អន្តរជាតិ
កូរ៉េខាងត្បូង ស្នើឲ្យវៀតណាមជួយក្នុងដំណើរការសន្តិភាពនៅឧបទ្វីបកូរ៉េ លោកប្រធានាធិបតីកូរ៉េខាងត្បូង មូន ចេអ៊ីន(ខាងឆ្វេង) ចាប់ដៃជាមួយ នាយករដ្ឋមន្រ្តីវៀតណាម លោក ង្វៀន សួនហ្វ៊ុក នៅក្នុងវិមានរដ្ឋាភិបាលCheong Wa Dae នាទីក្រុងសេអ៊ូល នៅថ្ងៃទី២៧ ខែវិច្ឆិកា។ រូបភាព៖ Facebook Moon Jae In
× ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី២៧ ខែវិច្ឆិកា បានស្នើប្រទេសវៀតណាម ជួយស្ថាបនាសន្តិភាពនៅលើឧបទ្វីបកូរ៉េ ទាក់ទងបញ្ហាកូរ៉េខាងជើង។ លោក មូន ស្នើបែបនេះ ខណៈវៀតណាមត្រៀមធ្វើជាប្រធាននៃកិច្ចប្រជុំកំពូលអាស៊ាន និងសមាជិកមិនអចិន្ត្រៃយ៍ក្រុមប្រឹក្សាសន្តិសុខរបស់អង្គការសហប្រជាជាតិមិនអចិន្ត្រៃយ៍នៅក្នុងឆ្នាំ ២០២០ ខាងមុខ។
បន្ទាប់ពីកិច្ចប្រជុំអាស៊ាន-សាធារណរដ្ឋកូរ៉េ និងមេគង្គ-កូរ៉េខាងត្បូងបានបិទបញ្ចប់ ប្រធានាធិបតីកូរ៉េខាងត្បូង មូន ចេអ៊ីន និងនាយករដ្ឋមន្ត្រីវៀតណាម លោក ង្វៀន សួនហ្វ៊ុក បានជួបពិភាក្សាទ្វេភាគី នាទីក្រុងសេអ៊ូល ដើម្បីជជែកពីបញ្ហាសំខាន់ៗដូចជា បញ្ហាកូរ៉េខាងជើង សេដ្ឋកិច្ច និងពាណិជ្ជកម្មជាដើម។
ថ្លែងនៅក្នុងវិមានប្រធានាធិបតី Cheong Wa Dae ក្នុងពេលចាប់ផ្តើមនៃជំនួបរវាងថ្នាក់ដឹកនាំប្រទេសទាំងពីរ លោក មូន បានលើកឡើងថា កូរ៉េខាងត្បូង និងវៀតណាម នឹងមានកិច្ចការជាច្រើនទៀត ដែលត្រូវសហប្រតិបត្តិការជាមួយគ្នា នៅលើឆាកអន្តរជាតិ។ ការលើកឡើងរបស់លោកមូនបែបនេះ គឺគ្មានអ្វីចម្លែកទេ ដោយសារនៅឆ្នាំ២០២០ខាងមុខនេះ វៀតណាម នឹងត្រូវធ្វើជាម្ចាស់ផ្ទះអាស៊ាន និងជាសមាជិកមិនអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិ។
លោក មូន បានស្នើវៀតណាមឲ្យដើរតួនាទីស្ថាបនាសន្តិភាពនៅលើឧបទ្វីបកូរ៉េ។ ជាការឆ្លើបតប លោកនាយករដ្ឋមន្ត្រីវៀតណាម ហ្វ៊ុក បានទទួលយកសំណើមួយនេះ ហើយប្តេជ្ញាថានឹងដើរតួនាទីយ៉ាងសកម្មក្នុងការដោះស្រាយបញ្ហាទាំងនេះ។ មិនត្រឹមតែទទួលសំណើរបស់លោក មូន ប៉ុណ្ណោះទេ លោក ហ្វ៊ុក ថែមគាំទ្រលើគោលនយោបាយសម្លឹងទៅភាគខាងត្បូងថ្មីរបស់ទីក្រុងសេអ៊ូលថែមទៀត។ នេះបើផ្អែកទៅតាមការចុះផ្សាយរបស់ទីភ្នាក់ងារព័ត៌មាន Yonhap។
ទន្ទឹមនេះ លោក មូន ក៏បានអរគុណវៀតណាមដែលបានទទួលរៀបចំជំនួបលើកទីពីររវាងលោកប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នាទីក្រុងហាណូយកាលពីខែកុម្ភៈ ឆ្នាំ ២០១៩។
ក្រៅពីបញ្ហានៅលើឧបទ្វីបកូរ៉េ លោក មូន និងលោកហ្វ៊ុក ក៏បានពិភាក្សាពីការពង្រឹងច្បាប់នៅក្នុងប្រទេស ការពង្រីកទំហំវិនិយោគ ពាណិជ្ជកម្ម សេវាកម្មហិរញ្ញវត្ថុ និងសំភារៈឧស្សាហកម្មជាដើម។ ទន្ទឹមគ្នានេះដែរ នៅក្នុងឆ្នាំ២០១៩នេះ គឺជាខួប១០ឆ្នាំ នៃភាពជាដៃគូសហប្រតិបត្តិការជាយុទ្ធសាស្ត្រ រវាងទីក្រុងសេអ៊ូល និងទីក្រុងហាណូយ។
សូមបញ្ជាក់ថា កូរ៉េខាងត្បូង គឺជាប្រទេសវិនិយោគដ៏ធំមួយរបស់វៀតណាម។ ជាក់ស្តែង ទំហំវិនិយោគរបស់កូរ៉េខាងត្បូង ក្នុងប្រទេសវៀតណាមមានទំហំជាង ៦២ពាន់លានដុល្លារ នៅដំណាច់ឆ្នាំ ២០១៨។ ជាមួយគ្នានេះ ទំហំពាណិជ្ជកម្មរវាងកូរ៉េខាងត្បូង និងវៀតណាម នៅក្នុងឆ្នាំ ២០១៨ គឺមានរហូតដល់ទៅជាង ៦៨ពាន់លានដុល្លារឯណោះ៕
Tag:
មូន ចេអ៊ីន
កូរ៉េខាងត្បូង
វៀតណាម
លោក ង្វៀន សួនហ្វ៊ុក
© រក្សាសិទ្ធិដោយ thmeythmey.com