អន្តរជាតិ
មេដឹកនាំកូរ៉េខាងត្បូងនិងម៉ាឡេស៊ី សម្រេចដំឡើងចំណងការទូតទៅជា «ភាពជាដៃគូយុទ្ធសាស្ត្រ» នាយករដ្ឋមន្រ្តីម៉ាឡេស៊ី មហាធៀ មហាម៉ាត់ (ខាងឆ្វេង) ចាប់ដៃជាមួយប្រធានាធិបតីកូរ៉េខាងត្បុងមូន ចេអ៊ីន នៅក្នុងវិមានរដ្ឋាភិបាលCheong Wa Dae។ រូបភាព៖ Facebook Moon Jae In
× ក្នុងជំនួបទ្វេភាគីរវាងប្រធានាធិបតី មូន ចេអ៊ីន និងនាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី២៨ ខែវិច្ឆិកា នាវិមានរដ្ឋាភិបាល Cheong Wa Dae បានឯកភាពជាគោលការណ៍ក្នុងការដំឡើងការទូតជាមួយគ្នាទៅជា«ភាពជាដៃគូយុទ្ធសាស្ត្រ» នៅឆ្នាំក្រោយ។ អំឡុងជំនួបមេដឹកនាំ ប្រទេសទាំងពីរក៏បានចុះហត្ថលេខាលើអនុស្សរណៈយោគយល់គ្នាចំនួន ៤ផងដែរ។
ជាជំនួបទ្វេភាគីនៅសេអ៊ូល ប្រធានាធិបតីកូរ៉េខាងត្បូង មូន ចេអ៊ីន បានប្រាប់លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ ក្នុងពេលចាប់ផ្តើមថា គោលនយោបាយសម្លឹងទៅភាគខាងត្បូងថ្មីរបស់កូរ៉េខាងត្បូង និងគោលនយោបាយសម្លឹងមើលភាគខាងកើតរបស់ម៉ាឡេស៊ី គឺត្រូវគ្នាល្អណាស់។ បើតាមលោកមូន ចេអ៊ីន កិច្ចសហប្រតិបត្តិការរវាងប្រទេសទាំងពីរ គឺសំខាន់ណាស់ ដើម្បីឆ្លើយតបទៅនឹងបដិវត្តន៍ឧស្សាហកម្មលើកទី៤ ទីក្រុងវៃឆ្លាត វិស័យឧស្សាហកម្មជាដើម។
បើតាមការប្រកាសវិមានប្រធានាធិបតីកូរ៉េខាងត្បូង Cheong Wa Dae ភាគីទាំងពីរ បានសម្រេចកិច្ចព្រមព្រៀងមួយ ក្នុងការដំឡើងទំនាក់ទំនងការទូតជាមួយគ្នា ឲ្យក្លាយទៅជា «ភាពជាដៃគូយុទ្ធសាស្ត្រ» នៅក្នុងឆ្នាំ ២០២០ ដែលត្រូវជាឆ្នាំនៃគម្រប់ខួបលើកទី ៦០ នៃចំណងការទូតរវាងទីក្រុងសេអ៊ូល និងគូឡាឡាំពួ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ទន្ទឹមគ្នានេះ លោក ប្រធានាធិបតីមូន សង្ឃឹមថា កូរ៉េខាងត្បូង និងម៉ាឡេស៊ី នឹងអភិវឌ្ឍភាពជាដៃគូបន្ថែមទៀតទៅក្នុងវិស័យមួយចំនួនដូចជា បច្ចេកវិទ្យាទំនាក់ទំនង និងព័ត៌មានវិទ្យា ឧស្សាហកម្មលើសព្វាវុធ ការថែទាំសុខភាព និងក្រុមហ៊ុនធុនតូច និងមធ្យមជាដើម។ ដោយទទួលស្គាល់ថាលោ កមហាធៀ គឺជាគតិបណ្ឌិត លោក មូន ក៏បានស្នើឲ្យលោក មហាធៀ ជួយចែករំលែកដំណើរការសន្តិភាពនៅលើឧបទ្វីបកូរ៉េផងដែរ។
ជាកាឆ្លើយតប លោកនាយករដ្ឋមន្ត្រីម៉ាឡេស៊ីវ័យ៩៤ឆ្នាំរូបនេះ បានគាំទ្រគំនិតផ្តួចផ្តើមរបស់លោកប្រធានាធិបតីកូរ៉េខាងត្បូង ក្នុងការប្រែក្លាយពីតំបន់គ្មានយោធា(DMZ) ទៅជាតំបន់សន្តិភាពអន្តរជាតិ។ ក្រៅពីបញ្ហាកូរ៉េខាងជើង លោក មហាធៀ ក៏បានសាទរផងដែរ ចំពោះការដំឡើងទំនាក់ទំនងរវាងកូរ៉េខាងត្បូង និងអាស៊ាន ឲ្យស្មើទៅនឹងកម្រិតទំនាក់ទំនាក់ទំនងការទូតជាមួយ រុស្ស៊ី ចិន អាមេរិក និងជប៉ុន តាមរយៈគោលនយោបាយសម្លឹងទៅភាគខាងត្បូងថ្មី។
លោកនាយករដ្ឋមន្ត្រីម៉ាឡេស៊ី បានលើកឡើងថា សាធារណរដ្ឋកូរ៉េ និងអាស៊ាន នឹងកាន់តែខិតជិតគ្នា ដោយសារតែគោនយោបាយសម្លឹងមើលភាគខាងត្បូងមួយនេះ។ នេះបើតាមប្រភពព័ត៌មានខាងលើ។
បន្ទាប់ពីកិច្ចប្រជុំទ្វេភាគីបានបញ្ចាប់ ថ្នាក់ដឹកនាំជាន់ខ្ពស់ប្រទេសទាំងពីរ បានចូលរួមក្នុងពិធីចុះហត្ថលេខាលើអនុស្សរណៈយោគយល់គ្នាចំនួន ៤។ អនុស្សរណៈទាំង៤នេះ ស្តីអំពី ការគាំទ្រលើកិច្ចសហប្រតិបត្តិការលើបច្ចេកវិទ្យាទំនាក់ទំនង និងព័ត៌មានវិទ្យា, ប្រព័ន្ធឌីជីថលរបស់រដ្ឋាភិបាល, ការថែទាំសុខភាព និងឧសថសាស្ត្រ, និងការគ្រប់គ្រងទឹក និងប្រព័ន្ធលូជាដើម៕
Tag:
កូរ៉េខាងត្បូង
ម៉ាឡេស៊ី
© រក្សាសិទ្ធិដោយ thmeythmey.com