កីឡាជាតិ
ជាតិ
ព្រឹត្តិការណ៍ SEA Games នៅហ្វីលីពីន បើកការប្រកួតផ្លូវការនៅយប់នេះ
× ព្រឹត្តិការណ៍ប្រកួតកីឡាដ៏ធំប្រចាំតំបន់អាស៊ាន SEA Games ដែលហ្វីលីពីនធ្វើម្ចាស់ផ្ទះឆ្នាំនេះ ត្រូវបើកការប្រកួតផ្លូវការនៅយប់ថ្ងៃទី៣០ ខែវិច្ឆិកា ឆ្នាំ២០១៩នេះ។ ការប្រកួតដែលគ្រោងបញ្ចប់នៅថ្ងៃទី១១ ខែធ្នូ មួយនេះ មានអត្តពលិកមកពី១១ប្រទេសចូលរួម ខណៈលើកនេះម្ចាស់ផ្ទះហ្វីលីពីនដាក់កីឡា៥៦ប្រភេទឲ្យប្រកួតប្រជែង។
ទោះបីមានប្រភេទកីឡាមួយចំនួនបានចាប់ផ្តើមការប្រកួតបណ្តើរៗក៏ដោយ ប៉ុន្តែព្រឹត្តិការណ៍ស៊ីហ្គេមលើកទី៣០នៅហ្វីលីពីនមិនទាន់រៀបចំពិធីបើកការប្រកួតផ្លូវការនៅឡើយទេ។ ជាក់ស្តែងនៅយប់ថ្ងៃទី៣០ វិច្ឆិកា នេះ ព្រឹត្តិការណ៍ដែលរៀបចំពីរឆ្នាំម្តងមួយនេះ នឹងរៀបចំពិធីបើកការប្រកួតជាផ្លូវការរបស់ខ្លួន។
មុនឈានដល់ពិធីបើកការប្រកួតនៅយប់នេះ នៅថ្ងៃទី២៩ ខែវិច្ឆិកា ម្សិលមិញ ប្រធានប្រតិភូកីឡាទាំង១១ប្រទេសបានបង្ហូតទង់ជាតិរៀងៗខ្លួន ដើម្បីបើកទំព័រនៃការប្រកួត ក៏ដូចជាបង្ហាញពីប្រទេសដែលចូលរួម SEA Games នៅឆ្នាំនេះ។ ប្រតិភូកីឡាកម្ពុជាដែលចូលរួមក្នុងថ្ងៃបង្ហូតទង់ជាតិរួមមានលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា, លោក ស សុខា រដ្ឋលេខាធិការក្រសួងអប់រំយុវជននិងកីឡា និងថ្នាក់ដឹកនាំជាច្រើនរូបទៀត។
ការប្រកួតកីឡាស៊ីហ្គេមឆ្នាំនេះប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩។ ឆ្នាំនេះមានអត្តពលិកជិត៦ពាន់នាក់មកពី១១ប្រទេសចូលរួម។ ពួកគេត្រូវប្រកួតប្រជែងលើ៥៦ប្រភេទកីឡា ខណៈកម្ពុជាបញ្ជូនអត្តពលិក៣១ប្រភេទកីឡាឲ្យចូលរួម៕
Tag:
SEA Games
ហ្វីលីពីន
កម្ពុជា
© រក្សាសិទ្ធិដោយ thmeythmey.com