ព្រះមហាក្សត្រ៖ សូមជនរួមជាតិបន្តគាំទ្រសកម្មភាពនានារបស់ជនមានពិការភាព

ជាតិ

ព្រះមហាក្សត្រ

ព្រះមហាក្សត្រ៖ សូមជនរួមជាតិបន្តគាំទ្រសកម្មភាពនានារបស់ជនមានពិការភាព

30, Nov 2019 , 8:29 pm

រូបភាព

ដោយ: ថ្មីៗ

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានចេញព្រះរាជសារ អបអរសាទរការប្រកាសដាក់ឲ្យប្រើប្រាស់ផែនការយុទ្ធសាស្ត្រជាតិស្តីពីពិការភាព២០១៩-២០២៣ រួមទាំងទិវាជនមានពិការភាពកម្ពុជាលើកទី២១ និង ទិវាជនមានពិការភាពអន្តរជាតិលើកទី៣៧ ដែលនឹងត្រូវប្រារព្ធឡើងនៅថ្ងៃទី៣ ខែធ្នូ ឆ្នាំ២០១៩។

តាមរយៈព្រះរាជសារ ព្រះមហាក្សត្រ លើកទឹកចិត្តឲ្យរដ្ឋាភិបាលនិងប្រជាជនទូទៅ បន្តសកម្មភាពរបស់ខ្លួន ក្នុងការលើកកម្ពស់និងការគាំទ្រជនមានពិការភាពនៅកម្ពុជាកន្លងមក។ ព្រះអង្គ ទ្រង់មានព្រះបន្ទូលដូច្នេះថា៖«ខ្ញុំព្រះករុណា ខ្ញុំ សូមអំពាវនាវដល់បងប្អូនជនរួមជាតិ ទាំងអស់ បន្តការគាំទ្រដល់សកម្មភាពនានារបស់ជនមានពិការភាព ដើម្បីលុបបំបាត់ឧបសគ្គរារាំង ឈានទៅពង្រឹងភាពជាម្ចាស់ការឲ្យបានរឹងមាំ ក្នុងទិសដៅសម្រេចបាននូវការលើកកម្ពស់និងការការពារសិទ្ធិរបស់ជនមានពិការភាព»។

ទន្ទឹមនេះ ព្រះមហាក្សត្រ ទ្រង់បានរំលេចពីគុណសម្បត្តិរបស់រដ្ឋាភិបាលថា បានធ្វើឲ្យជីវភាពរស់នៅរបស់ជនមានពិការភាព មានភាពប្រសើរឡើង តាមរយៈការបង្កើនការងារ និងអាជីព ដល់ពួកគេ។ ព្រះអង្គ ទ្រង់ព្រះតម្រិះថា សមិទ្ធផលរយៈពេល៥ឆ្នាំនៃការអនុវត្តផែនការយុទ្ធសាស្ត្រជាតិស្តីពីពិការភាព២០១៤-២០១៨ បានធ្វើឲ្យជនមានពិការភាព ទទួលបានទាំងសេវាសុខភាព ប្រកបដោយគុណភពនិងសមធម៌ ព្រមទាំងការស្តារលទ្ធភាព ពលកម្ម សម្បទា និង សតិបញ្ញាបានល្អប្រសើរ។

ព្រះករុណាជាអម្ចាស់ជីវិតលើត្បូង ទ្រង់មានព្រះរាជឱង្ការថា ការចូលរួមរបស់ជនមានពិការភាព ក្នុងការសម្តែងមតិ ការទទួលព័ត៌មាន និង ការចូលរួមក្នុងជីវភាពនយោបាយ ត្រូវបានលើកទឹកចិត្តទាំងនៅកម្រិតថ្នាក់ជាតិ និងអន្តរជាតិ។

របាយការណ៍នៃផែនការយុទ្ធសាស្ត្រជាតិស្តីពីពិការភាពឆ្នាំ២០១៤-២០១៨ បង្ហាញថា ក្នុងឆ្នាំ២០១៩នេះ ជនមានពិការជិត៣ពាន់នាក់ (ស្ត្រីជិត៨០០នាក់) បានចូលបម្រើការងារក្នុងសា្ថប័នរដ្ឋចំនួន៤០ និងជនមានពិការភាព៣,៧ពាន់នាក់ (ស្ត្រីជាង២ពាន់នាក់) បានបម្រើការងារនៅក្នុងវិស័យឯកជនចំនួន១០២ក្រុមហ៊ុន៕