អន្តរជាតិ
MRC ដាក់យុទ្ធសាស្ត្រ៤ឆ្នាំដើម្បីទប់ស្កាត់គ្រោះរាំងស្ងួត កម្រិតទឹកមេគង្គធ្លាក់ចុះ
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា (កណ្ដាល) ប្រភពរូប៖ MRC
×![]()
គណៈប្រតិភូជាន់ខ្ពស់របស់ក្រុមប្រឹក្សាគណៈកម្មការទន្លេមេគង្គ (MRC) បានអនុម័តយុទ្ធសាស្ត្រគ្រប់គ្រងគ្រោះរាំងស្ងួតសម្រាប់ឆ្នាំ២០២០-២០២៥ ។ យុទ្ធសាស្ត្រនេះ មានគោលដៅអនុញ្ញាតឲ្យប្រទេសកម្ពុជា ឡាវ ថៃ និងវៀតណាម ត្រៀមលក្ខណៈនិងគ្រប់គ្រងបញ្ហាគ្រោះធម្មជាតិនេះរួមគ្នា។ ទន្ទឹមនេះ ផែនការការងារប្រចាំឆ្នាំមួយផ្សេងទៀត ក៏ត្រូវបានអនុម័តផងដែរ ជាមួយកញ្ចប់ថវិកា១៣លានដុល្លារ។ 
យុទ្ធសាស្ត្រដែលបានអនុម័តនៅថ្ងៃអង្គារ ទី២៦ ខែវិច្ឆិកា ធ្វើឡើងខណៈតំបន់ទន្លេមេគង្គកំពុងជួបប្រទះគ្រោះរាំងស្ងួតធ្ងន់ធ្ងរ ដែលបណ្ដាលឲ្យកម្រិតទឹកទន្លេមេគង្គធ្លាក់ចុះក្នុងកម្រិតទាបបំផុតក្នុងប្រវត្តិសាស្ត្រ ឬក្នុងរយៈពេល៦០ឆ្នាំចុងក្រោយ។
តាមរយៈសេចក្តីប្រកាសព័ត៌មានរបស់ MRC យុទ្ធសាស្ត្រនេះ នឹងផ្តោតសំខាន់លើគោលដៅអាទិភាពទាំង៥ ដែលត្រូវបានវាយតម្លៃថា «មានដំណើរការមិនល្អ» និងត្រូវការ «ការយកចិត្តទុកដាក់ជាបន្ទាន់» ដើម្បីដោះស្រាយវិបត្តិគ្រោះរាំងស្ងួត។ ចំណុចទាំងនោះរួមមាន សូចនាករពិនិត្យតាមដានស្ថានភាពដី, សំណើមដី, ស្ថានភាពដំណាំ និងលំហូរទឹកក្នុងរដូវប្រាំង ព្រមទាំងការព្យាករណ៍គ្រោះរាំងស្ងួតនិងការប្រកាសអាសន្ន, ការកសាងសមត្ថភាពរៀបចំផែនការ និងវាយតម្លៃស្ថានភាពគ្រោះរាំងស្ងួត ក៏ដូចជាវិធានការកាត់បន្ថយហានិភ័យនិងប្រព័ន្ធចែករំលែកព័ត៌មាន។ ទន្ទឹមនេះ យុទ្ធសាស្ត្រ៥ឆ្នាំនេះ នឹងត្រូវអនុវត្តដោយមានការគាំទ្រថវិកាពីបណ្តាប្រទេសជាសមាជិក និងដៃគូអភិវឌ្ឍន៍។
នាជំនួបក្រុមប្រឹក្សាជាន់ខ្ពស់នៃគណៈកម្មការទន្លេមេគង្គលើកទី២៦ ដែលរៀបចំឡើងក្នុងរាជធានីភ្នំពេញ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា គូសបញ្ជាក់ថា៖«ស្របពេលដែលយើងរៀបចំត្រៀមខ្លួនបង្ការ និងសម្រាលផលប៉ះពាល់នៃគ្រោះរាំងស្ងួត យុទ្ធសាស្ត្រនេះ នឹងជួយយើងកាត់បន្ថយផលប៉ះពាល់ពីគ្រោះរាំងស្ងួតលើប្រជាជន និងប្រព័ន្ធធនធានទឹក និងជួយអភិវឌ្ឍសមត្ថភាពក្នុងការសម្របខ្លួនរបស់រាជរដ្ឋាភិបាលយើង»។ លោក បន្តថា យុទ្ធសាស្ត្រនេះ ក៏ជួយជំរុញប្រព័ន្ធចែករំលែកព័ត៌មាន ព្យាករណ៍ និងប្រកាសអាសន្នឲ្យកាន់តែប្រសើរជាងមុន។
ក្នុងនាមជាប្រធានក្រុមប្រឹក្សាគណៈកម្មការទន្លេមេគង្គសម្រាប់ឆ្នាំ២០១៩ លោក លឹម គានហោ សង្កត់ធ្ងន់ថា យុទ្ធសាស្ត្រនេះ ក៏ជាផ្នែកមួយនៃកិច្ចប្រឹងប្រែងរបស់គណៈកម្មការទន្លេមេគង្គ ដើម្បីគាំទ្រដល់បណ្តាប្រទេសជាសមាជិកក្នុងការប្រយុទ្ធប្រឆាំងនឹងគ្រោះរាំងស្ងួតបច្ចុប្បន្ន និងអនាគត ដែលជះឥទ្ធិលពលអាក្រក់ទាំងកម្រិតថ្នាក់ជាតិ និងឆ្លងដែន។
ក្រៅពីយុទ្ធសាស្ត្រ៥ឆ្នាំនេះ ក្រុមប្រឹក្សាជាន់ខ្ពស់នេះ ក៏បានអនុម័តផែនការការងារប្រចាំឆ្នាំ២០២០-២០២១ ជាមួយកញ្ចប់ថវិកាជាង១៣លានដុល្លារផងដែរ។ ផែនការនេះ គឺជាផែនការលម្អិតលើប្រតិបត្តិការ, សកម្មភាពនិងកិច្ចការ រួមទាំងថវិកាពាក់ព័ន្ធក្នុងការអនុវត្តផែនការយុទ្ធសាស្ត្ររបស់ស្ថាប័ននេះនៅកម្រិតតំបន់។ ផែនការនេះ ផ្តោតសំខាន់លើការបញ្ចប់យុទ្ធសាស្ត្រអភិវឌ្ឍន៍អាងទន្លេថ្មីឆ្នាំ២០២១-២០៣០ និងផែនការយុទ្ធសាស្ត្រឆ្នាំ២០២១-២០២៥ ព្រមទាំងយុទ្ធសាស្ត្របរិស្ថានអាងទន្លេ សម្រាប់ការពារធនធានបរិស្ថានសំខាន់ៗ។
ក្នុងចំណោមអាទិភាពជាច្រើន ផែនការនេះ ក៏ផ្តល់អាទិភាពលើការបញ្ចប់ការពិគ្រោះយោបល់ជាមុនសម្រាប់គម្រោងសាងសង់ទំនប់វារីអគ្គិសនីលួងប្រាបាង ព្រមទាំងការអនុវត្តពិនិត្យតាមដានបរិស្ថានរួមគ្នាសម្រាប់ទំនប់មេ, គ្រោះរាំងស្ងួត និងយុទ្ធសាស្ត្រវារីអគ្គិសនី។ វាក៏ជំរុញភាពជាដៃគូជាមួយប្រទេសចិន និងកិច្ចសហប្រតិបត្តិការឡានឆាង-មេគង្គឲ្យកាន់តែប្រសើរផងដែរ។
តាមរយៈការសិក្សារបស់ MRC កាលពីពេលថ្មីៗនេះ បង្ហាញថា គ្រោះរាំងស្ងួតក្នុងអាងទន្លេមេគង្គ បានកើនឡើងកម្រិតហ្វ្រេកង់និងកម្រិតធ្ងន់ធ្ងរក្នុងរយៈពេលប៉ុន្មានទសវត្សរ៍ចុងក្រោយនេះ។ ឧទាហរណ៍ គ្រោះរាំងស្ងួតចុងក្រោយបង្អស់ក្នុងឆ្នាំ២០១៦ បានធ្វើឲ្យសេដ្ឋកិច្ចប្រទេសថៃខាតបង់ថវិកាអស់ប្រមាណ១,៧ពាន់លានដុល្លារ ។ ចំណែកក្នុងប្រទេសកម្ពុជា គ្រោះរាំងស្ងួតបានធ្វើឲ្យខ្វះខាតទឹកក្នុងខេត្ត១៨ចំណោមខេត្ត-រាជធានីទាំង២៥ ដោយមនុស្ស២,៨លាននាក់ ខ្វះខាតទឹកប្រើប្រាស់។
សូមបញ្ជាក់ថា ជំនួបប្រចាំឆ្នាំរយៈពេល២ថ្ងៃនេះ នឹងត្រូវបញ្ចប់នាថ្ងៃ ២៧ វិច្ឆិកា ហើយឆ្នាំក្រោយ ប្រទេសឡាវ នឹងធ្វើជាម្ចាស់ផ្ទះ និងក្លាយជាប្រធានក្រុមប្រឹក្សា MRC សម្រាប់ឆ្នាំ២០២០។ គណៈកម្មការទន្លេមេគង្គ គឺជាស្ថាប័នអន្តររដ្ឋាភិបាល ដែលមានតួនាទីជំរុញលើកកម្ពស់កិច្ចពិគ្រោះយោបល់ និងកិច្ចសហប្រតិបត្តិការថ្នាក់តំបន់នៅក្នុងតំបន់អាងទន្លេមេគង្គក្រោម។ MRC បង្កើតឡើងក្នុងឆ្នាំ១៩៩៥ ដោយផ្អែកតាមកិច្ចព្រមព្រៀងទន្លេមេគង្គរវាងកម្ពុជា ឡាវ ថៃ និងវៀតណាម ហើយបំពេញតួនាទីជាវេទិកាថ្នាក់តំបន់សម្រាប់ការទូតទឹក ក៏ដូចជា មជ្ឈមណ្ឌលប្រមូលផ្តុំចំណេះទឹកអំពីការគ្រប់គ្រងធនធានទឹក ដើម្បីការអភិវឌ្ឍតំបន់នេះប្រកបដោយចីរភាព៕
Tag:
MRC
គ្រោះរាំងស្ងួត
លឹម គានហោ
© រក្សាសិទ្ធិដោយ thmeythmey.com
