ភាគច្រើននៃពួកយើងប្រហែលជាមិនដឹងទេថាអាហារដែលអាចបង្កការរលាកក្នុងរាងកាយក្រៅពីបង្កបញ្ហាឈឺហើមសន្លាក់ហើយនោះ ក៏នាំឱ្យឡើងទម្ងន់ផងដែរ។ នោះក៏ព្រោះតែមួយក្នុងចំណោមបញ្ហាដែលកើតឡើងដោយសារការរលាករ៉ាំរ៉ៃក្នុងរាងកាយ គឺការឡើងទម្ងន់។ ថាតើអាហារបង្កការរលាកណាខ្លះដែលអ្នកគួរចៀសវាងដើម្បីទទួលបានរាងស្លីមស្រស់ស្អាត?
ខាងក្រោមនេះយើង នឹងបង្ហាញឱ្យដឹងពីអាហារទាំងនោះ ៖
១. អាហារផ្អែម ឬមានផ្ទុកជាតិស្ករខ្ពស់
ក្រៅពីផ្ដល់ឱ្យរាងកាយនូវបរិមាណកាឡូរីហួសប្រមាណហើយនោះ ការទទួលទានអាហារផ្អែម ឬមានជាតិស្ករខ្ពស់ច្រើនក៏បង្កការរលាកក្នុងរាងកាយផងដែរ។ ហើយការរលាករ៉ាំរ៉ៃក្នុងរាងកាយនឹងអាចបណ្ដាលឱ្យឡើងទម្ងន់។
២. ជាតិផ្អែមសិប្បនិម្មិត
ការសិក្សាស្រាវជ្រាវជាច្រើនបានបង្ហាញថាជាតិផ្អែមសិប្បនិម្មិតអាចបង្កើនចំនួនបាក់តេរីមិនល្អក្នុងពោះវៀនដែលបង្កជាការរលាកក្នុងរាងកាយ។ ដូចដែលបានរៀបរាប់ខាងលើ ការរលាកក្នុងរាងកាយនឹងអាចបណ្ដាលឱ្យកើនទម្ងន់។
៣. អាហារចៀន ឬបំពង
ការទទួលទានអាហារចៀន ឬបំពងច្រើនមិនល្អសោះឡើយចំពោះទាំងសុខភាព និងទម្ងន់។ នោះក៏ព្រោះតែអាហារប្រភេទនេះមានផ្ទុកសម្បូរទៅដោយជាតិខ្លាញ់ saturated fat ដែលងាយនឹងធ្វើឱ្យកើនទម្ងន់ ហើយក៏បង្កការរលាកក្នុងរាងកាយផងដែរ។
៤. ផលិតផលអាហារផ្សំឡើងពីទឹកដោះគោ
ភាគច្រើននៃពួកយើងសុទ្ធតែដឹងហើយថាទឹកដោះគោ ឈីស និងផលិតផលអាហារផ្សំឡើងពីទឹកដោះគោផ្សេងទៀតជាប្រភពដ៏ប្រសើរនៃជាតិកាល់ស្យូម និងប្រូតេអ៊ីន។ ប៉ុន្តែទោះជាយ៉ាងណាអាហារប្រភេទនេះក៏មានផ្ទុកជាតិខ្លាញ់ដែលអាចបង្កការរលាកក្នុងរាងកាយផងដែរ។ ដូច្នេះប្រសិនបើអ្នកហើមពោះ និងជួបប្រទះបញ្ហាពិបាករំលាយអាហារក្រោយទទួលទានអាហារផ្សំឡើងពីទឹកដោះគោ ចូរព្យាយាមកាត់បន្ថយការទទួលទាន។
៥. សាច់កែច្នៃ
ការទទួលទានសាច់កែច្នៃអាចបណ្ដាលឱ្យអ្នកកើនទម្ងន់ដោយសារមូលហេតុចម្បងពីរ។ ទី១នោះគឺអាហារប្រភេទនេះមានផ្ទុកសម្បូរទៅដោយជាតិខ្លាញ់មិនល្អ saturated fat។ ទី២នោះគឺសារធាតុគីមីក្នុងសាច់កែច្នៃអាចបង្កការរលាកក្នុងរាងកាយ៕
ត្រួតពិនិត្យដោយ www.health.com.kh