ជាតិ
សង្គមជាតិ
សហគមន៍កំពង់ឃ្លាំង ចុះប្រមូលសំរាមប្លាស្ទិកនៅបឹងទន្លេសាប ដើម្បីការពារជីវចម្រុះ និងធនធានធម្មជាតិ ប្រជាពលរដ្ឋសហគមន៍កំពង់ឃ្លាំង ក្នុងស្រុកសូទ្រនិគម ខេត្តសៀមរាប នាំជិះទូកប្រមូលសំរាម នៅបឹងទន្លេសាប នៅថ្ងៃទី១ ធ្នូ ឆ្នាំ២០១៩
× សៀមរាប៖ នៅព្រឹកថ្ងៃទី១ ធ្នូនេះ ក្រុមប្រជាពលរដ្ឋ ដែលរស់នៅសហគមន៍កំពង់ឃ្លាំង ស្រុកសូទ្រនិគម ខេត្តសៀមរាប បាននាំគ្នាចុះប្រមូលសំរាម និងកាកសំណល់ប្លាស្ទិក នៅតាមបឹងទន្លេសាប ដើម្បីការពារជីវចម្រុះ និងធនធានធម្មជាតិ។
លោក ស៊ា សុផល ប្រធានអង្គការមូលនិធីទំពាំងស្នងឫស្សី ដែលបានសម្របសម្រួលសកម្មភាពប្រមូលសំរាមនេះ បានបំផុសចលនាឱ្យពលរដ្ឋ ឈប់ចោលសំរាមក្នុងទន្លេសាប និងឈប់ឲ្យទន្លេសាបរងការបំពុលដោយសំរាម តទៅទៀត។ សម្រាប់លោក ស៊ា សុផល បញ្ហាសំរាមប្លាស្ទិក ដែលហូចូលនៅក្នុងបឹងទន្លេសាបនេះ វានឹងបំផ្លាញធនធានធម្មជាតិគ្រប់បែបយ៉ាង ដែលពលរដ្ឋត្រូវរួមគ្នាគិតគូដោះស្រាយបញ្ហានេះ។
ដោយសារមើលឃើញពីបញ្ហាសំរាមប្លាស្ទិកនេះ ប្រធានអង្គការមូលនិធីទំពាំងស្នងឫស្សី បានរៀបចំទិវាបរិស្ថានរដូវទឹកសម្រកបឹងទន្លេសាបរយៈពេល២ឆ្នាំមកហើយ ។ ហើយនៅឆ្នាំ២០១៩ កម្មវិធីសម្អាតបរិស្ថាននេះ នៅក្រោមប្រធានបទ «សហគមន៍ស្អាត ទន្លេសាបស្អាត ដោយគ្មានប្លាស្ទិក» ចាប់ពីថ្ងៃទី២៨ វិច្ឆិកា ដល់ថ្ងៃទី១ ធ្នូ ឆ្នាំ២០១៩។
នៅក្នុងកម្មវិធីនេះ នឹងមានសកម្មភាពសម្អាតបរិស្ថាន ការអប់រំនៅតាមសហគមន៍បឹងទន្លេសាប រួមមានសង្កាត់សៀមរាប សហគមន៍ចុងឃ្នៀស សហគមន៍មេជ្រៃ និងសហគមន៍កំពង់ឃ្លាំង។
សូមលោកអ្នកនាងទស្សនាវីដេអូខាងក្រោមដូចតទៅ៖
Tag:
សំរាម
ប្លាស្ទិក
បឹងទន្លេសាប
© រក្សាសិទ្ធិដោយ thmeythmey.com