ជាតិ
កម្ពុជា-វៀតណាម នឹងរៀបចំពិព័រណ៌ពាណិជ្ជកម្មមិត្តភាព នៅផ្សារគំរូព្រំដែន នាចុងខែធ្នូ
រដ្ឋមន្ត្រីពាណិជ្ជកម្ម លោក ប៉ាន សូរសក្តិ បើកសម្ពោធការដ្ឋានសាងសងផ្សារគំរូនៅព្រំដែនកម្ពុជា-វៀតណាម កាលពីឆ្នាំ២០១៨ (រូបពីក្រសួងពាណិជ្ជកម្ម)
×![]()
ភ្នំពេញ៖ក្រសួងពាណិជ្ជកម្មកម្ពុជា និងវៀតណាម នឹងរៀបចំពិព័រណ៌ពាណិជ្ជកម្មមិត្តភាព ដើម្បីអបអរដល់ការសម្រេចបាននូវផ្សារគំរូព្រំដែនកម្ពុជា «ផ្សារដារ» នៅខេត្តត្បូងឃ្មុំ។ ការតាំងពិព័រណ៌នេះ នឹងរៀបចំឡើង ចាប់ពីថ្ងៃទី២៤-២៦ ខែធ្នូ ឆ្នាំ២០១៩។ នេះបើតាមក្រសួងពាណិជ្ជកម្ម។
«ផ្សារដារ» ត្រូវបានសាងសង់រួចរាល់កាលពីពេលថ្មីៗ ក្រោមជំនួយឧបត្ថមរបស់រដ្ឋាភិបាលនៃប្រទេស វៀតណាម។ ពិពរណ៌ពាណិជ្ជកម្មនេះ ក៏មានគោលបំណង ជំរុញដល់ការផ្សព្វផ្សាយ បង្ហាញទំនិញ និងសេវាកម្មសក្តានុពល ដល់ប្រទេសទាំងពីរ។ ពិពរណ៌ពាណិជ្ជកម្មមិត្តភាពកម្ពុជា-វៀតណាម នឹងរៀបចំឡើង នៅភូមិដារកណ្តាល ឃុំដារ ស្រុកមេមុត ខេត្តត្បូងឃ្មុំ។
គម្រោងសាងសង់ផ្សារនេះ ត្រូវបានអនុម័តលើកដំបូងកាលពីឆ្នាំ២០១៣ ហើយត្រូវបានបន្តអនុវត្តឡើងវិញនៅឆ្នាំ២០១៦ នៅលើផ្ទែដីទំហំ ១៩,៦២៨ម៉ែត្រការ៉េ ស្ថិតក្នុងតំបន់សេដ្ឋកិច្ចពិសេស ថារីត្បូងឃ្មុំ ជាមួយទុនវិនិយោគសរុបចំនួន ៤៤,៧៦១,០០០លានដុង ឬប្រមាណជិត ២ លានដុល្លារអាមេរិក ដែលជាជំនួយរបស់រដ្ឋាភិបាលវៀតណាម។ នេះជាការបញ្ជាក់របស់ក្រសួងពាណិជ្ជកម្មកម្ពុជាកន្លងមក។
បើតាមរដ្ឋាភិបាលប្រទេសទាំងពីរ ការបង្កើត«ផ្សារដារ» នៅព្រំដែននេះ គឺដើម្បីបង្កើនទំហំពាណិជ្ជកម្មទ្វេភាគី ឱ្យដល់៥ពាន់លានដុល្លារអាមេរិក ក៏ដូចជាជួយលើកកម្ពស់ជីវភាពពលរដ្ឋប្រទេសទាំងពីរផងដែរ៕
Tag:
ព្រំដែន
ផ្សារដារ
© រក្សាសិទ្ធិដោយ thmeythmey.com
