អន្តរជាតិ
សភាអាមេរិក ហៅលោក ត្រាំ ចូលឆ្លើយបំភ្លឺជាសាធារណៈក្នុងដំណើរការស៊ើបអង្កេតដកតំណែង
លោកប្រធានាធីបតិអាមេរិក ដូណាល់ ត្រាំ (AFP)
×![]()
សភាអាមេរិក បានហៅលោកប្រធានាធិបតី ដូណាល់ ត្រាំ ទៅចូលឆ្លើយបំភ្លឺក្នុងសវនាការដើម្បីឈានដល់ដកហូតតំណែង នាថ្ងៃ៤ ធ្នូ ខាងមុខ។ ប្រធានគណៈកម្មាធិការតុលាការនៃសភាតំណាងអាមេរិក លោក Jarrold Nadler បាននិយាយថា លោក ត្រាំ អាចបង្ហាញខ្លួននៅសវនាការ ឬឈប់រអ៊ូរទាំរឿងដំណើរការស៊ើបសួរ។ ម្យ៉ាងទៀត ប្រសិនបើលោកសម្រេចចិត្តបង្ហាញខ្លួនមែននោះ លោកប្រធានាធិបតីនឹងអាចសួរសំណួរសាក្សី។
ក្នុងសេចក្តីថ្លែងការណ៍ ដែលផ្ញើទៅកាន់លោកត្រាំ លោក Nadler បានអញ្ជើញលោកត្រាំចូលបំភ្លឺនៅសវនាការខែក្រោយ ដោយនិយាយថា លោកប្រធានាធិបតីមានជម្រើសមួយដើម្បីបង្កើត។ ត្រង់នេះ លោកសង្កត់ធ្ងន់ថា លោកដូណាល់ត្រាំ អាចចាប់យកឱកាសនេះដើម្បីចូលឆ្លើយបំភ្លឺនៅសវនាការជាសាធារណៈ ឬលោកអាចឈប់រអ៊ូរទាំពីដំណើរការស៊ើបសួររបស់គណៈកម្មាធិការសភាទៀត។ លោក Nadler សង្ឃឹមថា លោក ត្រាំ ជ្រើសរើសការចូលរួមក្នុងការស៊ើបសួរ ដោយផ្ទាល់ ឬប្រយោល ដូចដែលប្រធានាធិបតីដទៃទៀតធ្លាប់ធ្វើកន្លងទៅ។
ក្នុងលិខិតផ្ញើទៅកាន់ប្រធានាធិបតីដដែលនេះ លោក Nadler និយាយថា សវនាការដែលរៀបចំនាដើមខែធ្នូខាងមុខនេះ នឹងបើកឱកាសដើម្បីជជែកពិភាក្សាពី មូលដ្ឋានជារដ្ឋធម្មនុញ្ញ និងប្រវត្តិសាស្ត្រក្នុងការដំណើរការដកហូតតំណែងប្រធានាធិបតី។ លោក បន្តថា៖«យើងក៏នឹងពិភាក្សាផងដែរថាតើសកម្មភាពលោកត្រាំដែលរងការចោទប្រកាន់ ធានាដល់អនុវត្តសិទ្ធិអំណាចរបស់សភាតំណាងដើម្បីអនុម័តមាត្រានៃការចោទប្រកាន់ (impeachment) ឬអត់»។ លោក ត្រាំ មានពេលរហូតដល់ថ្ងៃ១ធ្នូ ដើម្បីសម្រេចចិត្ត។
ប្រសិនបើលោក ត្រាំ សម្រេចចូលឆ្លើយបំភ្លឺមែននោះ នេះនឹងក្លាយជាដំណាក់កាលថ្មីមួយក្នុងដំណើរការស៊ើបសួរចោទប្រកាន់ប្រធានាធិបតី ដែលផ្អែកលើការហៅទូរសព្ទរវាងលោកត្រាំ និងប្រធានាធិបតីអ៊ុយក្រែន Volodymyr Zelensky ។ អំឡុងការជជែកគ្នាតាមរយៈទូរសព្ទនេះ លោក ត្រាំ បានស្នើសុំឲ្យលោក Zelensky បើកការស៊ើបអង្កេតលើលោក ចូ បៃឌិន ដែលបច្ចុប្បន្នជាបេក្ខជនបក្សប្រជាធិបតេយ្យឈានមុខម្នាក់ក្នុងការបោះឆ្នោតឆ្នាំក្រោយ។ ការស៊ើបអង្កេតរបស់សភាអាមេរិនេះ គឺព្យាយាមរកមើលថា លោក ត្រាំ ពិតជាប្រើប្រាស់ការគំរាមកំហែងផ្អាកជំនួយយោធាអាមេរិកដើម្បីដាក់សម្ពាធលើអ៊ុយក្រែនឲ្យស៊ើបអង្កេតលោក បៃឌិន និងកូនប្រុសឬយ៉ាងណា។ យ៉ាងណាក៏ដោយ លោក ត្រាំ បដិសេធការចោទប្រកាន់ទាំងអស់នេះ។
កាលពីសប្តាហ៍មុន គណៈកម្មាធិការកិច្ចការសម្ងាត់សភាតំណាងរាស្ត្រ (House Intelligence Committee) បានបញ្ចប់សវនាការជាសាធារណៈរយៈពេល២សប្តាហ៍របស់ខ្លួន។ លោក Adam Schiff ប្រធានគណៈកម្មាធិការសភាតំណាង បានបញ្ជាក់ថា គណៈកម្មាធិការលោក កំពុងធ្វើការលើរបាយការណ៍ពួកគេ ដែលនឹងត្រៀមចេញផ្សាយ នាថ្ងៃ៣ ធ្នូ ខាងមុខ។
ម្យ៉ាងវិញទៀត គណៈកម្មាធិការតុលាការសភាតំណាង ដែលមានលោក Nadler ជាប្រធាន រំពឹងចាប់ផ្តើមរៀបរៀងមាត្រានៃការចោទប្រកាន់ (Impeachment Article) ដែលជាការចោទប្រកាន់ពីកំហុសប្រឆាំងលោកប្រធានាធិបតី នាដើមខែធ្នូខាងមុខនេះផងដែរ។ ហើយក្រោយពីមានការបោះឆ្នោតមួយក្នុងសភាតំណាងដែលគ្រប់គ្រងដោយបក្សប្រជាធិបតេយ្យ ការកាត់ក្តី នឹងត្រូវរៀបចំឡើងក្នុងព្រឹទ្ធសភាអាមេរិកដែលដឹកនាំដោយបក្សសាធារណរដ្ឋ។ ប្រសិនបើលោក ត្រាំ ត្រូវបានផ្តន្ទាទោសដោយសំឡេងភាគច្រើនពីរភាគបីមែននោះ(ជាលទ្ធផលដែលមិនទំនងនឹងកើតឡើង) លោក នឹងក្លាយជាប្រធានាធិបតីអាមេរិកទីមួយ ដែលត្រូវបានបណ្តេញចេញពីតំណែងតាមរយៈការចោទប្រកាន់ដកតំណែង។ សេតវិមានអាមេរិក និងសមាជិកបក្សសាធារណរដ្ឋ ទាមទារឲ្យការកាត់ក្តីលោកត្រាំ កំណត់ត្រឹម២សប្តាហ៍ប៉ុណ្ណោះ៕
Tag:
សហរដ្ឋអាមេរិក
សភា
ដូណាល់ត្រាំ
© រក្សាសិទ្ធិដោយ thmeythmey.com
