អ្នកស្រី ហ៊ឺ ដាវី លក់មីស៊ុប នៅវត្តទួលទំពូង ទាក់ចិត្តអតិថិជន មិនឱ្យឃ្លាតចិត្ត

ជាតិ

អ្នកស្រី ហ៊ឺ ដាវី លក់មីស៊ុប នៅវត្តទួលទំពូង ទាក់ចិត្តអតិថិជន មិនឱ្យឃ្លាតចិត្ត

01, Dec 2019 , 8:59 pm

រូបភាព

ដោយ: អ៊ូ សុខមាន (OU Sokmean)

អ្នកស្រី ហ៊ឺ ដាវី បានលក់ម្ហូបអាហារ ក្នុងទីតាំងសាលារៀនបឋមសិក្សា នៅវត្តទួលទំពូង រាជធានីភ្នំពេញ អស់រយៈជាង៣០ឆ្នាំមកហើយ។ ពីដំបូងអ្នកស្រីលក់បាយសាច់ជ្រូកនិងលតឆា ប៉ុន្តែក្នុងរយៈពេល៧ឆ្នាំចុងក្រោយនេះ បានផ្លាស់ប្តូរដោយលក់មីស៊ុបប្រហិតវិញ។ មីស៊ុបរបស់អ្នកស្រីដាវី គឺលក់ដាច់ខ្លាំងណាស់ ជាមួយនឹង តម្លៃពី៤០០០ទៅ៦០០០រៀលក្នុងមួយចាន។

អ្នកលក់វ័យ៥២ឆ្នាំរូបនេះ បានប្រាប់សារព័ត៌មានថ្មីៗ(ThmeyThmey) ក្នុងមួយថ្ងៃៗ អ្នកស្រី លក់មីស៊ុបប្រហិតអស់ជាង៣០០ចាន ដោយប្រើប្រហិតសាច់គោលអស់ចំនួន១៥គីឡូក្រាម ប្រហិតត្រី៣០គីឡូក្រាម និងឈាមជ្រូកអស់៣០គីឡូក្រោម។ ការលក់មីស៊ុបនៅក្នុងវត្តទួលទំពូងនេះ អាចឱ្យអ្នកស្រី ហ៊ឺ ដាវី ទទួលបានប្រាក់ចំណេញប្រចាំថ្ងៃពី៣០០,០០០ទៅ៤០០,០០០រៀល។

«ភ្ញៀវដែលចូលមកហូបមីស៊ុបនៅទីនេះ ភាគច្រើនគឺជាអតីតសិស្សសាលាទួលទំពូង និងអ្នកធ្វើការងារ។ អ្នកដែលចូលមកហូប គាត់ពួកតែងតែនិយាយថាមីស៊ុបខ្ញុំឆ្ងាញ់ និងមានតម្លៃថោកសមរម្យ»។ នេះជាលើកឡើងរបស់អ្នកស្រី ដាវី។ អ្នកស្រីបានបន្តថា មីស៊ុបនេះ មានលក់ចាប់ពីម៉ោង៨ព្រឹកដល់ម៉ោង៣រសៀល។ ប៉ុន្តែជាទូទៅ អ្នកស្រីលក់អស់នៅម៉ោង១កន្លះ ឬម៉ោង២រសៀល ។

អ្នកស្រី ដាវីបាននិយាយដូច្នេះ៖«ដល់ម៉ោងបើកលក់ គឺមានភ្ញៀវចូលមកហូបច្រើនតែម្តង រកតែដកដៃមិនរួច។ ខ្ញុំលក់មីស៊ុបប៉ុន្មានខែចុងក្រោយនេះ មិនដែលបានហូបបាយថ្ងៃត្រង់ទេ ព្រោះពេលហ្នឹងភ្ញៀវចូលច្រើនខ្លាំងណាស់»។

ក្រៅពីកូនស្រីដែលឆ្លៀតពីការសិក្សា និងស្វាមីដែលទំនេរពីការងាររបស់ខ្លួនមកជួយលក់មីស៊ុបនេះ ក៏មានអ្នកលក់ដូរក្បែរៗគ្នាជួយលក់អ្នកស្រីផងដែរ។

លោក នាង ហ៊ូសេន គឺជាអតិថិជនមីស៊ុបរបស់អ្នកស្រី ហ៊ឺ ដាវី អស់រយៈជិត៥ឆ្នាំមកហើយ។ បើតាមលោក ហ៊ូសេន មីស៊ុបរបស់អ្នកស្រី ដាវី មិនត្រឹមតែមានរសជាតិឆ្ងាញ់ពិសានោះទេ គឺថែមទាំងមានតម្លៃសមរម្យទៀត។ យុវជនរូបនេះបានលើកឡើងដូច្នេះ៖«ខ្ញុំចូលហូបមីស៊ុបនៅទីនេះតាំងពីឆ្នាំ២០១៥មក តាមរយៈមិត្តភក្តិណែនាំ និងហៅមកហូបជាមួយគ្នា។ ក្រោយខ្ញុំបានហូបមីស៊ុបនេះលើកដំបូងហើយ ខ្ញុំក៏ចេះតែបន្តមកហូបមីស៊ុបនៅទីនេះទៀតមិនដែរខានឡើយ។ ក្នុងមួយសប្តាហ៍ យ៉ាងហោចណាស់ខ្ញុំមកហូបមីនៅទីនេះបាន២ដង»។

លោក ហ៊ូសេន បានបន្ថែមថា ការហូបមីស៊ុបក្តៅៗនៅក្នុងវត្តទួលទំពូងនេះ បានធ្វើឱ្យលោក មានអារម្មណ៍ល្អមួយនៅក្នុងខ្លួន និងនឹករម្លឹកដល់អតីតកាលពីកុមារភាពរបស់ខ្លួន ពិសេសគឺនៅពេលលោកដែលកំពុងរៀននៅថ្នាក់បឋមសិក្សាតែម្តង៕