ជាតិ
នយោបាយជាតិ
លោក កឹម សុខា បន្តជួបភ្ញៀវទូតទី១១នារសៀលថ្ងៃពុធនេះ លោក កឹម សុខា នាពេលចេញទៅទទួលភ្ញៀវទូតកន្លងមក។ រូបថត AFP
× លោក Bjorn Haggmark ឯកអគ្គរាជទូតស៊ុយអែត នឹងក្លាយជាភ្ញៀវទូតទី១១ដែលអញ្ជើញទៅសួរសុខទុក្ខលោក កឹម សុខា ដល់គេហដ្ឋាននៅក្នុងខណ្ឌទួលគោក។ បើតាមលោក មុត ចន្ថា ដែលជាមនុស្សជនិតរបស់អតីតមេបក្សប្រឆាំង ជំនួបនឹងប្រព្រឹត្តទៅនាវេលាម៉ោង៤រសៀល ថ្ងៃពុធ ទី២៧ ខែវិច្ឆិកា ឆ្នាំ២០១៩នេះ។
កាលពីថ្ងៃទី១០ ខែវិច្ឆិកា ឆ្នាំ២០១៩ ចៅក្រមស៊ើបសួរនៃសាលាដំបូងរាជធានីភ្នំពេញ សម្រេចលុបបម្រាមមួយចំនួនដោយអនុញ្ញាតឲ្យលោក កឹម សុខា អាចដើរបានគ្រប់ទីកន្លែងក្នុងប្រទេសកម្ពុជា ប៉ុន្តែលោកមិនមានសិទ្ធិចេញទៅក្រៅប្រទេស ឬបន្តសកម្មភាពនយោបាយនោះឡើយ។
ក្រោយទទួលបានការបើកទូលាយសិទ្ធិនេះ អតីតមេបក្សប្រឆាំងបានជួបតំណាងទូតប្រទេសជាបន្តបន្ទាប់។ ឯកអគ្គរដ្ឋទូត និងរាជទូតដំបូងៗដែលបានទៅជួបលោក កឹម សុខា រួមមានដូចជា លោកស្រី Eva Nguyen Binh (បារាំង), លោក W. Patrick Murphy (អាមេរិក) លោក Christian Berger (អាល្លឺម៉ង់) និងលោកស្រី Angela Corcora (អូស្ត្រាលី)។
បន្តបន្ទាប់មកទៀតរួមមាន លោកស្រី Carmen Moreno (សហភាពអឺរ៉ុប), លោក Mikami Masahiro (ជប៉ុន), លោកស្រី Tina Redshaw (ចក្រភពអង់គ្លេស)។ ក្រៅពីទូតដែលមានទីស្នាក់ការទូតនៅកម្ពុជា ទូតបរទេសផ្សេងទៀតដែលមកសួរសុខទុកលោក កឹម សុខា រួមមាន លោកស្រី Helene Budliger Artieda ទូតស្វីសដែលមានស្ថាន ឯកអគ្គរដ្ឋទូតស្ថិតនៅទីក្រុងបាងកក ទទួលបន្ទុកថៃ កម្ពុជា និងឡាវ។
កាលពីថ្ងៃទី២០ ខែវិច្ឆិកា លោក កឹម សុខា បានទទួលជួប លោក Philippe Kridelka ឯកអគ្គរាជទូតបែលហ្ស៊ិក និង អ្នកស្រី Satu Suikkari-Kleven ឯកអគ្គរដ្ឋទូតហ្វាំងឡង់ ដែលមានស្ថានទូតនៅប្រទេសថៃ។ លោក Philippe Kridelka ជាទូតបែលហ្ស៊ិក ទទួលបន្ទុកប្រចាំប្រទេសថៃ និងប្រទេសកម្ពុជា។ ចំណែក អ្នកស្រី Satu Suikkari-Kleven ជាទូតហ្វាំងឡង់ ទទួលបន្ទុកប្រចាំប្រទេសថៃ កម្ពុជា និង មីយ៉ាន់ម៉ា។
នៅម៉ោង៤រសៀលថ្ងៃពុធ ទី២៧ ខែវិច្ឆិកា នេះ ឯកអគ្គរាជទូតស៊ុយអែត លោក Bjorn Haggmark គឺជាភ្ញៀវទី១១ ដែលទៅសួរសុខទុក្ខអតីតមេបក្សប្រឆាំងដល់ផ្ទះ ប៉ុន្តែមិនមានការសន្ទនាក្នុងក្របខណ្ឌនយោបាយឡើយ ដោយគ្រាន់តែជាការសួរសុខទុក្ខធម្មតាប៉ុណ្ណោះ។
កាលពីថ្ងៃទី១៥ ខែវិច្ឆិកា ឆ្នាំ២០១៩ ចៅក្រមស៊ើបសួរ បានប្រកាសបិទការស៊ើបសួរលើសំណុំរឿងរបស់លោក កឹម សុខា។ នីតីវិធីបន្ទាប់ ចៅក្រមស៊ើបសួរ នឹងចេញដីកាដំណោះស្រាយ ដើម្បីសម្រេចថាទម្លាក់បទចោទចេញពីលោក កឹម សុខា ឬក៏ត្រូវបញ្ជូនសំណុំរឿងទៅជំនុំជម្រះ។ លោក ត្រូវបានចោទពីសន្ទិដ្ឋិភាពជាមួយបរទេសកាលពីរ២ឆ្នាំមុន ដែលសំដៅថា លោក លួចទៅពឹងពាក់បរទេសដើម្បីផ្តួលរំលំរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com