាន ថៃ វៀតណាម ឡាវ កម្ពុជា និងមីយ៉ាន់ម៉ា៕
Tag:
កូរ៉េខាងត្បូង
ថៃ
វិនិយោគ
© រក្សាសិទ្ធិដោយ thmeythmey.com