អន្តរជាតិ
អតីតប្រធានាធិបតីម៉ាឌីល លោក Abdulla Yameen (AFP)
×![]()
អតីតប្រធានាធិបតីម៉ាល់ឌីវលោក Abdulla Yameen នៅថ្ងៃ ២៨ វិច្ឆិកា ត្រូវបានកាត់ទោសឲ្យជាប់គុក៥ឆ្នាំក្រោមបទចោទលាងលុយកខ្វក់។ ក្រោយតុលាការប្រកាសសាលក្រមនេះ អ្នកគាំទ្រលោក Yameen មួយក្រុម បានប្រមូលផ្តុំគ្នានៅក្រៅបន្ទប់តុលាការ ដោយអះអាងថា លោកគឺស្អាតស្អំ។
លោក Yameen ដែលដឹកនាំម៉ាឌីលពីឆ្នាំ២០១៣ដល់២០១៨ ទទួលបរាជ័យយ៉ាងភ្ញាក់ផ្អើលក្នុងការបោះឆ្នោតកាលពីឆ្នាំមុន ហើយចាប់ពីពេលនោះមក លោកប្រឈមនឹងការស៊ើបអង្កេតពាក់ព័ន្ធកិច្ចព្រមព្រៀងមួយចំនួនដែលលោកបង្កើតឡើង អំឡុងអាណត្តិដឹកនាំលោក។
លោកត្រូវបានចោទប្រកាន់ថា ទទួលយកលុយ១លានដុល្លារដែលជាលុយរបស់រដ្ឋាភិបាល តាមរយៈក្រុមហ៊ុនឯកជនមួយ។ រដ្ឋអាជ្ញាម៉ាល់ឌីវអះអាងថា លុយនេះ ស្ថិតក្នុងផ្នែកមួយនៃកិច្ចព្រមព្រៀងជួលដីសម្រាប់អភិវឌ្ឍន៍វិស័យទេសចរណ៍។ យ៉ាងណាមិញ លោក Yameen បានទាត់ចោលការចោទប្រកាន់នេះ។
តាមការចុះផ្សាយរបស់ទីភ្នាក់ងារព័ត៌មាន AFP អាជ្ញាធរម៉ាល់ឌីវក៏បានសម្រេចបង្កកគណនីធនាគារ របស់លោក Yameen ផងដែរ កាលពីចុងឆ្នាំមុន ដែលក្នុងនោះមានលុយប្រមាណ ៦,៥លានដុល្លារ បន្ទាប់ពីមានការចោទប្រកាន់។ មេដឹកនាំវ័យ៦០ឆ្នាំរូបនេះ ត្រូវបានចាប់ខ្លួនក្នុងខែកុម្ភៈលើបទចោទសូកប៉ាន់សាក្សីក្នុងសំណុំរឿងលាងលុយកខ្វក់នេះ។
ក្រោយការសម្រេចរបស់តុលាការនេះ គេឃើញមាន អ្នកគាំទ្ររបស់អតីតប្រធានាធិបតីនេះមួយក្រុម បានប្រមូលផ្តុំគ្នានៅក្រៅបរិវេណតុលាការ ដោយអះអាងថា លោក Yameen គឺគ្មានកំហុសអ្វីឡើយ។ ខណៈត្រូវបានគេចាត់ទុកថា អ្នកមេដឹកនាំគាំទ្រចិន ហើយរងការចោទប្រកាន់ថា ដាក់គំនាបលើសិទ្ធិបញ្ចេញមតិនៅប្រទេសដែនកោះនេះ លោក Yameen ក៏ត្រូវបានតុលាការបញ្ជាឲ្យបង់លុយពិន័យ៥លានដុល្លារ។ ហើយលោក រំពឹងនឹងចូលបំភ្លឺនៅតុលាការឧទ្ធរណ៍ជាបន្តបន្ទាប់ទៀត។
សូមបញ្ជាក់ដែរថា ប្រទេសម៉ាល់ឌីវគឺជាសមរភូមិដ៏សំខាន់មួយរវាងមហាអំណាចតំបន់ ចិននិងឥណ្ឌា។ មានប្រជុំកោះដល់ទៅ ១១៩២ ប្រទេសនេះ មានប្រជាជនរស់នៅសរុបជាង ៤០ម៉ឺននាក់។ ម្យ៉ាងទៀត វិស័យទេសចរណ៍ គឺជាផ្នែកដ៏ចម្បងមួយនៃសេដ្ឋកិច្ចជាតិ ក៏ប៉ុន្តែគេព្រួយបារម្ភថា អនាគតរបស់ប្រទេសនេះ នឹងប្រឈមនឹងបញ្ហាបម្រែបម្រួលអាកាសធាតុ៕
Tag:
ម៉ាឌីល
Abdulla Yameen
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
