មេធាវី៖ អ្នកប្រឆាំងជាង២០នាក់ទៀត មិនទាន់ដោះលែង

ជាតិ

នយោបាយជាតិ

មេធាវី៖ អ្នកប្រឆាំងជាង២០នាក់ទៀត មិនទាន់ដោះលែង

29, Nov 2019 , 8:39 pm

រូបភាព

ដោយ: ថ្មីៗ

លោក សំ សុគង់ មេធាវីម្នាក់ ដែលតែងការពារក្តីឲ្យក្រុមប្រឆាំង អះអាងថា នៅមានអ្នកគាំទ្រអតីតគណបក្សប្រឆាំងជាង២០នាក់ទៀត ដែលកំពុងជាប់ឃុំ។ ក្នុងចំណោមអ្នកទាំងនោះ មានខ្លះ លោក ការពារក្តីឲ្យ តែមានអ្នកខ្លះ គឺមេធាវីផ្សេង ជាអ្នកការពារក្តីឲ្យ។

ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទនៅព្រឹកថ្ងៃទី២៩ ខែវិច្ឆិកា ឆ្នាំ២០១៩ លោក សំ សុគង់ ថ្លែងថា អ្នកនៅជាប់ឃុំទាំងនោះ បានរងបទចោទប្រកាន់ផ្សេងៗ តែជាទូទៅរងពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទរួមគំនិតក្បត់ជាតិ។ លោក បន្តថា លោក កំពុងតែសិក្សានិងស្រាវជ្រាវសាវតារនៃសំណុំរឿងរបស់អ្នកទាំងនោះ។

លោកមេធាវី បរិយាយថា បើអ្នកណា មិនទាន់ត្រូវបានកាត់ក្តី លោកនឹងស្នើសុំឲ្យដោះលែងនៅក្រៅឃុំជាបណ្តោះអាសន្ន បើអ្នកណា ត្រូវបានកាត់ក្តីរួចហើយ តែសាលក្រម មិនទាន់ចូលជាស្ថាពរលោក នឹបន្តប្តឹងទៅតុលាការជាន់ខ្ពស់ ហើយបើអ្នកអ្នណា ត្រូវបានកាត់ក្តីរួចហើយ ហើយសាលក្រមក៏ចូលជាស្ថាពរ លោក អាចនឹងធ្វើសំណើទៅសម្តេចនាយករដ្ឋមន្ត្រី ដើម្បីសុំឲ្យសម្តេចនាយករដ្ឋមន្ត្រី ថ្វាយទៅព្រះមហាក្សត្រ សុំឲ្យទ្រង់ប្រោសព្រះរាជទានលើកលែងទោស។ លោក បញ្ជាក់ថា លោក នឹងខិតខំ ដើម្បីឲ្យអ្នកនាំនោះ «បានរួចខ្លួនទាំងអស់គ្នា»។

បើតាមលោកមេធាវី មកដល់ពេលនេះ មានអ្នកប្រឆាំងជាង៧០នាក់ហើយ ដែលត្រូវបានដោះលែងឲ្យនៅក្រៅឃុំជាបណ្តោះអាន្ន ដោយភាគច្រើនជាអ្នកដែលរងបទចោទរួមគំនិតក្បត់ជាតិ។ ប៉ុន្តែ តុលាការ មិនទាន់ទម្លាក់បទចោទចេញពីពួកគេនោះទេ។

អ្នកទាំងនោះ មានឱកាសបាននៅឃុំ គឺដោយសារតែមានការស្នើឡើងពីសម្តេចនាយករដ្ឋមន្ត្រី។ សម្តេចនាយករដ្ឋមន្ត្រី យល់ថា អ្នកទាំងនោះ គួរតែត្រូវបានដោះលែង ព្រោះពួកគេ គ្រាន់តែជាអ្នកចាញ់ការបញ្ចុះបញ្ចូលរបស់មេដឹកនាំក្រុមប្រឆាំង។ ម្យ៉ាងទៀត ប្រមុខរដ្ឋាភិបាល គិតថា គម្រោងធ្វើរដ្ឋប្រហារ ដែលរៀបចំដោយមេដឹកនាំប្រឆាំង ត្រូវបរាជ័យទៅហើយ។

លោក សម រង្ស៊ី និង មនុស្សសំខាន់ៗ៨នាក់ទៀតរបស់លោក ត្រូវបានចោទពីបទឧបឃាត ដែលសំដៅថាពួកគាត់ ជាមេខ្លោងក្នុងការរៀបចំគម្រោងធ្វើរដ្ឋប្រហារ។ លោក សម រង្ស៊ី ដាក់ផែនការចូលកម្ពុជានៅថ្ងៃទី៩ ខែវិច្ឆិកា ឆ្នាំ២០១៩ ដើម្បីផ្តួលរំលំរដ្ឋាភិបាល តែត្រូវទួលបរាជ័យ។ កំពុងរស់នៅក្នុងប្រទេសបារាំង លោក សម រង្ស៊ី ប្រកាសថា លោក កំពុងស្វែងធម្យោបាយថ្មី ដើម្បីបានចូលមកកម្ពុជា៕