ជាតិ
រដ្ឋមន្ត្រីទេសចរណ៍ដាក់គោលដៅពង្រីកតំបន់គ្មានផ្សែងបារីក្នុងតំបន់ទេសចរណ៍
× សៀមរាប៖ ក្រសួងទេសចរណ៍ បានដាក់គោលការណ៍បរិស្ថានគ្មានផ្សែងបារីក្នុងវិស័យទេសចរណ៍ ដើម្បីលើកកម្ពស់ក្នុងការទប់ស្កាត់ផលប៉ះពាល់សុខភាព និងបរិស្ថានដែលកើនឡើងពីផ្សែងបារី។
រដ្ឋមន្ត្រីក្រសួងទេសចរណ៍ លោក ថោង ខុន បានអះអាងពីការគិតគូរនិងយកចិត្តទុកដាក់លើផលប៉ះពាល់នានាដែលបណ្ដាលមកពីផ្សែងបារី ក្នុងនោះបរិស្ថានគ្មានផ្សែងបារីក្នុងវិស័យទេសចរណ៍ ក៏ជាគោលការណ៍មួយរបស់ក្រសួង ។ ក្រសួងបានបង្កើតក្រុមការងារបរិស្ថានគ្មានផ្សែងបារីក្នុងវិស័យទេសចរណ៍ ដើម្បីធ្វើការងារដោយផ្ទាល់ជាមួយផ្នែកពាក់ព័ន្ធក្នុងវិស័យនេះ។ បើតាមលោក ថោង ខុន ក្រសួងកំពុងអភិវឌ្ឍន៍វិស័យទេសចរណ៍មួយដែលគ្មានផ្សែងបារី សក្ដិសមជាមាសបៃតងដែលបានចូលរួមកសាងសេដ្ឋកិច្ចបៃតង និងសហគមន៍បៃតង។
ក្នុងពិធីបើកកិច្ចប្រជុំតំបន់ប៉ាស៊ីហ្វិកលើកទី៧ស្ដីពី »ទីក្រុងគ្មានផ្សែងបារីធ្វើឱ្យទេសចរណ៍កាន់តែល្អប្រសើរ និងអភិរក្សបេតិកភណ្ឌយើង» នាថ្ងៃទី២៨ វិច្ឆិកា លោក ថោង ខុន បន្ថែមថា ដើម្បីជំរុញនិងគាំទ្រទីក្រុងគ្មានផ្សែងបារីនេះ រាជរដ្ឋាភិបាលបានបង្កើតច្បាប់ស្តីពីការត្រួតពិនិត្យផលិតផលថ្នាំជក់ នៅឆ្នាំ២០១៥ ព្រមទាំងអនុក្រឹត្យ ប្រកាស សារាចរ និងសេចក្តីណែនាំនានាក្នុងការជំរុញឲ្យប្រទេសកម្ពុជាក្លាយជាប្រទេសមួយដែលគ្មានផ្សែងបារីនៅឆ្នាំ២០២៥។
បន្ថែមពីនេះ លោករដ្ឋមន្ត្រីយល់ថា ការបង្កើតទីក្រុងទេសចរណ៍គ្មានផ្សែងបារីពិតជាបានរួមចំណែកយ៉ាងសំខាន់ក្នុងការអភិវឌ្ឍវិស័យទេសចរណ៍បៃតងនៅតាមសហគមន៍ទេសចរណ៍ តាមតំបន់ប្រាង្គប្រាសាទ និងតំបន់អេកូទេសចរណ៍ធម្មជាតិនានា។ « តំបន់ទេសចរណ៍នីមួយៗមានលក្ខណៈពិសេស និងភាពទាក់ទាញផ្សេងៗដោយឡែកពីគ្នា ប៉ុន្តែបរិស្ថានគ្មានផ្សែងបារីនៅតាមតំបន់ទេសចរណ៍ទាំងនោះគឺជាលក្ខណៈសម្បត្តិរួមមួយ ដែលជួយបង្កើនភាពទាក់ទាញថែមមួយកម្រិតទៀត»។ នេះជាការបញ្ជាក់របស់លោក ថោង ខុន៕
Tag:
ផ្សែងបារី
ទេសចរណ៍
© រក្សាសិទ្ធិដោយ thmeythmey.com